ފެމިލީ އެންޑް ޗައިލްޑް ޕްރޮޓެކްޝަންގެ ފެމިލީ އެންޑް ޖެންޑަރ އެފެއަރޒުން ތަޙުޤީޤު ކުރަމުންދާ ޖިންސީ ފުރައްސާރައިގެ މައްސަލައަކާ ގުޅިގެން މީހަކު ހޯދުމަށް ފުލުހުން ޢާންމުންގެ އެހީތެރިކަމަށް އެދިއްޖެއެވެ.

ފުލުހުން މަޢުލޫމާތު ދެއްވި ގޮތުގައި، ވީޑިއޯއިން ފެންނަ މި މީހާއަކީ ޖިންސީ ފުރައްސާރަކޮށްފައިވާ ކަމަށް ތުހުމަތުކުރެވޭ މައްސަލައަކާ ގުޅިގެން ހޯދަން ބޭނުންވެ، އެއީ ކާކުކަން ދެނެގަނެވިފައި ނުވާތީ މިހާތަނަށް ހޯދިފައިނުވާ މީހެކެވެ.

އެހެންކަމުން، މި ވީޑިއޯއިން ފެންނަ މީހާއާ ބެހޭ އެއްވެސް މަޢުލޫމާތެއް ލިބިފައިވާ ފަރާތެއް ވާނަމަ، ފެމިލީ އެންޑް ޖެންޑަރ އެފެއަރޒްގެ ފޯނު ނަންބަރު 9790163 އަށް ގުޅުއްވައި މަޢުލޫމާތު ހިއްސާކޮށްދެއްވުމަށް ފުލުހުން ވަނީ އެދިވަޑައިގެންފައެވެ.

ފުލުހުންގެ ޚިދުމަތުން އިތުރަށް ވިދާޅުވީ، މިފަދަ ކުށްތަކާ ގުޅިގެން ހޯދަން ބޭނުންވާ ފަރާތްތައް ދެނެގަތުމުގައާއި ހޯދުމުގައި ޢާންމު ރައްޔިތުންގެ ފަރާތުން ފުލުހުންނަށް އަބަދުވެސް ލިބެމުންދާ އެއްބާރުލުން ފާހަގަކޮށް، ރައްޔިތުންނަށް ޝުކުރު އަދާކުރާ ކަމަށެވެ.