ދުބާއީން ފުރައިގެން އިޒްރޭލަށް މިދިޔަ ބުދަ ދުވަހު ދަތުރުކުރި ފްލައިދުބާއީގެ ފްލައިޓެއް ހައިޖެކްކޮށް، ޓެރަރިސްޓް ހަމަލާއެއް ދޭން އުޅުނު ކަމުގެ ތުހުމަތުކުރެވޭ އުމާންގެ ކޯ-ޕައިލެޓާ ގުޅުން އޮންނަ ކަމަށް ބެލެވޭ ދެ ދިވެއްސަކު ޔުނައިޓެޑް އަރަބް އެމިރޭޓްސް (ޔޫއޭއީ) ގައި ހައްޔަރުކޮށްފިއެވެ.

އިތުބާރު ހުރި މަސްދަރުތަކަކާއި ހަވާލާދީ މިކަން ދާދި ދެންމެ އަކު ރިޕޯޓުކުރީ ރާއްޖޭގެ "މިހާރު" ނޫހުންނެވެ.

އެގޮތުން މިހާރު ނޫހުން ރިޕޯޓުކޮށްފައިވާ ގޮތުގައި، ޔޫއޭއީން ހައްޔަރުކުރި މި ދެ ދިވެހިންނަކީ ބޯޓުގެ މައި ޕައިލެޓަށް "ކްރޭޝް ހެމާ" އިން ހަމަލާދިން އުމާންގެ ކޯ-ޕައިލެޓް ހައްމާމް އަލް ހަމާނީއާ އެއް އިމާރާތެއްގައި ދިރިއުޅެމުންދިޔަ ދެ މީހުންނެވެ.

އަދި އެ ދެ މީހުންނަކީވެސް ކޯ-ޕައިލެޓުންގެ ގޮތުގައި މަސައްކަތްކުރަމުން އަންނަ ބައެއް ކަންވެސް އެނޫހުން ވަނީ ކަށަވަރުކޮށްދީފައި އެވެ.

މި ހާދިސާއާ އެ ދެ ދިވެހިންނާ ގުޅުން އޮތީ ކޮން މިންވަރަކަށް ކަމެއް އަދި އެ މީހުން ހައްޔަރުކުރި ސީދާ ސަބަބެއް މިހާތަނަށް ސާފުވާ ގޮތެއް ނުވެއެވެ. އަދި މި މައްސަލައާ ގުޅޭގޮތުން ރަސްމީ އެއްވެސް އިދާރާއަކުން މިހާތަނަށް ވަކި އެއްޗެއް ހާމަކޮށްފައެއް ނުވެއެވެ.

އިޒްރޭލުގެ ގިނަ އަދަދެއްގެ ޔަހޫދީން ހިމެނޭހެން 182 ފަސިންޖަރުންނާއެކު ދަތުރުކުރި އެ ފްލައިޓުގެ ޕައިލެޓަށް ހަމަލާދީ ޒަޚަމްކޮށްލާފައި ވަނިކޮށް، ޕައިލެޓް ކޮކްޕިޓުގެ ދޮރު ހުޅުވުމުން ކްރޫންނާއި ދަތުރުވެރިން ވަނީ ކޮކްޕިޓަށް ވަދެ ހަމަލާދިން ކޯ-ޕައިލެޓް ހިފަހައްޓާފައެވެ. އަދި ބޯޓު ވަނީ ސައުދީއަށް ޖައްސާފައި އެވެ.