ދިވެހި ސަރުކާރުން ކުރިއަށްގެންދާ ރަސްމާލެ ޓައުންޝިޕް ޕްރޮގްރާމާ ގުޅިގެން ސާފުކުރަން ބޭނުންވާ މުހިންމު ކަންކަން އޮޅުންފިލުވުމަށްޓަކައި، ޢަދާލަތު ޕާޓީގެ ރައީސް އައްޝައިޚް މުޙައްމަދު ޝިފާން އަދި ޕާޓީގެ އިސް ލީޑަރޝިޕްގެ ބޭފުޅުން މިނިސްޓަރ އޮފް އިންފްރާސްޓްރަކްޗަރ، ހައުސިންގ އެންޑް އަރބަން ޑިވެލޮޕްމެންޓް ޑރ. ޢަބްދުالله މުއްޠަލިބާ ބައްދަލުކުރައްވައިފިއެވެ.

ފަތުރުވެރިކަމާއި ރިއަލްއެސްޓޭޓް ވިޔަފާރި ހިމެނޭހެން 500 ހެކްޓަރުގެ ބިމެއްގައި ބޮޑު މަޝްރޫޢެއް ހިންގުމަށްޓަކައި އަބޫދާބީގެ އީގަލް ހިލްސް ކުންފުންޏާއެކު ސަރުކާރުން ވަނީ ކޮމާޝަލް ޓާމްސް އެގްރީމަންޓެއްގައި ސޮއިކޮށްފައެވެ. މި މަޝްރޫޢާ ގުޅޭ މަޢުލޫމާތުތައް މިނިސްޓްރީން ވަނީ ޢަދާލަތު ޕާޓީގެ އިތުރުން އެހެން ބައެއް ފަރާތްތަކާވެސް ހިއްސާކޮށްފައެވެ. ޖުމްލަ 20 ބިލިއަން ޑޮލަރުގެ މި މަޝްރޫޢުގެ ދަށުން އީގަލް ހިލްސްއިން ހުޅުމާލޭގައި 5,000 ހައުސިންގ ޔުނިޓު އެޅުމަށްވެސް ނިންމާފައިވާއިރު، މުޅި މަޝްރޫޢުގެ 10 އަހަރުގެ މުއްދަތުގެ ތެރޭގައި ދައުލަތަށް 11 ބިލިއަން ޑޮލަރު (169 ބިލިއަން ރުފިޔާ) އަށްވުރެ ބޮޑު އާމްދަނީއެއް ލިބޭނެ ކަމަށް ވަނީ އަންދާޒާކޮށްފައެވެ.

މި ވަގުތު ވަކި ސިޔާސީ ފިކުރަކަށް ތާއީދުނުކޮށް އޮތް ޢަދާލަތު ޕާޓީން ވަނީ ބޭރުގެ އިންވެސްޓަރުންނަށް ޚާއްޞަކޮށްގެން ސަރުކާރުން ތަޢާރަފުކުރަން ނިންމާފައިވާ "މޯލްޑިވްސް ޕާލް ރެސިޑެންސީ" ވިސާއާ ގުޅޭގޮތުން މަޢުލޫމާތު ސާފުކުރުމަށް މިދިޔަ އާދިއްތަ ދުވަހު އިޤްތިޞާދީ ތަރައްޤީއާއި ވިޔަފާރިއާ ބެހޭ ވަޒީރު މުޙައްމަދު ސަޢީދާވެސް ބައްދަލުކޮށްފައެވެ.

މި ރެސިޑެންސީ ޕްރޮގްރާމަކީ ރާއްޖޭގެ އިޤްތިޞާދު ސިންދަފާތުކޮށް، ބޭރު ފައިސާ ވަންނަ މިންވަރު އިތުރުކޮށް އިޤްތިޞާދީ ގޮންޖެހުންތަކަށް ޙައްލު ހޯދުމުގެ މަޤްޞަދުގައި ތަޢާރަފުކުރާ "ރެސިޑެންސީ ބައި އިންވެސްޓްމަންޓް" ޕްރޮގްރާމެކެވެ.

ޢަދާލަތު ޕާޓީގެ ތަރުޖަމާނު ޙުސައިން އަންޞާރު "އެކްސް" ގައި ކުރެއްވި ޕޯސްޓެއްގައި ވިދާޅުވީ، ރަސްމާލެ މަޝްރޫޢާއި، ރެސިޑެންސީ ވިސާ އަދި ޓައުންޝިޕް ޕްރޮގްރާމާ ގުޅޭގޮތުން ސާފުކުރަންޖެހޭ މުހިންމު މަޢުލޫމާތުތައް ސަރުކާރުގެ ކަމާބެހޭ ފަރާތްތަކާ ބައްދަލުކޮށް އޮޅުންފިލުވަމުންދާ ކަމަށެވެ. އަދި މި ކަންކަމާ ގުޅޭ ޞައްޙަ މަޢުލޫމާތު ސަރުކާރުގެ ފަރާތުން ހޯދުމަށްފަހު، އެއްވެސް ކަންބޮޑުވުމެއް އޮތްނަމަ އެކަންކަމަށް އެކަށީގެންވާ ޙައްލެއް ހޯދުމަށްޓަކައި ކަމާގުޅުންހުރި މުއައްސަސާތަކަށް ހުށަހަޅާނެ ކަމުގެ ޔަޤީންކަން އޭނާ ވަނީ އަރުވާފައެވެ.