ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން ކޯޕަރޭޓް ދާއިރާ އިސްލާހުކުރުމަށް ކަނޑައަޅުއްވާފައިވާ ސިޔާސަތުގެ ދަށުން އައްޑޫ ސިޓީ އަދި ފުވައްމުލައް ސިޓީގެ ފެނާއި ނަރުދަމާގެ ހިދުމަތާއި ވޯޓާ ސުވަރޭޖް ކޮމްޕެނީ (އެމްޑަބްލިޔުއެސްސީ) އިން ހަވާލުވެ، އޮޕަރޭޝަނަލް ހިދުމަތްތައް ފަށައިފި އެވެ.

އެމްޑަބްލިޔުއެސްސީގެ މެނޭޖިންގް ޑިރެކްޓަރު ހުސައިން ފަހުމީ އެކްސްގައި ކުރެއްވި ޕޯސްޓެއްގައި ވިދާޅުވީ ފުވައްމުލައް ސިޓީ އަދި އައްޑޫ ސިޓީގެ ހުޅުދޫ އަދި މީދޫ ހިމެނޭހެން މި ހިދުމަތާއި އެމްޑަބްލިޔުއެސްސީން ރަސްމީކޮށް ހަވާލުވެފައިވަނީ މި މަހުގެ 1 ވީ ބުރާސްފަތި ދުވަހު ކަމަށެވެ.މި ބަދަލާއި ގުޅިގެން އެމްޑަބްލިޔުއެސްސީ އާއި ފެނަކަ ކޯޕަރޭޝަނާ ދެމެދު ފްރޭމްވޯކް އެއްބަސްވުމެއް އެކުލަވާލައި ސޮއިކުރެވިފައިވާއިރު، އެ ދެ ސިޓީގެ ފެނާއި ނަރުދަމައާއި ގުޅުންހުރި އެންމެހައި އިންފްރާސްޓްރަކްޗަރާއި ވަސީލަތްތައް ބަދަލުކުރުމުގެ މަސައްކަތް މިހާރު ފުރިހަމަކުރެވިފައިވާކަމަށް ފަހުމީ ފާހަގަކުރި އެވެ.މީގެއިތުރުން ފަހުމީ ވިދާޅުވި މި ނިޒާމުތައް އިތުރަށް ހަރުދަނާކޮށް، ރައްޔިތުންނަށް މެދުކެނޑުމެއްނެތި، އިތުބާރުހުރި އަދި ފެންވަރު ރަނގަޅު ހިދުމަތެއް ކަށަވަރުކޮށްދިނުމުގެ ގޮތުން ހެދިފައިވާ ފަންނީ އެސެސްމަންޓްތަކަށް ބިނާކޮށް، ދެ ސިޓީގެ ހިދުމަތުގެ ފެންވަރު މަތިކުރުމަށާއި (އަޕްގްރޭޑްކުރުމަށާއި)، އޮޕަރޭޝަނަލް ހިންގުން ހަރުދަނާކުރުމުގެ އަމަލީ މަސައްކަތްތައް މިހާރު ކުރަމުންދާ ކަމަށެވެ.