ބޮލީވުޑްގެ އެންމެ ކާމިޔާބު އެއް ފިލްމު 'ބްރަހްމާސްތްރާ' ގެ ދެވަނަ ބައިން ރަންބީރު ކަޕޫރާއެކު މުހިންމު ރޯލެއް ކުޅުމަށް ކުރިއަރަމުން އަންނަ ބަތަލާ އަނީތު ޕައްޑާއަށް ހުށަހަޅައިފިއެވެ.

އަޔާން މުކަރްޖީ ޑައިރެކްޓްކުރާ 'ބްރަހްމާސްތްރާ 2' ގެ ވަރަށް މުހިންމު ކެރެކްޓަރަކަށް އަނީތު ވަނީ ޝޯޓްލިސްޓް ކުރެވި، އޭނާއަށް ވަނީ އެ ރޯލު ހުށަހަޅާފައެވެ.

މި ފިލްމުގެ އުފެއްދުންތެރިންގެ ފަރާތުން އަދި މިކަން ރަސްމީކޮށް ކަށަވަރުކޮށްދީފައި ނުވި ނަމަވެސް، ރިޕޯޓުތައް ބުނާގޮތުން އަނީތުއަށް ހުށަހަޅާފައިވަނީ ފިލްމުގެ މައިގަނޑު ވާހަކައާ ވަރަށް ބޮޑަށް ގުޅިފައިވާ ރޯލެކެވެ. އަދި މި ރޯލުގައި އޭނާ ފެނިގެންދާނީ ފިލްމުގެ ލީޑް އެކްޓަރ ރަންބީރު ކަޕޫރާ އެކީގައެވެ.

2022 ވަނަ އަހަރު ނެރުނު 'ބްރަހްމާސްތްރާ: ޕާޓް 1 – ޝިވާ' އަކީ ބޮކްސް އޮފީހުގައި ބޮޑު ކާމިޔާބީއެއް ހޯދި ފިލްމެކެވެ. ރަންބީރު ކަޕޫރާއި އާލިއާ ބަޓް ލީޑް ރޯލު ކުޅުނު އެ ފިލްމަށްފަހު، މީގެ ދެވަނަ ބައި ކަމަށްވާ 'ބްރަހްމާސްތްރާ ޕާޓް 2: ދޭވް' އަށް ސަޕޯޓަރުން އަންނަނީ ވަރަށް ބޮޑަށް އިންތިޒާރުކުރަމުންނެވެ.

ދެވަނަ ބައިގައި މައިގަނޑު ގޮތެއްގައި ފެނިގެންދާނީ 'ދޭވް' އަދި 'އަމްރިތާ' ގެ ވާހަކަކަން ޑައިރެކްޓަރު ވަނީ ކުރިން ހާމަކޮށްފައެވެ.

އަނީތު ޕައްޑާއަކީ ބޮލީވުޑްގައި ކުރިއަރަމުން އަންނަ އުންމީދީ ތަރިއެކެވެ. 'ބްރަހްމާސްތްރާ' ފަދަ ބޮޑު ފްރެންޗައިޒްއެއްގެ ފިލްމަކުން އޭނާއަށް ފުރުސަތު ލިބުމަކީ، އޭނާގެ ފިލްމީ ކެރިއަރަށް ލިބިގެންދާނެ ވަރަށް ބޮޑު ކުރިއެރުމެއް ކަމަށް ފިލްމީ ދާއިރާ ދިރާސާކުރާ ފަރާތްތަކުން ބުނެއެވެ.

މި ފިލްމުގެ ކާސްޓިންގ މަސައްކަތްތައް މިހާރުވެސް ބާރަށް ކުރިއަށްދާއިރު، އިތުރު ތަރިންގެ ނަންތައްވެސް ކުރިއަށް އޮތް ތާނގައި އިއުލާންކުރާނެ ކަމަށް ބެލެވެއެވެ.