ކާލާ މަންނަ އެކަޑަމީން އިންތިޒާމްކޮށްގެން ބާއްވާ "ފިޔަވަން ޗެރަޓީ ފެމެލީ ފެސްޓިވަލް" މިއަންނަ ހުކުރު ދުވަހު ބާއްވަން ނިންމައިފި އެވެ.

މި އަންނަ ހުކުރު ދުވަހު މި ފެސްޓިވަލް މާލެ ސިޓީ ހޯލުގައި ބާއްވާއިރު، މި ފެސްޓިވަލްގައި މައިގަނޑު ހަރަކާތްތަކުގެ ތެރޭގައި ހަވީރު ކުޑަކުދިންނަށް ހާއްސަ، މަޖާ ކުޅިވަރުތަކާއި ހަރަކާތްތަކުގެ އިތުރުން ރޭގަނޑު މިއުޒިކް ޝޯއެއް ހިމެނެ އެވެ.

ކާލާ މަންނަ އެކަޑަމީން ބުނީ މި ހަރަކާތުގެ މައިގަނޑު މަގްސަދަކީ ހާއްސަ އެހީއަށް ބޭނުންވާ ކުދިންނަށް އެހީތެރިވުމަށް ފައިސާ ހޯދުން ކަމަށެވެ.

ފެސްޓިވަލް ޓިކެޓް ވިއްކަން ވަނީ ފަށާފަ އެވެ. އެގޮތުން 9891419 ނުވަތަ 7779929 އަށް ގުޅައިގެން ބުކްކުރުމަށް ވަނީ ހުޅުވާލާފަ އެވެ.

އެ ޝޯގައި ރާއްޖޭގެ މަޝްހޫރު ފަންނާނުން ކަމަށްވާ އަހްމަދު އިބްރާހިމް (އައްމަޑޭ)، އަލީ އިއުފާފް އިސްމާއިލް، އަބްދުﷲ އީސާ ފުޅު (އީސަ)، ޑީޖޭ އެފްރޯ އަދި ފަސީ ލައިވްގެ ހުށަހެޅުންތައް ފެންނާނެ އެވެ. މި ފެސްޓިވަލްގެ "ފަން ޒޯން ޕާޓްނަރު" އަކީ އެޑްވެންޗާ އެޕް އެވެ. އަދި ޓެކްނިކަލް ޕްރޮޑަކްޝަން ޕާޓްނަރަކީ އިފެކްޓްސް އެންޓަޓެއިންމަންޓެވެ.

މި އިވެންޓްގެ ޕްރޮމޯޓް ހަރަކާތުގެ ގޮތުން ހާއްސަ ޕްރީ-ޝޯއެއް އިއްޔެ ސަލްޓަން ޕާކުގައި ބާއްވާފައިވެ އެވެ. އެގޮތުން އިއްޔެ ހަވީރު 16:00 އިން ފެށިގެން 18:00 އަށް ކުޑަކުދިންގެ ހަވީރެއް ބާއްވާފައިވާއިރު، ރޭގަނޑު 20:00 އިން ފެށިގެން 11:00 އާ ހަމައަށް ވަނީ މިއުޒިކް ޝޯއެއް ބާއްވާފަ އެވެ.