ޒުވާނުން ޒިންމާދާރުކުރުމަށް ކުރި މަސައްކަތް ބަލައިގަނެ، އެކަމުގެ ނަތީޖާ ފެންނަމުންދާ ކަމަށް ދިފާއީ އަދި ވަތަނީ ހިދުމަތާއިބެހޭ ވަޒީރު ހަސަން ރަޝީދު ވިދާޅުވެއްޖެ އެވެ.

ނޭޝަނަލް ސާވިސް ސްކިލް ޓްރޭނިންގް 2 ވަނަ ބެޗްގެ ދަސްވެނިވުމުގެ ރަސްމިއްޔާތު ޝަރަފްވެރިކޮށްދެއްވާ ދެއްކި ވާހަކަގައި ވިދާޅުވީ ޒުވާނުންނަކީ ހުލްގުހެޔޮ ޒިންމާދާރު ބަޔަކަށް ހެދުމަކީ ސަރުކާރުން ހާއްސަ އިސްކަމެއް ދީގެންކުރިއަށްގެންދާ މަޝްރޫއުއެއް ކަމަށެވެ.

އެގޮތުން މިދިޔަ އަހަރުގެ އޮކްޓޯބަރު 1 އިން ފެށިގެން ވަތަނީ ހިދުމަތަށް މިދިޔަ ބުރާސްފަތި ދުވަހު އަހަރެއް ފުރިފައިވާއިރު، މިކަމަށްޓަކައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ކަނޑައެޅި ލަނޑުދަނޑިއަށްވުރެ އިތުރަށް ހާސިލްވެފައިވާކަމަށް ވަޒީރު ވިދާޅުވި އެވެ. އެ އަމާޒަކީ ވަތަނީ ހިދުމަތުގެ ތެރެއިން 1 އަހަރު ތެރޭގައި 1000 ދަރިވަރުން ތަމްރީނުކުރުންކަށްވާއިރު މި މުއްދަތުގެ ތެރޭގައި 1028 ބައިވެރިން ތަމްރީންކޮށްފައިވާކަމަށް ވަޒީރު ވިދާޅުވި އެވެ.

"ޒުވާނުން އެކި މަގުމަގުން ނޭދެވޭ މަގުތަކުން ދިއުމަށް ބާރު އަޅާ ބަޔަކު އެބަވޭ. އެހެންނަމަވެސް މިއަދު އެކަންކަމުން ޒުވާނުން ސަލާމަތްކުރަން ރައީސް ކަނޑައެޅުއްވި ޕްރޮގްރާމަކީ ދިވެހިން ބަލައިގަންނަ ކަމެއް" ދިފާޢީ އަދި ވަޠަނީ ޚިދުމަތާބެހޭ ވަޒީރު ޙަސަން ރަޝީދު ވިދާޅުވި އެވެ.

މީގެއިތުރުން ވަޒީރު ވިދާޅުވީ ނޭޝަނަލް ސާވިސް ސްކިލް ޓްރެއިނިންގް ފުރިހަމަކުރާ ޒުވާނުންނަށް ދަސްވާ ކަންކަން ދިރިއުޅުމުގެ މާހައުލުގައިވެސް ބޭނުންކުރަންޖެހޭއިރު، ކޮންމެ ކަމެއްވެސް ކާމިޔާބު ވާނީ ހިތްވަރާއެކު މަސައްކަތްކޮށްގެންކަން ފާހަގަކުރައްވާފަ އެވެ. އަދި ކަންކަމާއި ކެރިގެން ކުރިމަތިލުމަށް އެ ޓްރެއިންގް ބައިވެރިންނަށް ނަސޭހަތްތެރިވެ ވަޑައިގަންނަވާފައިވާއިރު،ކޮންމެ ހާލަތެއްގައިވެސް ކެތްތެރިވާ ބަޔަކަށްވާން ދަސްކުރަންވެސް ޖެހޭނެކަމަށް ވަޒީރު ވިދާޅުވި އެވެ.