ފުލުހުންގެ ބެލުމުގެ ދަށުގައި ހުރި ގިނަ އަދަދެއްގެ ސިނގިރޭޓާއި ދުންފަތް، ކ. ދޫނިދޫގައި ރަސްމީކޮށް ނައްތާލައިފިއެވެ.

މި ސެޕްޓެމްބަރު މަހުގެ 28 ވަނަ ދުވަހު ދޫނިދޫގައި ނައްތާލި މި ތަކެއްޗަކީ، ހެންވޭރު ގެއެއްގެ އެޕާޓްމަންޓެއްގައި ހިންގަމުންދިޔަ އޮފީހެއްގައި ޤާނޫނާ ޚިލާފަށް މެޝިން ބަހައްޓައިގެން ސިނގިރޭޓް އުފައްދާ ކަމަށް ތުހުމަތުކުރެވުނު މައްސަލައަކާ ގުޅިގެން ފުލުހުން ހިންގި ޚާއްޞަ އޮޕަރޭޝަނެއްގައި އަތުލައިގަތް ތަކެއްޗެވެ. މި އޮޕަރޭޝަން ހިންގާފައިވަނީ 2025 ވަނަ އަހަރުގެ ޖަނަވަރީ މަހުގެ 30 ވަނަ ދުވަހުއެވެ.

ނައްތާލި ތަކެތީގެ ތަފްޞީލަށް ބަލާއިރު، އޭގެ ތެރޭގައި ޖުމްލަ 4,285 ސިނގިރޭޓް ކާޓޫނާއި، 232 ފޮށި ސިނގިރޭޓުގެ އިތުރުން 93.60 ކިލޯގެ ރޯ ދުންފަތް ހިމެނެއެވެ.

ފުލުހުން މަޢުލޫމާތު ދެއްވި ގޮތުގައި، މި ތަކެތި ނައްތާލާފައިވަނީ ފުލުހުންގެ ބެލުމުގެ ދަށަށް ގެނެވޭ މިފަދަ ހެކިތަކާއި ތަކެތި ނައްތާލުމުގައި ޢަމަލުކުރުމަށް ކަނޑައެޅިފައިވާ ޚާއްޞަ އުޞޫލުތަކާ އެއްގޮތްވާ ގޮތުގެ މަތިން، އެކަމަށްޓަކައި އެކުލަވާލާފައިވާ ޚާއްޞަ ކޮމިޓީގެ ސީދާ ބެލުމުގެ ދަށުންނެވެ.