ބޮލީވުޑްގެ މަޝްހޫރު ތަރި އަދި ރީތީގެ ރާނީ އައިޝްވާރްޔާ ރާއީ ބައްޗަން ދާދި ފަހުން ޕެރިސް ފެޝަން ވީކްގައި ބައިވެރިވެ ރޭމްޕް މަތީގައި ހިނގާލުމާ ގުޅިގެން، ސޯޝަލް މީޑިއާގައި ބައެއް މީހުން އޭނާގެ ހަށިގަނޑަށް ފާޑުކިޔައި މަލާމާތްކުރަން ފަށައިފިއެވެ.

ލޯރިއަލް ޕެރިސްގެ ގްލޯބަލް އެމްބެސެޑަރެއްގެ ގޮތުގައި އައިޝްވާރްޔާ މި އިވެންޓުގައި ބައިވެރިވުމުން ގިނަ ފޭނުން ވަނީ އޭނާގެ ރީތިކަމަށް ވަރަށް ބޮޑަށް ތައުރީފުކޮށްފައެވެ. ނަމަވެސް، ވަކި ބަޔަކު ވަނީ އޭނާގެ ބަރުދަނަށާއި ލައިގެން ހުރި ހެދުމަށް ވަރަށް ހުތުރުކޮށް ފާޑުކިޔާފައެވެ.

މިއާއެކު ސޯޝަލް މީޑިއާގައި މިކަމާ ގުޅޭ ބޮޑު ބަހުސެއް ވަނީ ފެށިފައެވެ.

އައިޝްވާރްޔާއަށް މަލާމާތްކުރި މީހުންނަށް ރައްދުދީ، އޭނާގެ އެތައް ހާސް ފޭނުންނެއް ދަނީ އޭނާގެ ދިފާއުގައި ވާހަކަދައްކަމުންނެވެ.

ފޭނުން ބުނަމުންދަނީ ވިހެއުމަށްފަހުގައްޔާއި އުމުރާ ގުޅޭގޮތުން އަންހެނުންގެ ހަށިގަނޑަށް އަންނަ ބަދަލުތަކަކީ ތަބީއީ ކަމެއް ކަމަށާއި، އައިޝްވާރްޔާއަކީ އަބަދުވެސް ރީތި ނަމޫނާއެއް ކަމަށެވެ.

އަދި އަންހެން ތަރިންނާމެދު މުޖުތަމައުން ގެންގުޅޭ ހަރުކަށި މިންގަނޑުތަކާމެދު ގިނަ ބަޔަކު ދަނީ ނުރުހުން ފާޅުކުރަމުންނެވެ.