ބައިނަލްއަގުވާމީ އެކުވެރިކަމުގެ މެޗެއްގައި މިރޭ އިންޑިޔާ އާއި ދެކޮޅަށް ކުޅުނު މެޗު 4-0 ގެ ނަތީޖާއަކުން ބްރެޒިލް އިން ކާމިޔާބުކޮށްފިއެވެ.

މިހާރު ކުރިއަށްދާ އިންޓަނޭޝަނަލް ބްރޭޖުގައި ބްރެޒިލް އެންމެ ފަހުން ކުޅުނު މެޗުގައި އޮސްޓްރޭލިއާ އަތުން 4-2 ގެ ނަތީޖާއަކުން މޮޅުވެފައިވާއިރު، އިންޑިޔާ އެންމެ ފަހުން ކުޅުނު މެޗުގައި ޕެނަމާ އާއި ވާދަކޮށް 1-1 ގެ ނަތީޖާއަކުން ދެޓީމު ވަނީ އެއްވަރުވެފައެވެ.

ފީފާ ފުޓްބޯޅަ ރޭންކިންގެ ފަސްވަނައިގައި މިވަގުތު އޮތް ބްރެޒިލް އާއި ދެކޮޅަށް ފީފާ ރޭންކިންގެ 138 ވަނައިގައި މިވަގުތު އިންޑިޔާ އިން ކަލްކަތާގައި ކުޅުނު މިމެޗު ބެލުމަށް 68000 މީހުން ސްޓޭޑިއަމްއަށް ވަދެފައިވާއިރު، މެޗުގެ ފުރަތަމަ ހާފުގެ ކުޅުން ނިމިގެންދިޔައީ 2-0 ގެ ނަތިޖާއަކުން ބްރެޒިލް ކުރީގައި އޮވެގެންނެވެ.

އެގޮތުން މެޗުގެ ފުރަތަމަ ލަނޑު ފުރަތަމަ ހާފުގެ 28 ވަނަ މިނެޓުގައި ޗެލްސީގެ ހުނަރުވެރި ފޯވާޑް އެސްޓެވާއޯ ކާމިޔާބުކުރިއިރު، ބްރެޒިލް އިން ލީޑު ފުޅާކުރި ލަނޑު މެޗުގެ 42 ވަނަ މިނެޓުގައި ކާމިޔާބުކޮށްދިނީ ފްލެމެންގޯގެ ފޯވާޑް ޕެޑްރޯ އެވެ.

ބްރެޒިލްގެ ތިންވަނަ ލަނޑު ދެވަނަ ހާފުގެ 58 ވަނަ މިނެޓުގައި ކާމިޔާބުކޮށްދިނީ ދެވަނަ ހާފުގައި ވިނީޝިއަސް ޖޫނިއަރގެ ބަދަލުގައި ކުޅެން ނިކުތް ސެމުއެލް ލިނޯ އެވެ. އަދި މެޗުގެ އިތުރު ވަގުތުގެ ތެރޭގައި ބްރެޒިލްގެ ހަތަރު ވަނަ ލަނޑު ވެސް ކާމިޔާބުކޮށްދިނީ ދެވަނަ ހާފުގައި ކުޅެން ނުކުމެ މޮޅު ކުޅުމެއް ދެއްކި ސެމުއެލް ލިނޯ އެވެ.

މިމެޗުގައި ބްރެޒިލްގެ ފަރާތުން އާދަޔާ އާދައިގެ ކުޅުމެއް ފެނިގެންދިޔައިރު، އިންޑިޔާ އިން ފެންވަރުގެ ގޮތުން އެތައް ގުނައެއް ތަފާތުބޮޑު ބްރެޒިލް އާއި ރަނގަޅު ކުޅުމެއް ދައްކައިދީފައެވެ.