ދިވެހި ޒުވާނުންގެ ކުރިމަގު ބައްޓަންކޮށް އުޖާލާކޮށްދިނުމުގެ މަޤްޞަދުގައި ސަރުކާރުން ފެށި "ދިވެހި ވަޠަނީ ޚިދުމަތް" (ނޭޝަނަލް ސަރވިސް) އަށް އެއް އަހަރު ފުރިފައިވާއިރު، ފުރަތަމަ އަހަރު ކަނޑައެޅި ލަނޑުދަނޑި ފުރިހަމައަށް ޙާޞިލުކުރެވިފައިވާ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ދިވެހި ވަޠަނީ ޚިދުމަތަށް އެއް އަހަރު ފުރުމުގެ މުނާސަބަތުގައި ރައީސުލްޖުމްހޫރިއްޔާ ދެއްވި މެސެޖުގައި، މި ތަމްރީނުތައް ފުރިހަމަކުރި އެންމެހައި ޒުވާނުންނަށާއި އެ ކުދިންގެ ޢާއިލާތަކަށް ވަނީ ތަހުނިޔާ ވިދާޅުވެފައެވެ. އަދި މި ޙަރަކާތް ކާމިޔާބުކަމާއެކު ކުރިއަށް ގެންދިއުމުގައި ބައިވެރިވި އެންމެހައި ފަރާތްތަކަށް އެމަނިކުފާނު ވަނީ ޝުކުރު އަދާކުރައްވާފައެވެ.

ރައީސުލްޖުމްހޫރިއްޔާ ފާހަގަކުރެއްވި ގޮތުގައި، ދިވެހި ވަޠަނީ ޚިދުމަތުގެ ތެރެއިން އަހަރަކު 1,000 ޒުވާނުން ތަމްރީނުކުރުމަށް ސަރުކާރުން ކަނޑައެޅި އަމާޒު ފުރަތަމަ އަހަރުގެ ތެރޭގައިވެސް ވަނީ ފަހަނައަޅާފައެވެ. އެގޮތުން، ނޭޝަނަލް ސަރވިސް އިނީޝަލް ޓްރޭނިންގގެ ތެރެއިން 1,028 ދިވެހި ޒުވާނުން ތަމްރީނުކުރެވުނުއިރު، ނޭޝަނަލް ސަރވިސް ސްކިލް ޓްރޭނިންގ ޕްރޮގްރާމުން 136 ޒުވާނަކު ވަނީ ތަމްރީނު ފުރިހަމަކޮށްފައެވެ. ފާއިތުވި އެއް އަހަރަކީ ޒުވާނުންނަށްޓަކައި ވަރަށް އުފެއްދުންތެރި އަދި ކާމިޔާބު މަސައްކަތްތަކެއް ކޮށްދެވުނު އަހަރެއްކަން އެމަނިކުފާނު ފާހަގަކުރެއްވިއެވެ.

ވަޠަނީ ޚިދުމަތުގެ ކުރިމަގު ވަރަށް އުޖާލާކަން ފާހަގަކުރައްވައި ރައީސް ވިދާޅުވީ، ކުރިއަށް އޮތް ތަނުގައި މި ޚިދުމަތުގެ ތެރެއަށް ފަންނީ އިތުރު ދާއިރާތަކާއި، ނޭޝަނަލް ސަރވިސްގެ އިންޓަރންޝިޕް ޕްރޮގްރާމްތައް ތަޢާރަފުކުރެވިގެންދާނެ ކަމަށެވެ. މީގެއިތުރުން، މި ތަމްރީނުތައް ނިންމާ ޒުވާނުންނަށް ވަޒީފާގެ ފުރުޞަތުތައް ފަހިކޮށްދިނުމުގެ ގޮތުން ނޭޝަނަލް ކެރިއަރ ސަރވިސްގެ ދައުރު މިހާރަށްވުރެ ފުޅާކުރުމަކީވެސް ސަރުކާރުގެ މުހިންމު އަމާޒެއް ކަމަށް ރައީސުލްޖުމްހޫރިއްޔާ ވިދާޅުވިއެވެ.

ދިވެހި ޒުވާނުންގެ ކުރިމަގު ބައްޓަންކުރުމުގެ މުޅިން އައު ރާސްތާއެއް ފަހިކޮށްދިނުމަށް މި ސަރުކާރުން އިސްނަގައިގެން ދިވެހި ވަޠަނީ ޚިދުމަތް ރަސްމީކޮށް އިފްތިތާޙުކޮށްފައިވަނީ 2025 އޮކްޓޫބަރު 1 ގައެވެ.