ޔުއެފާ ނޭޝަންސް ލީގު ގުރޫޕް އެކެއްގައި ރޭ ރަށުން ބޭރުގައި ފްރާންސް އާއި ދެކޮޅަށް އިޓާލީ އިން ކުޅުނު މެޗު، ވާދަވެރި ކުޅުމަކަށްފަހު 1-1 ގެ ނަތީޖާއަކުން ދެޓީމު އެއްވަރުވެެއްޖެއެވެ.

ނޭޝަންސް ލީގުގައި ފްރާންސް އެންމެ ފަހުން ކުޅުނު މެޗުގައި މިވަގުތު ރަނގަޅު ފޯމެއްގައި އޮތް ބެލްޖިއަމް އަތުން 1-0 ގެ ނަތީޖާއަކުން މޮޅުވެފައިވާއިރު، އިޓަލީ އެންމެ ފަހުން ކުޅުނު މެޗުގައި އެޓީމުން ވަނީ ތުރުކީ 4-1 ގެ ނަތިޖާއަކުން ބަލިކޮށްފައެވެ.

މެޗުގެ ފުރަތަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، މިހާފުގައި ދެޓީމުން ވެސް ވަނީ ލަނޑުޖަހާނެ ރަނގަޅު ފުރުސަތުތަކެއް ތަނަވަސްކޮށްފައެވެ. ނަމަވެސް ފުރަތަމަ ހާފުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް ލަނޑެއް ކާމިޔާބު ނުކުރެވި 0-0 ގެ ނަތިޖާއަކުން ދެޓީމު އެއްވަރުވެފައި އޮވެގެންނެވެ.

މެޗުގެ ދެވަނަ ހާފުގައި ވެސް ދެޓީމުގެ ފަރާތުން ފޯރިގަދަ ކުޅުމެއް ފެނިގެންދިޔައިރު، މިމެޗުގައި ފުރަތަމަ ލަނޑުޖަހައި ކުރިހޯދީ ފްރާންސް އިންނެވެ. މިލަނޑު ދެވަނަ ހާފުގެ 55 ވަނަ މިނެޓުގައި ކާމިޔާބުކޮށްދިނީ މައިކަލް އޮލީސޭ އެވެ.

އިޓަލީ އިން ނަތީޖާ އެއްވަރުކުރި ލަނޑު މެޗުގެ 68 ވަނަ މިނެޓުގައި ކާމިޔާބުކޮށްދިނީ ޑިފެންޑަރު އަލްސަންޑްރޯ ބަސްޓޯނީ އެވެ. އަދި މެޗުގެ 85 ވަނަ މިނެޓުގައި ފްރާންސްގެ ޑިފެންޑަރު ޑަޔޮޓް އަޕަމަކާނޯއަށް ދެއްކި ރަތް ކާޑާއެކު މެޗުގެ ބާކީބައި ފްރާންސް އިން ފުރިހަމަކުރީ 10 ކުޅުންތެރިންނާއެކުގައެވެ.

މިނަތީޖާއެކު ގުރޫޕް ސްޓޭޖުގައި ކުޅުނު ތިން މެޗުން ހޯދި ހަތް ޕޮއިންޓާއެކު ފްރާންސް ގުރޫޕް އެކެއްގެ އެއްވަނައިގައި އޮތްއިރު، ތިން މެޗުން ހޯދި ހަތަރު ޕޮއިންޓާއެކު އިޓަލީ މިވަގުތު އޮތީ ގުރޫޕް އެކެއްގެ ތިންވަނައިގައެވެ.

މިމުބާރާތުގައި އިޓަލީއަށް ކުރިއަށް އޮތީ މިމަހުގެ ފަސްވަނަ ދުވަހު ތުރުކީ އާއި ދެކޮޅަށް އަމިއްލަ ދަނޑުގައި ކުޅޭ މެޗެވެ. އަދި ހަމަ އެދުވަހު އަމިއްލަ ދަނޑުގައި ފްރާންސް ނުކުންނާނީ ބެލްޖިއަމް އާއި ދެކޮޅަށެވެ.