އެމްޑީޕީގެ ރައީސްގެ މަގާމު އުވާލާ، ހުރިހާ ބާރެއް ޗެއަރޕާސަން އަށް ދިނުމަށް ފާސްކޮށްފިއެވެ.

މިގޮތަށް ފާސްކުރީ މިހާރުކުރިއަށްދާ އެ ޕާޓީގެ ކޮންގްރެސްގައެވެ.

މި ކޮންގްރެސްގައި އެމްޑީޕީގެ ލީޑަރޝިޕްގެ އޮނިގަނޑަށް ބޮޑެތި ބަދަލުތަކެއް ގެނެސް، އެ ޕާޓީގެ ރައީސް އަދި ނައިބު ރައީސްގެ މަޤާމު އުވާލައި، އެންމެ އިސް ފަރާތަކީ ޗެއަރޕާސަން ކަމުގައި ކަނޑައެޅުމަށް އަސާސީ ޤަވާޢިދަށް އިސްލާހު ހުށަހެޅުއްވީ ކުރީގެ ޗެއަރޕާސަން ފައްޔާޒް އިސްމާޢީލްއެވެ. ފައްޔާޒު ހުށަހެޅުއްވި މި ބަދަލުތައް ފާސްވީ ކޮންގްރެސްގެ 546 މަންދޫބުންގެ އަޣުލަބިއްޔަތުންނެވެ.

މި އިޞްލާޙުތަކުގެ ދަށުން ޗެއަރޕާސަނަށް އެހެން އެއްވެސް މަޤާމެއް އަދާނުކުރެވޭ ގޮތަށް ހަމަޖައްސައި، ސިޔާސީ ކަންކަމަށް ޚާއްޞަ އައު ނައިބު ޗެއަރޕާސަނެއްގެ މަޤާމު ވަނީ އުފައްދާފައެވެ. އަދި ޕާޓީގެ ޓިކެޓުގައި ވެރިކަމަށް ހޮވޭ ރައީސުލްޖުމްހޫރިއްޔާއަކު ސަރުކާރު އެކުލަވާލުމާއި މުހިންމު ސިޔާސަތުތައް ތަންފީޒުކުރުމުގައި ޤައުމީ މަޖިލީހުގެ މަޝްވަރާ ހޯދަން އެއްބަސްވުމެއްގައި ސޮއިކުރުން ލާޒިމުކުރުމައި ރައީސުލްޖުމްހޫރިއްޔާގެ އިސް މުޝީރަކަށް ޗެއަރޕާސަން ހަމަޖެއްސުމަށް ވެސް ފާސްކޮށްފައި ވެއެވެ.

މީގެ އިތުރުން، ޕީޖީ ލީޑަރު އިބްރާހިމް ނާޒިލް އާއި ކުޑަހުވަދޫ ދާއިރާގެ ރައީސް ޝާތިރު ޢަބްދުއްރަޙްމާން ހުށަހަޅުއްވާފައިވާ އިޞްލާޙުތައް ވެސް ކޮންގްރެސްއިން ވަނީ ފާސްކޮށްފައެވެ. އޭގެ ތެރޭގައި އެތެރޭގެ އިންތިޚާބުތަކަށް 4 މަސްދުވަސް ކުރިން އިޢުލާނުކުރުމާއި، ވޯޓުލާ ދުވަހުގެ 3 މަސްކުރިން ޕާޓީގައި ރަޖިސްޓްރީވާ މެންބަރުންނަށް ވޯޓުލުމުގެ ޙައްޤު ދިނުން ހިމެނެއެވެ.

މީގެއިތުރުން ޤައުމީ މަޖިލީހުގައި ކޮންމެ ރަށަކުން އެއް މެންބަރަކު ތަމްސީލުކުރުމުގެ އުޞޫލު ދެމެހެއްޓުމަށާއި، ކޮންގްރެސްގެ ބައިވެރިންގެ ލިސްޓު 10 ދުވަސްކުރިން އިޢުލާނުކުރުން ވެސް ވަނީ ފާސްކޮށްފައެވެ.