ދާންދޫ ބަލިކޮށް ފައިނަލުގެ ފުރަތަމަ ޖާގަ ބޮއްކުރާ އިން ކަށަވަރުކޮށްފި

ގައްދޫގައި މިހާރު ކުރިޔަށްދާ " ބީ ބޯލްޑް ހުވަދޫ ވަތަބަނޑޭރި ވޮލީބޯލް ޗެލެންޖް 2024" ގެ ފިރިހެން ޑިވިޝަނުގައި މިރޭ ކުޅުނު ފުރަތަަމަ މެޗުގައި ދާންދޫ އާއި ބޮއްކުރާ ވާދަކުރި މެޗު 3-1 ގެ ނަތީޖާއަކުން ކާމިޔާބުކޮށް މުބާރާތުގެ ފައިނަލުގެ ފުރަތަމަ ޖާގަ ބޮއްކުރާ އިން ކަށަވަރުކޮށްފިއެވެ.

މެޗުގެ ފުރަތަމަ ސެޓް ފަސް ޕޮއިންޓްގެ ލީޑަކާއެކު 20-25 ގެ ނަތީޖާއަކުން ބޮއްކުރާ ކާމިޔާބުކުރި ނަމަވެސް ޖެހިގެންއައި ދެވަނަ ސެޓް ހަ ޕޮއިންޓްގެ ލީޑަކާއެކު 19-25 ގެ ނަތީޖާއަކުން ކާމިޔާބުކުރީ ދާންދޫ އިންނެވެ. އަދި ޖެހިގެން އައި ދެ ސެޓް ފަސޭހަކަމާއެކު 13-25 ގެ ތަފާތުބޮޑު ނަތީޖާއަކުން ކާމިޔާބުކުރީ ބޮއްކުރާ އިންނެވެ. އަދި މިމެޗުގެ މޮޅު ކުޅުންތެރިއަކަށް ހޮވުނީ ކުަލަބު ބޮއްކުރާގެ އަހުމަދު ފާޒިލް އެވެ.

މިނަތީޖާއެކު ކުޅުނު ހަތަރު މެޗުން ބޮއްކުރާއަށް 10 ޕޮއިންޓް ލިބިފައިވާއިރު، އެޓީމު ވަނީ ލީގުބުރުގެ އެއްވަނަ ޓީމުގެ ގޮތުގައި މުބާރާތުގެ ފައިނަލުން ޖާގަހޯދާފައެވެ. އަދި މިމެޗުން ބަލިވި ދާންދޫއަށް ހަތަރު މެޗުން ލިބުނު ހަ ޕޮއިންޓާއެކު އެޓީމުން މުބާރާތް ނިންމާލީ ތާވަލުގެ ހަތަރުވަނައިގައެވެ. އަދި ލީގުބުރުގެ ތިންވަނަ ޓީމުގެ ގޮތުގައި ޕްލޭއޮފް ދެވަނަ ޖާގަހޯދީ ގެމަނަފުއްޓެވެ.

ގެމަނަފުއްޓަށް ލީގުބުރުގެ ތިންވަނަ ލިބުނީ ޕޮއިންޓްގެ ގޮތުން ދާންދޫ އާއި އެއްވަރުވެ، މިދެޓީމު ލީގުބުރުގައި ވާދަކުރި މެޗުން ގެމަނަފުށި ކުރިހޯދާފައިވާތީ އެވެ. އަދި ޕްލޭއޮފް މެޗުގައި ގެމަނަފުށިން ނުކުންނާނީ ލީގުބުރުގެ ދެވަނަ ހޯދި ވާދޫ އާއި ދެކޮޅަށެވެ.

ގައްދޫ ކައުންސިލްގެ ފަރާތުން އިންތިޒާމްކޮށް މުޅި ހުވަދު އަތޮޅަށް ހުޅުވާލައިގެން ބާއްވާ މިމުބާރާތުގެ ފިރިހެން ޑިވިޝަނުގައި މިއަހަރު ފަސް ޓީމަކުން ވާދަކުރަމުން އަންނައިރު، މި ޑިވިޝަނުގެ މެޗުތައް ކުރިއަށް ގެންގޮސްފައި ވަނީ ބައިވެރިވި ފަސް ޓީމުގެ މެދުގައި ލީގު އުސޫލުން ކޮންމެ ޓީމެއް ކޮންމެ ޓީމަކާއި އެއްމެޗުކުޅެ ލީގުބުރުގެ އެއްވަނަ ހޯދާ ޓީމަކަށް މުބާރާތުގެ ފައިނަލްގެ ފުރަތަމަ ޖާގަ ލިބޭގޮތަށެެވެ.

މީގެ އިތުރުން ލީގުބުރުގެ ދެވަނަ ޓީމާއި ތިންވަނަ ޓީމުގެ މެދުގައި ކުޅެވޭ ޕްލޭއޮފް މެޗުން މޮޅުވާ ޓީމަކަށް ފައިނަލުގެ ދެވަނަ ޖާގަ ލިބިގެންދާނެއެވެ.

23 ޑިސެންބަރު 2024 އިން 1 ޖެނުއަރީ 2025 ގެ ނިޔަލަށް ކުރިއަށް ގެންދާ މިމުބާރާތުގެ ޗެންޕިއަން ޓީމަށް 55،000 އަދި ރަނަރަޕް ޓީމަށް 25،000 ރުފިޔާގެ ފައިސާގެ އިނާމެއް ހުށަހަޅާފައި ވާއިރު، މުބާރާތުގެ ޓައިޓަލް ސްޕޮންސަރ އަކީ ބީ ބޯލްޑް ޕްރައިވެޓް ލިމިޓެޑެވެ. އަދި މިމުބާރާތުގެ ހުރިހާ މެޗެއް އިވެންޓްކާސްޓް މޯލްޑިވްސް އިން ލައިވްކުރުމަށް ހަމަޖެހިފައިވާއިރު، މުބާރާތުގެ މީޑިއާ ޕާޓްނަރަކީ ގާފު ސްޕޯޓްސް އެވެ.