ފަސޭހަކަމާއެކު ފްލައިންގް އީގަލްސް ބަލިކޮށް ޖީބީ އިން ފެށުން ރަނގަޅުކޮށްފި

7 ވަނަ ވެމްކޯ ހޭންޑްބޯޅަ މޯލްޑިވްސް ޗެންޕިއަންޝިޕް 2024 ގެ ފިރިހެން ޑިވިޝަން ގުރޫޕް ބީގައި މިއަދު ހަވީރު ފްލައިންގް އީގަލްސް ސްޕޯޓްސް ކުލަބާއި ޖީބީ ސްޕޯޓްސް ކުލަބު ވާދަކުރި މެޗު ފަސޭހަކަމާއެކު 41-14 ގެ ތަފާތުބޮޑު ނަތީޖާއަކުން މޮޅުވެ ބީޖީ ސްޕޯޓްސް ކުލަބުން މުބާރާތުގެ ފެށުން ރަގަޅުކޮށްފި އެވެ.

މިމެޗަކީ ފުރަތަމަ ހުކުރު ދުވަހުގެ ހަވީރު ކުޅެން ތާވަލު ކުރެވިފައި އޮތް މެޗެކެވެ. ނަމަވެސް ވިއްސާރަވެ މޫސުން ގޯސްވުމުގެ ސަަބަބުން ހޮނިހިރު އަދި އާދިއްތަ ދުވަހު ވެސް މިމެޗު ކުރުއަށް ގެންދެވޭގޮތް ވަނީ ނުވެފައެވެ.

މެޗުގެ ފުރަތަމަ ހާފު 18-6 ގެ ނަތީޖާއަކުން ޖީބީ ސްޕޯޓްސް ކުލަބު ކުރީގައި އޮވެގެން ނިމުނުއިރު، މެޗުގެ ދެވަނަ ހާފުގައި ޖީބީ ސްޕޯޓްސް ކުލަބުން ވަނީ އިތުރު 23 ލަނޑު ކާމިޔާބުކޮށްފައެވެ. އަދި މިހާފުގައި ޖީބީގެ ކީޕަރު އަހުމަދު އިނާޝްގެ ފަރާތުން ރަނގަޅު ސޭވުތަކެއް ފެނިގެންދިޔައިރު، ފްލައިންގް އީގަލްސް އިން ވެސް ވަނީ އިތުރު އަށް ލަނޑު ކާމިޔާބުކޮށްފައެވެ.

ފްލައިންގް އީގަލްސް އާއި ޖީބީ ސްޕޯޓްސް ކުލަބު ވާދަކުރި މެޗުގެ ތެރެއިން... ފޮޓޯ: ގާފު ސްޕޯޓްސް/ހުސެއިން

އެގޮތުން މިމެޗުގައި ޖީބީ ސްޕޯޓްސް ކުލަބުގެ މުޙައްމަދު ފިރުނާޝް އަބްދުﷲ 15 ލަނޑު ކާމިޔާބުކުރިއިރު، އެޓީމުގެ އާދިލް ޝަހީދު އަބްދުއް ރަހްމާން ވަނީ 6 ލަނޑު ކާމިޔާބުކޮށްފައެވެ. އަދި އެޓީމުގެ އިސްމާއިލް ފަރްހާން، އަބްދުﷲ ނާޖީ އަދި އިބްރާހިމް އަޒުހާން މިއިން ކޮންމެ ކުޅުންތެރިއެއް ހަތަރު ލަނޑު ކާމިޔާބުކުރިއިރު، އެޓީމުގެ އަބްދުﷲ ޒިޔާއު ވަނީ ދެލަނޑު ކާމިޔާބުކޮށްފައެވެ. އަދި މީގެ އިތުރުން މިމެޗުގައި އެޓީމުގެ އަހުމަދު ޖައިލަމް، އާދަމް އަމީލް އަމީން، މުހައްމަދު ނުސޫހް އަދި ހުސެއިން ރިފާއު މިއިން ކޮންމެ ކުޅުންތެރިއެއް ވަނީ އެއްލަނޑު ކާމިޔާބުކޮށްފައެވެ.

ފްލައިންގް އީގަލްސް އާއި ޖީބީ ސްޕޯޓްސް ކުލަބު ވާދަކުރި މެޗުގެ ތެރެއިން... ފޮޓޯ: ގާފު ސްޕޯޓްސް/ހުސެއިން

މީގެ އިތުރުން މިމެޗުގައި ފްލައިންގް އީގަލްސްގެ ލަހުފާން އަހުމަދު ޝަހީމް ހަ ލަނޑު ކާމިޔާބުކުރިއިރު، އަބްދުﷲ އިޔާސް ވަނީ ތިން ލަނޑު ކާމިޔާބުކޮށްފައެވެ. އަދި އެޓީމުގެ އަބްދުﷲ އައްޒާމް ޝަފީގު އަދި އާއިލް މަޖީދު މިއިން ކޮންމެ ކުޅުންތެރިއެއް ދެލަނޑު ކާމިޔާބުކުރިއިރު، އެޓީމުގެ އަލީ އަމީޒު ވަނީ މިމެޗުގައި އެއްލަނޑު ކާމިޔާބުކޮށްފައެވެ. އަދި މިމެޗުގެ މޮޅު ކުޅުންތެރިއަކަށް ހޮވުނީ ޖީބީ ސްޕޯޓްސް ކުލަބުގެ މުޙައްމަދު ފިރުނާޝް އަބްދުﷲ އެވެ.

މިއަހަރުގެ ހޭންޑްބޯލް މޯލްޑިވްސް ޗެންޕިއަންޝިޕްގެ ފިރިހެން ޑިވިޝަނުގައި 10 ޓީމު ބައިވެރިވެފައިވާއިރު، މުބާރާތް ކުރިއަށް ދަނީ ބައިވެރިވި 10 ޓީމު ދެ ގުރޫޕަކަށް ބަހާލައިގެންނެވެ. ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދާ ދެޓީމު މުބާރާތުގެ ސެމީ ފައިނަލަށް ހޮވޭއިރު، ސެމީ ފައިނަލް ދެމެޗު ކުޅުމަށްތާވަލުކުރެވިފައި ވަނީ ޖޫން މަހުގެ ދެވަނަ ދުވަހުގެ ރޭ އެވެ. އަދި މުބާރާތުގެ ފައިނަލް މެޗު ކުޅުމަށް ތާވަލު ކުރެވިފައިވަނީ ޖޫން މަހުގެ ހަވަނަ ދުވަހުގެ ރޭ އެވެ.