މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) ގެ ޑިރެކްޓަރުންގެ ބޯޑުގެ އެގްޒެކްޓިވް ޑިރެކްޓަރުގެ މަޤާމުގައި ހުންނެވި، ހ. ފިނޮޅު، މުޙައްމަދު މިހާދު އަދި ބޯޑުގެ މެންބަރު، މ. ވެލާލުގެ، ސަޙަރު ވަޙީދު އެ ކުންފުނީގެ ބޯޑުން ވަކިކޮށްފިއެވެ.

ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން ނިންމާފައިވަނީ، 2026 އޮކްޓޫބަރު މަހުގެ 1 ވަނަ ދުވަހުން ފެށިގެން މި ދެ ބޭފުޅުން އެމްއޭސީއެލްގެ ޑިރެކްޓަރުންގެ ބޯޑުން ވަކިކުރުމަށެވެ.

އެމްއޭސީއެލްގެ ބޯޑަށް 2025 އެޕްރީލް 26 ގައި ޢައްޔަންކުރެއްވި މުޙައްމަދު މިހާދަކީ 2024 ޖަނަވަރީ މަހުން ފެށިގެން އެ ކުންފުނީގެ ޗީފް ކޮމާޝަލް އޮފިސަރު (ސީސީއޯ) ގެ މަޤާމުވެސް ފުރުއްވަމުން ގެންދަވާ ބޭފުޅެކެވެ. އިނގިރޭސިވިލާތުގެ އޮކްސްފޯޑް ބްރޫކްސް ޔުނިވަރސިޓީން އެޕްލައިޑް އެކައުންޓިންގގެ ދާއިރާއިން ފުރަތަމަ ޑިގްރީ ޙާޞިލުކުރައްވާފައިވާ މިހާދަކީ ޗާޓަރޑް މެނޭޖްމަންޓް އެކައުންޓަންޓެކެވެ. މީގެކުރިން އޭނާ ވަނީ އެސްޓީއޯގެ ޗީފް ފައިނޭންޝަލް އޮފިސަރު (ސީއެފްއޯ) ގެ މަޤާމާއި، އެސްޓީއޯގެ ބޯޑު ޑިރެކްޓަރުކަމާއި، މިފްކޯ އަދި އެމްއެސްއެސްގެ ބޯޑު މެންބަރުކަން ކުރައްވާފައެވެ. މީގެއިތުރުން އެފްއެސްއެމްގެ ޗެއާމަންކަމާއި، ކޭޕީއެމްޖީ މޯލްޑިވްސްގެ ޕާޓްނަރެއްގެ ގޮތުގައިވެސް އޭނާ ވަނީ ޚިދުމަތް ކުރައްވާފައެވެ.

އެމްއޭސީއެލްގެ ބޯޑުން ވަކިކުރެއްވި ސަޙަރު ވަޙީދަކީ 2023 ޑިސެމްބަރު 24 ގައި އެ ބޯޑަށް ޢައްޔަންކުރެވުނު ބޭފުޅެކެވެ. އޭނާއަކީ ލަންޑަން ސްކޫލް އޮފް އިކޮނޮމިކްސްއިން އިކޮނޮމިކްސް އަދި އިކޮނޮމިކް ހިސްޓްރީގެ ދާއިރާއިން ފުރަތަމަ ޑިގްރީ އަދި ޔުނިވަރސިޓީ އޮފް ވެސްޓް އިންގްލެންޑުން ކޮމާޝަލް ލޯއިން މާސްޓަރސް ހާސިލުކުރައްވާފައިވާ ޗާޓަރޑް ބޭންކަރެކެވެ. މާލީ ދާއިރާގައި 17 އަހަރަށްވުރެ ގިނަ ދުވަހުގެ ތަޖުރިބާ ހުރި ސަޙަރު މިހާރު ހުންނެވީ އެމްއޭސީއެލްގެ ޑެޕިއުޓީ ސީއީއޯ އަދި ޗީފް އޮޕަރޭޝަންސް އޮފިސަރު (ސީއޯއޯ) ގެ މަޤާމުގައެވެ. މީގެއިތުރުން، އޭނާއަކީ ވިމެން އިން މެނޭޖްމަންޓާއި އައިއެފްސީން ދޭ ޝަރަފުވެރި އެވޯޑުތަކެއްވެސް ޙާޞިލުކުރައްވާފައިވާ ބޭފުޅެކެވެ.