2016 އަދި 2017 ވަނަ އަހަރު މޯލްޑިވްސް ޕޯޓްސް ލިމިޓެޑް (އެމްޕީއެލް) އިން 18 އެއަރކޮންޑިޝަން ޔުނިޓް (އޭސީ) ގަތުމުގައި ކޮރަޕްޝަނާއި ނާޖާއިޒު މަންފާ ހޯދައިދީފައިވާ މައްސަލައިގައި، އެ ކުންފުނީގެ އޭރުގެ ސީއީއޯ މުޙައްމަދު ޖުނައިދާއި ޕްރޮކިއުމަންޓް ހެޑް ޢަބްދުލްވައްހާބުގެ މައްޗަށް ދަޢުވާކުރުމަށް ޕްރޮސިކިއުޓަރ ޖެނެރަލް (ޕީޖީ) ގެ އޮފީހަށް ފޮނުވައިފިއެވެ.

މި މައްސަލައިގައި ދަޢުވާކޮށްދިނުމަށް އެދި އެންޓި-ކޮރަޕްޝަން ކޮމިޝަން (އޭސީސީ) އިން ޕީޖީ އޮފީހަށް ފޮނުވަން ނިންމާފައިވަނީ:

• އެމްޕީއެލްގެ އޭރުގެ ޗީފް އެގްޒެކެޓިވް އޮފިސަރ (ސީއީއޯ) މުޙައްމަދު ޖުނައިދު (މ. ރީފްވިލާ / ކ. މާލެ)
• އެމްޕީއެލްގެ ޕްރޮކިއުމަންޓް ޑިޕާޓްމަންޓުގެ އޭރުގެ ހެޑް ޢަބްދުލްވައްހާބު (މ. ހިލްއިންދަގާރޑެން / ކ. މާލެ)

އޭސީސީގެ ތަޙުޤީޤުން ހާމަވެފައިވާ ގޮތުގައި، މި އޭސީތައް ގަނެފައިވަނީ އޭރު އެ ކުންފުނިން ޢަމަލުކުރަމުންދިޔަ، ސަރުކާރުގެ ކުންފުނިތަކުން މުދަލާއި ޚިދުމަތް ހޯދުމުގައި ޢަމަލުކުރަންޖެހޭ ސްޓްރެޓެޖީ އާއި ޤަވާއިދު (2011) އާ ޚިލާފަށް، އާންމުކޮށް އިޢުލާންކުރުމެއްނެތިއެވެ. އަދި އެ ކުންފުނީގެ ޑިރެކްޓަރުންގެ ބޯޑުގެ ނިންމުމަކާ ނުލައި، އެ މަސައްކަތުގެ ތަޖުރިބާ ލިބިފައިނުވާ އަދި ތުހުމަތުކުރެވޭ ފަރާތްތަކާ ގުޅުން އޮތް އަމިއްލަ ފަރުދުންގެ ވިޔަފާރިއަކުން، އެދުވަސްވަރު މާކެޓު ރޭޓަށްވުރެ ބޮޑު އަގުގައި 1,083,998 (އެއް މިލިއަން އަށްޑިހަ ތިންހާސް ނުވަސަތޭކަ ނުވަދިހަ އަށެއް) ރުފިޔާއަށެވެ.

މި މައްސަލައިގައި އެދެމީހުންގެ މައްޗަށް ދަޢުވާކުރުމަށް ހުށަހެޅީ:

1. ޤާނޫނު ނަންބަރު 2014/9 (ދިވެހިރާއްޖޭގެ ޤާނޫނުލްޢުޤޫބާތު) ގެ 513 ވަނަ މާއްދާގެ (ށ): ރަސްމީ ޙައިޞިއްޔަތު ނުވަތަ އެ ޙައިޞިއްޔަތުގެ ނުފޫޒު ނަހަމަގޮތުގައި ބޭނުންކޮށްގެން ނާޖާއިޒު މަންފާ ހޯދައިދިނުމުގެ ކުށުގެ ދަޢުވާ.
2. ޤާނޫނު ނަންބަރު 2/2000 (ކޮރަޕްޝަން ހުއްޓުވުމާއި މަނާކުރުމުގެ ޤާނޫނު) ގެ 13 ވަނަ މާއްދާގެ (ހ): ދައުލަތަށް ފައިދާއެއް ލިބެންއޮތް ކަމެއްގައި އެނޫންގޮތަކަށް ޢަމަލުކުރުމުގެ ކުށުގެ ދަޢުވާ.

މި މައްސަލައިގައި ދަޢުވާކޮށްދިނުމަށް އެދި އޭސީސީން ޕީޖީ އޮފީހަށް ފޮނުވާފައިވަނީ 16 ސެޕްޓެންބަރު 2026 ގައެވެ.