ސްޓެލްކޯއިން ޤަބޫލުކުރާ މަތީ ފެންވަރުގެ މިންގަނޑަށް އައްޑޫ ސިޓީގެ ކަރަންޓުގެ ޚިދުމަތް ގެނައުމަށްޓަކައި އެންމެހައި މުވައްޒަފުން ކުންފުންޏާއެކު އެއްބައިވަންތަކަމާއެކު މަސައްކަތްކޮށްދެއްވުމަށް ސްޓޭޓް އިލެކްޓްރިކް ކޮމްޕެނީ (ސްޓެލްކޯ) ގެ މެނޭޖިންގ ޑިރެކްޓަރ ޑރ. ޢަލީ އަޒުވަރު އެދިވަޑައިގެންފިއެވެ.

އައްޑޫ ސިޓީގެ ކަރަންޓުގެ ޚިދުމަތާ ރަސްމީކޮށް ޙަވާލުވުމަށް އެމްޑީ އައްޑޫ ސިޓީއަށް ކުރައްވަމުން ގެންދަވާ ދަތުރުފުޅުގެ ތެރެއިން، ހިތަދޫ ސެންޓްރަލް ޕަވަރ ސްޓޭޝަން އަދި މަރަދޫފޭދޫގައި މަސައްކަތްކުރާ މުވައްޒަފުންނާ ބައްދަލުކުރައްވައި ދެއްކެވި ވާހަކަފުޅުގައި، މި ދަތުރުފުޅުގައި ޚިދުމަތާ ގުޅޭގޮތުން ފާހަގަކުރެވުނު މުހިންމު ކަންކަން އެމަނިކުފާނު ވަނީ ހިއްސާކުރައްވާފައެވެ.

އެމްޑީ އަޒުވަރުގެ ވާހަކަފުޅުގައި، ސްޓެލްކޯއަކީ ރައްޔިތުންނަށް ނުހަނު ބޭނުންތެރި އަސާސީ ޚިދުމަތެއް ފޯރުކޮށްދޭ އަދި 76 އަހަރުގެ ދިގު، ފަޚުރުވެރި މާޒީއެއް އޮތް ކުންފުންޏެއްކަން ފާހަގަކުރެއްވިއެވެ. އަދި އެކަން ދަނެގެން، ކުންފުނީގައި ހެދިފައިވާ ހަރުދަނާ އުޞޫލުތަކާއި ޤަވާއިދުތަކަށް ފުރިހަމައަށް ބޯލަނބައި، އިޚްލާޞްތެރިކަމާއެކު ރަނގަޅު ގޮތުގައި މަސައްކަތް ކުރުމުގެ މުހިންމުކަމުގެ މައްޗަށް އެމަނިކުފާނު އަލިއަޅުއްވާލެއްވިއެވެ.

މީގެއިތުރުން، މަސައްކަތުގެ މާޙައުލުގައި މުވައްޒަފުންނަށް ކުރިމަތިވާ އެކިއެކި ދަތިތަކާއި ގޮންޖެހުންތައް އޮޅުންފިލުއްވައި، އެ ކަންކަން ޙައްލުކޮށްދެއްވުމަށްޓަކައި ކުންފުނީގެ ފަރާތުން އަޅުއްވާނެ ފިޔަވަޅުތަކުގެ ތަފްޞީލުތައްވެސް އެމްޑީގެ މި ވާހަކަފުޅުގައި މުވައްޒަފުންނާ ވަނީ ޙިއްޞާކުރައްވާފައެވެ.