މެލޭޝިއާގެ ބޮޑުވަޒީރު އަންވަރު އިބްރާހީމް ރާއްޖެއަށް ކުރެއްވި ރަސްމީ ދަތުރުފުޅު ނިންމަވާލެއްވުމަށްފަހު، އެނބުރި ގައުމަށް ވަޑައިގެން ސޯޝަލް މީޑިއާގައި ހިއްސާކުރެއްވި ޕޯސްޓަކުން ގިނަ ދިވެހިންގެ ސަމާލުކަން ވަނީ ހޯއްދަވާފައެވެ.

ސަބަބަކީ ބޮޑުވަޒީރުގެ ސޯޝަލް މީޑިއާ ޕޭޖުތައް ބަލަހައްޓާ ޓީމުން ގެންގުޅޭ ވަރަށް ތަފާތު އަދި މަޖާ އާދައަކާ ގުޅިގެންނެވެ.

އާންމުގޮތެއްގައި ގައުމުތަކުގެ ވެރިން އެއް ގައުމުން އަނެއް ގައުމަށް ކުރައްވާ ރަސްމީ ދަތުރުފުޅުތަކުގެ ފޮޓޯތަކަކީ ވަރަށް ސީރިއަސް އަދި ރަސްމީ ފޮޓޯތަކެކެވެ. ނަމަވެސް މެލޭޝިއާގެ ބޮޑުވަޒީރު ކޮންމެ ގައުމަކަށް ވަޑައިގަތަސް، އެ ދަތުރުފުޅެއްގެ ފޮޓޯތައް އިންސްޓަގްރާމްގައި ހިއްސާކުރައްވާއިރު، ބެކްގްރައުންޑް މިއުޒިކްގެ ގޮތުގައި ބޭނުންކުރައްވަނީ އެ ގައުމެއްގެ ލަވަތަކެވެ.

އެންމެ މަޖާ ކަމަކީ ބައެއް ފަހަރު މިގޮތަށް ބޭނުންކުރައްވަނީ އެ ގައުމެއްގައި އެވަގުތަކު އެންމެ ވައިރަލްވެފައިވާ ލަވަތައް ނުވަތަ ޕޮޕް ލަވަތަކަށް ވުމެވެ. ވަރަށް ރަސްމީކޮށް ސަލާމްކުރައްވާ މަންޒަރު ފެންނަ ފޮޓޯތަކާއެކު ޓްރެންޑިންގ ލަވަތައް އިވުމުން، މިއީ ސޯޝަލް މީޑިއާ ބޭނުންކުރާ ފަރާތްތަކަށް ވަރަށް މަޖާ ކަމަކަށް ވަނީ ވެފައެވެ.

ރާއްޖެއަށް ކުރެއްވި ދަތުރުފުޅު ނިންމަވާލެއްވުމަށްފަހު ބޮޑުވަޒީރު އަންވަރު އިބްރާހީމް ވަނީ ރާއްޖޭގެ ރީތި މަންޒަރުތަކާއި، ރަސްމީ ބައްދަލުވުންތަކުގެ ފޮޓޯތައް ހިއްސާކުރައްވާފައެވެ. އަދި އާދައިގެ މަތިން މި ފޮޓޯތަކާއެކު ވެސް ވަނީ ދިވެހި ލަވަތައް ހިމަނުއްވާފައެވެ.

އެގޮތުން މޭނާ ހައްސާން ގެ 3 ލަވައަކާ އެކަތި ބޮޑުބެރު ގްރޫޕުގެ މަޝްހޫރު ލަވަ މަރިޔަމް މަލާ ވަނީ ފޮޓޯތަކާއި އެކު ހިމަނުއްވާފައެވެ. މިއާއެކު ގިނަ ދިވެހިން އަންނަނީ މެލޭޝިއާގެ ބޮޑުވަޒީރުގެ މި "ކޫލް" އަދި ޒަމާނާ ގުޅޭ ޑިޕްލޮމަސީ ސްޓައިލަށް ތަޢުރީފުކޮށް، ސޯޝަލް މީޑިއާގައި މި ވާހަކަ ދައްކަމުންނެވެ.

މިއީ ޔަގީނުންވެސް ބައިނަލްއަޤްވާމީ ގުޅުންތައް ބަދަހިކުރުމުގައި، އާންމު ރައްޔިތުންނާ ގާތްކަން އުފެއްދުމަށް ސޯޝަލް މީޑިއާ ބޭނުންކުރެވިދާނެ ވަރަށް ތަފާތު އުކުޅެކެވެ.