އަމީނީ މަގު އަލުން މަރާމާތުކުރުމުގެ މަޝްރޫއުގެ ދަށުން ދެވަނަ ސެގްމެންޓް ތަރައްގީކުރުމަށް އިއްޒުއްދީންމަގުން ފެށިގެން ކޯރުކެނޑިހިނގުމާއި ހަމައަށް މިރޭ 12:00 އިން ފެށިގެން ބަންދުކުރާނެކަމަށް ފުލުހުން ބުނެފި އެވެ.

ފުލުހުން ބުނީ އަމީނީމަގު މަރާމާތުކުރުމުގެ މަސައްކަތުގެ ދެވަނަ ސެގްމަންޓް 2026 އޮކްޓޫބަރު 4 ވަނަ ދުވަހު ފެށުމަށް ހަމަޖެހިފައިވާތީ، 2026 އޮކްޓޫބަރު 3 ވަނަ ދުވަހުގެ ރޭ 00:00 އިން ފެށިގެން، އެ ސަރަހައްދުގެ ޓްރެފިކް ފްލޯއަށް ޗާޓުގައިވާ ގޮތަށް ބަދަލު ގެނެސް، އާންމު ދަތުރުފަތުރަށް ބަންދުކުރެވޭނެކަމަށެވެ.

މި ސަރަހައްދުގައި ޕާކުކޮށްފައިވާ އުޅަނދުތައް، މިރޭ 12:00 ގެ ކުރިން އެ ސަރަހައްދުން ނެގުމަށް ފުލުހުން ވަނީ އަންގާފަ އެވެ.މިބަދަލާއި ގުޅިގެން ރައްޔިތުންނަށް ދިމާވެދާނެ ދަތިތަކަށް ފުލުހުން މާފަށް އެދިފައިވެ އެވެ. އަދި މިފަދަ ކަންކަމުގައި ރައްޔިތުންގެ ފަރާތުން ލިބޭ އެއްބާރުލުން ފާހަގަކޮށް ފުލުހުން ވަނީ ޝުކުރުދަންނަވާފަ އެވެ.

މި ސަރަޙައްދު މީގެކުރިން އަވަހަށް ހަލާކުވާން ދިމާވި މައިގަނޑު ސަބަބަކީ ބޮޑެތި ބަސްތަކާއި ހެވީ ވެހިކަލްތައް ގިނައިން ދުއްވާ ސަރަޙައްދަކަށް ވުމުގެ އިތުރުން، ކުރިން ތާރު އެޅުމަށްފަހު ރަނގަޅަށް ހިކުމުގެ ކުރިން އާންމު ދަތުރުފަތުރަށް ހުޅުވާލުމެވެ. ނަމަވެސް މިފަހަރު މަސައްކަތް ކުރިއަށްގެންދަނީ މަގުގެ ކޮލިޓީ އެންމެ މަތީ ދަރަޖައިގައި ހިފެހެއްޓޭނެ ގޮތަށް ބަލައިގެންނެވެ.

އެމްޓީސީސީން އަމާޒު ހިފާފައިވަނީ އަންނަ ނޮވެމްބަރު މަހުގެ ތެރޭގައި އަމީނީ މަގުގެ މަރާމާތު އެއްކޮށް ނިންމާލުމަށެވެ. މީގެއިތުރުން، ބޮޑުތަކުރުފާނު މަގުގައި ކުރިން ތާރުއަޅާފައިވާ ސަރަޙައްދުތަކުން ހަލާކުވެފައިވާ ބައިތައް މަރާމާތުކުރުމަށްވެސް ވަނީ ހަމަޖެހިފަ އެވެ.