2003 ވަނަ އަހަރު ދިވެހި ރައްޔިތަކަށް ހުޅުމާލެއިން ވިއްކާފައިވާ ގޯއްޗެއް ހަވާލުނުކުރެވި އޮތް މައްސަލައެއްގައި އެ ފަރާތަށް ބިމެއް ވިއްކުމަށް ނިންމި ނިންމުމުގައި އެއްވެސް ގޯހެއް އުޅޭތޯ ބަލައިދިނުމަށް އެދި، މިނިސްޓްރީ އޮފް އިންފްރާސްޓްރަކްޗަރ، ހައުސިންގ އެންޑް އާބަން ޑިވެލޮޕްމަންޓުން އަމިއްލައަށް އެންޓި-ކޮރަޕްޝަން ކޮމިޝަން (އޭސީސީ) އަށް ހުށަހެޅުމަށް ނިންމައިފިއެވެ.

ސޯޝަލް މީޑިއާގައި ދައުރުވަމުންދާ މިނިސްޓްރީގެ އެތެރޭގެ މެމޯއަކާ ގުޅިގެން ނެރުނު ބަޔާނެއްގައި ހައުސިންގ މިނިސްޓްރީން ބުނީ، މިއީ 2003 ވަނަ އަހަރުގެ ނޮވެމްބަރު މަހުގެ 22 ވަނަ ދުވަހު އޭރުގެ ހޯމް މިނިސްޓްރީގެ ދަށުން ހިންގި ބޯހިޔާވަހިކަމުގެ ސްކީމެއްގެ ތެރެއިން ހުޅުމާލެ ފޭސް 1 އިން އަޙްމަދު ޒާހިރު ނަމަކަށް ކިޔާ މީހަކަށް ދޫކޮށްފައިވާ ގޯއްޗެއް ކަމަށެވެ.

އެގޮތުން، 904 އަކަފޫޓުގެ އެ ބިމުގެ އަގަކީ 339,000 ރުފިޔާ ކަމަށް އޭރުގެ ރައީސް އޮފީހުގެ ހުޅުމާލެ ޑިވެލޮޕްމަންޓް ޔުނިޓުން ކަނޑައަޅައި ލިޔުން ދޫކޮށްފައިވީ ނަމަވެސް، ވޭތުވެދިޔަ އެއްވެސް ސަރުކާރަކުން އެ ބިން އެ ފަރާތާ ހަވާލުކޮށްފައި ނުވާ ކަމަށާއި، ބިން ހަވާލުކޮށްދިނުމަށް އޭނާ ތަކުރާރުކޮށް އެދިފައިވާކަން ލިޔެކިޔުންތަކުން އެނގެން އޮތް ކަމަށް މިނިސްޓްރީން ބުންޏެވެ.

މި މައްސަލައަށް ހައްލެއް ހޯދައިދިނުމަށް އެ ފަރާތުން އެދިފައިވާތީ، އޭނާގެ ދިރިއުޅުމުގެ ހާލަތަށް ބަލައި، ކުރިން އެއްބަސްވެފައިވާ ވިޔަފާރި އުސޫލުތަކާ އެއްގޮތްވާ ގޮތުގެ މަތިން މިނިސްޓްރީގެ ބެލުމުގެ ދަށުގައިވާ ބިމެއް ވިއްކުމަށް ނިންމީ ކަމަށް ބަޔާނުގައިވެއެވެ. އެގޮތުން ވިއްކަން ނިންމާފައިވަނީ "ބިންވެރިޔާ ސްކީމް" ގެ ދަށުން އަސާސީ ޝަރުތު ހަމަނުވާ ފަރާތްތަކަށް ކުރިން ދޫކޮށްފައި ހުރުމުން އެއްބަސްވުން ބާތިލުކޮށް އަނބުރާ ނަގާފައިވާ ބިންތަކުގެ ތެރެއިން ބިމެކެވެ. އަދި މި ބިން ވިއްކަން ނިންމާފައިވަނީ، ބިންވެރިޔާ ސްކީމުގެ ދަށުން ގުޅީފަޅުން އެ ފަރާތަށް ލިބިފައިވާ ޕްލޮޓާ ގުޅޭ އެންމެހައި ހައްގުތައް ދޫކޮށްލުމަށް އެއްބަސްވުމުން ކަމަށްވެސް މިނިސްޓްރީން ހާމަކުރިއެވެ.

މީގެއިތުރުން، ބޯހިޔާވަހިކަމަކީ ނުހަނު ހައްސާސް މައްސަލައަކަށްވާތީ، މި މައްސަލާގައި މިނިސްޓްރީން އެއްވެސް އުސޫލަކާ ޚިލާފަށް އަމަލުކޮށްފައިވޭތޯ ބެލުމަށް އިސްނަގައިގެން އޭސީސީއަށް ހުށަހެޅުމަށް ނިންމާފައިވާ ކަމަށް މިނިސްޓްރީން ބުންޏެވެ. އަދި އެ ފަރާތާއެކު ބިން ހަވާލުކުރުމުގެ އެއްބަސްވުމުގައި ސޮއިކުރުމާމެދު އެންމެ ފަހުގެ ނިންމުން ނިންމާނީ އޭސީސީގެ ބަހެއް ހޯދައި، ގާނޫނީ ލަފާ ލިބުމުން ކަމަށްވެސް ހައުސިންގ މިނިސްޓްރީން ވަނީ ފާހަގަކޮށްފައެވެ.