ޝަންހާއީ ކޯޕަރޭޝަން އޯގަނައިޒޭޝަން (އެސްސީއޯ) ގެ މެންބަރު ޤައުމުތަކުގެ ޕްރޮސެކިއުޓަރ ޖެނެރަލުންގެ 24 ވަނަ ބައްދަލުވުމުގައި ބައިވެރިވެވަޑައިގަތުމަށް، ދިވެހިރާއްޖޭގެ ޕްރޮސެކިއުޓަރ ޖެނެރަލް ޖަސްޓިސް (ރިޓަޔަރޑް) ޢައްބާސް ޝަރީފް އަދި ޕީޖީ އޮފީހުގެ ވަފުދެއް ރަޝިއާގެ ކަޒާންއަށް ވަޑައިގެންފިއެވެ.

މި ބައްދަލުވުމުގެ ހަވާސާގައި، ޕްރޮސެކިއުޓަރ ޖެނެރަލް ޢައްބާސް ޝަރީފް ވަނީ ރަޝިއަން ފެޑެރޭޝަންގެ ޕްރޮސެކިއުޓަރ ޖެނެރަލް މިސްޓަރ އެލެކްސެންޑަރ ގުޓްސަންއާ ބައްދަލުކުރައްވައި ރަސްމީ މަޝްވަރާތަކެއް ބާއްވަވާފައެވެ.

މި މަޝްވަރާތަކަށްފަހު، ރާއްޖޭގެ ޕްރޮސެކިއުޓަރ ޖެނެރަލްގެ އޮފީހާއި ރަޝިއާގެ ޕްރޮސެކިއުޓަރ ޖެނެރަލްގެ އޮފީހާ ދެމެދު ވަނީ އެއްބާރުލުން ދިނުމުގެ މުހިންމު އެއްބަސްވުމެއްގައި (އެގްރީމަންޓް އޮން ކޯޕަރޭޝަން) ސޮއިކުރައްވާފައެވެ.

މި އެއްބަސްވުމުގެ ދަށުން ދެ ޤައުމުގެ ޕްރޮސެކިއުޝަންގެ ދާއިރާއިން ފަންނީ ދިރާސާތައް ކުރުމަށާއި، ތަމްރީނު ޕްރޮގްރާމްތައް ހިންގުމަށް ވަނީ މަގުފަހިވެފައެވެ. މީގެއިތުރުން، ދެ އޮފީހުގެ ދެމެދުގައި މަޢުލޫމާތާއި ތަޖުރިބާ ޙިއްޞާކުރުމާއި، ދެފަރާތުން އެއްބަސްވާ މުހިންމު ދާއިރާތަކުން ގުޅިގެން މަސައްކަތްކުރުމަށާއި އެހީތެރިކަން ފޯރުކޮށްދިނުމުގެ އޮނިގަނޑެއް މި އެއްބަސްވުމުގެ ސަބަބުން ޤާއިމުވެގެންދާނެއެވެ.