ފުލުހުންގެ ވަޒީފާގެ ވާޖިބު އަދާކުރަމުންދަނިކޮށް ނިޔާވާ ފުލުހުންގެ އާއިލާތަކަށް ފުލުހުންގެ ހިދުމަތުން ބޭސްފަރުވާދޭގޮތަށް ފުލުހުންގެ ވަޒީފާގެ ޤަވައިދު އިސްލާހުކޮށްފި އެވެ.

ފުލުހުންގެ ވަޒީފާގެ ޤަވާއިދަށް ގެނައި އިސްލާހުގެ ތެރޭގައި ހިމެނެނީ ވާޖިބު އަދާކުރަމުންދަނިކޮށް ނިޔާވާ ފުލުހުންގެ ޖަނާޒާ ވަކި ރަސްމިއްޔާތެއްގެ ގޮތުގައި ބޭއްވުމަށް ނިންމިދާނެކަމެވެ.

ނަމަވެސް މި ނިންމުން ނިންމާނީ ފުލުހުންގެ އޮފިސަރު ނިޔާވި ހާލަތާއި ދިމާވި ހާދިސާގައިކަން ހިނގި ގޮތާއި މުވައްޒަފު އަދާކުރި ދައުރަށް ބަލައި އެގްޒެކެޓިވް މެނޭޖްމަންޓް ބޯޑަށް ހުށަހަޅައި އެ ބޯޑުން ނިންމާގޮތުގެ މަތިން ކަމަށްވެސް އިސްލާހުގައިވެ އެވެ.

މީގެއިތުރުން ފުލުހުންގެ 93 ވަނަ އަހަރީ ދުވަހުގެ މުނާސަބަތުގައި ބޭއްވި ހަފްލާގައި ކޮމިޝަނާ އޮފް ޕޮލިސް އަހުމަދު މުހައްމަދު ވިދާޅުވެފައިވަނީ ޝަރަފުވެރިކަމާއެކު އެއްކޮށް ރިޓަޔާކުރާ ފުލުހުންގެ އިނާޔަތްތައް ހިސާބު ކުރުމުގައި އޮތް ލިމިޓަށް ބަދަލެއް ގެނައުމަށް ނިންމާފައިވާކަމަށެވެ. އެގޮތުން އެ ފުލުހަކު ހިދުމަތްކޮށްފައިވާ މުއްދަތަކަށް ބަލައި ލިބޭ އިނާއަތް ހަމަޖައްސައިދެއްވާނެކަމަށްވެސް ކޮމިޝަނާ ފާހަގަކޮށްފައިވެ އެވެ.

ކޮމިޝަނާ އޮފް ޕޮލިސް އަހުމަދު މުހައްމަދު ވިދާޅުވެފައިވަނީ ފުލުހެކޭ އެއްގޮތަށް ބޭސްފަރުވާގެ ކަންކަން 25 އަހަރަށްފަހު ރިޓަޔާކުރާ ފުލުހުންނަށް ހަމަޖައްސައިދިނުމަށް ނިންމާފައިވާކަމަށެވެ.