ށ.ޅައިމަގުގައި ސިއްހީ މަރުކަޒުގައި ލެބޯޓަރީގެ ހިދުމަތް ފަށައިފި އެވެ.

ޅައިމަގުގައި މި ހިދުމަތް ފައްޓަވައިދެއްވީ ސިއްހަތާއި އާއިލާއާއި އިޖްތިމާއީ އެހީއާއި ބެހޭ ވަޒީރު ޤީލާ އަލީ އެވެ.

ޅައިމަގުގައި ސިއްހީ މަރުކަޒުގައި ލެބޯޓަރީގެ ހިދުމަތް ފެށުމަށް މިއަދު އެރަށުގައި ބޭއްވި ހާއްސަ ރަސްމިއްޔާތުގައި ވަޒީރު ޤީލާގެ އިތުރުން ސިއްހީ ވުޒާރާގެ އިސްވެރިންނާއި، ޅައިމަގުގެ ކައުންސިލްގެ އިސްވެރިންނާއި، ސިއްޙީ މަރުކަޒުގެ އިސްވެރިން ބައިވެރިވެ ވަޑައިގެންނެވި އެވެ.

މިއީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިދިޔަ އަހަރު ޅައިމަގަށް ވަޑައިގަންނަވާ އެރަށު ރައްޔިތުންނާއި ބައްދަލުކުރައްވާ ބޭއްވި ބައްދަލުވުމުގައި ސިއްހީ ހިދުމަތް އިތުރަށް ފުޅާކޮށްދެއްވުމަށްވީ ވައުދުފުޅުގެ ދަށުން ނިންމާފައިވާ މަޝްރޫއުއެކެވެ.

ރައީސްގެ ވާހަކަފުޅުގައި ސިއްހީ މަރުކަޒުގެ އާ އިމާރާތް ކުރާއިރު ހިދުމަތް 16 ގަޑިއިރަށް ބަދަލުކުރާނެކަމާއި، އާ އިމާރަތް ތަރައްގީ ކުރަނީ 4 އެނދާއި ލެބޯޓަރީ އެހެނިހެން ވަސީލަތްތައް ހިމަނައިގެންކަމަށް ފާހަގަކޮށްފައިވެ އެވެ.

ރާއްޖޭގެ މީހުން ދިރިއުޅޭ ހުރިހާ ރަށެއްގައި ލެބޯޓަރީގެ ހިދުމަތް ގާއިމްކޮށްދިނުމަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ރިޔާސީ ވައުދުފުޅެކެވެ.