ސްކޫލު ގަޑިތަކުގައި ދަރިވަރުންނަށް އަމާން އަދި ރައްކާތެރި މާޙައުލެއް ޤާއިމުކޮށްދިނުމަށާއި މަގުމަތީގެ ޓްރެފިކް ތަރުތީބުކުރުމަށް ބާރުއެޅުމުގެ ގޮތުން، ރެހެންދި ސްކޫލުގެ ގޭޓު ސަރަޙައްދުގައި ޕާކުކުރުން މަނާކަން އަންގައިދޭ ޚާއްޞަ ބޯޑެއް ބަހައްޓައި މިއަދު އިފްތިތާޙުކޮށްފިއެވެ.

ހުޅުމާލެ ޓްރެފިކް ޑިޕާޓްމަންޓުން އިސްނަގައިގެން ކުރިއަށްގެންދިޔަ މި ޙަރަކާތުގެ ދަށުން ބެހެއްޓި ބޯޑު ރަސްމީކޮށް އިފްތިތާޙުކޮށްދެއްވީ ހުޅުމާލެ ޕޮލިސްގެ ހެޑް، އެސިސްޓެންޓް ކޮމިޝަނަރ އޮފް ޕޮލިސް އާޞިމް ޢަބްދުﷲ އަދި ރެހެންދި ސްކޫލުގެ ޕްރިންސިޕަލް ނާޒިމް ޢަބްދުﷲ އެވެ. މި ބޯޑު ޚާއްޞަވަނީ މަގުމަތީގެ ރައްކާތެރިކަމާ ގުޅޭގޮތުން ދަރިވަރުން އަމިއްލައަށް ދީފައިވާ މުހިންމު އިރުޝާދުތަކާއި މެސެޖުތައް ހިމަނައިގެން ފަރުމާކޮށްފައިވާތީއެވެ.

މިފަދަ ބޯޑެއް ބެހެއްޓުމުގެ މައިގަނޑު މަޤްޞަދަކީ ދަރިވަރުން ސްކޫލަށް ގެންނަ ވަގުތުތަކުގައާއި ސްކޫލު ނިމިގެން ބަލައި އަންނަ ގަޑިތަކުގައި، ސްކޫލުގެ ގޭޓުތައް ކުރިމައްޗަށް ވާގޮތަށް ބެލެނިވެރިން އުޅަނދުފަހަރު ޕާކުކުރުމުގެ ސަބަބުން ދަރިވަރުންނަށް ކުރިމަތިވާ ދަތިތަކަށާއި ނުރައްކާތަކަށް ދާއިމީ ޙައްލެއް ހޯދައިދިނުމެވެ. އަދި ސްކޫލު ސަރަޙައްދުގެ މަގުތައް ތޮއްޖެހުނަނުދީ، ދަރިވަރުންނަށާއި ހިނގާބިނގާވެ އުޅޭ ފަރާތްތަކަށް ފަސޭހަކަމާއެކު ހަރަކާތްތެރިވެވޭނެ އިންތިޒާމު ހަމަޖެއްސުމެވެ.

މި ޙަރަކާތުގައި ހުޅުމާލެ ޕޮލިސްގެ ސީނިއަރ އޮފިސަރުންނާއި، ޓްރެފިކް ޑިޕާޓްމަންޓުގެ އިސްވެރިންގެ އިތުރުން ރެހެންދި ސްކޫލުގެ ޑެޕިއުޓީ ޕްރިންސިޕަލުންނާއި، ޓީޗަރުން، ބެލެނިވެރިން އަދި ގިނަ ޢަދަދެއްގެ ދަރިވަރުން ބައިވެރިވިއެވެ.

ހުޅުމާލޭގެ މަގުތަކަކީ ހިނގާ މީހުންނަށާއި ދުއްވާ އުޅަނދުފަހަރަށް އަމާން، ރައްކާތެރި ތަނަކަށް ހެދުމަށާއި ނުރައްކާތެރި އެކްސިޑެންޓްތައް މަދުކުރުމަށްޓަކައި، ޢާންމުން ހޭލުންތެރިކުރުވުމަށާއި މަގުމަތީގެ އަޚްލާޤު ރަނގަޅުކުރުމަށް ހުޅުމާލެ ޓްރެފިކް ޕޮލިހުން އަންނަނީ މެދުކެނޑުމެއްނެތި ގިނަ މަސައްކަތްތަކެއް ކުރަމުންނެވެ.