ސްޓޭޓް އިލެކްޓްރިކް ކޮމްޕެނީ (ސްޓެލްކޯ) ގެ ޚިދުމަތްތައް އައްޑޫ ސިޓީގެ ހުޅުދޫ އަދި މީދޫގައި މިއަދު ރަސްމީކޮށް ފަށައިފިއެވެ.

މި ޚިދުމަތްތައް ރަސްމީކޮށް ފައްޓަވައިދެއްވުމަށްޓަކައި ސްޓެލްކޯގެ މެނޭޖިންގ ޑިރެކްޓަރ ޑރ. ޢަލީ އަޒުވަރާއި އެ ކުންފުނީގެ އިސްވެރިންގެ ވަފުދެއް ވަނީ އެ ދެ ރަށަށް ޒިޔާރަތްކުރައްވާފައެވެ. ޚިދުމަތް ފެށުމުގެ ގޮތުން ބޭއްވި ޚާއްޞަ ރަސްމިއްޔާތުގައި ދިވެހިރާއްޖޭގެ ޤައުމީ ދިދަ ނަންގަވައިދެއްވީ މެނޭޖިންގ ޑިރެކްޓަރ ޑރ. ޢަލީ އަޒުވަރެވެ. އަދި ސްޓެލްކޯގެ ދިދަ ނަންގަވައިދެއްވީ ޑެޕިއުޓީ މެނޭޖިންގ ޑިރެކްޓަރ ޢާއިޝަތު މުޒްނާއެވެ. ދިދަ ނެންގެވުމުގެ ރަސްމިއްޔާތަށްފަހު، އެމްޑީ އަދި ކުންފުނީގެ އިސްވެރިން ވަނީ ހުޅުދޫ އަދި މީދޫގެ އިންޖީނުގެއާއި އޮފީހުގެ މަސައްކަތްތައް ހިނގަމުންދާ ގޮތް ވަރަށް ގާތުން ބައްލަވާލައްވާފައެވެ.

އައްޑޫ ސިޓީއަށް ދިމާވެފައިވާ ކަރަންޓު ކެނޑުމުގެ މައްސަލައަކީ އެ ސިޓީގެ ރައްޔިތުން ޒަމާނުއްސުރެ ތަޙައްމަލުކުރަމުންދާ ބޮޑު ގޮންޖެހުމަކަށްވާއިރު، މި ސަރުކާރުން ވަނީ މި މައްސަލައަށް ދާއިމީ ޙައްލެއް ހޯދުމަށް މުހިންމު ފިޔަވަޅުތަކެއް އަޅަން ފަށާފައެވެ. އެގޮތުން، އައްޑޫ ސިޓީގައި ޒަމާނީ ސެންޓްރަލް ޕަވަރ ސްޓޭޝަނެއް އެޅުމުގެ ބޮޑު މަޝްރޫޢު މިހާރު ވަނީ ދުބާއީގެ ޑެފިނިޓް ސޮލިއުޝަންސްއާ ޙަވާލުކޮށްފައެވެ.

މި މަޝްރޫޢުގެ ދަށުން ކުރިއަށް ގެންދިއުމަށް ހަމަޖެހިފައިވާ މުހިންމު ކަންކަން:

• އައު އިންޖީނުގެއެއް ޢިމާރާތްކުރުމާއި، 5.2 މެގަވޮޓުގެ ލޯ-ސްޕީޑު 5 ޖަނަރޭޓަރު ބެހެއްޓުން.
• މި ދާއިރާއިން މުވައްޒަފުންނަށް ބޭނުންވާ ޢަމަލީ ތަމްރީނުތައް ބެލްޖިއަމްގައި ފޯރުކޮށްދިނުން.
• ކަރަންޓު ވިއުގައާ (ގްރިޑާ) ހަމައަށް ކަރަންޓު ފޯރުކޮށްދިނުމަށް ބޭނުންވާ އެންމެހައި ވަސީލަތްތައް ޤާއިމުކުރުން.
• ފިޔުލް ފާމެއް ޤާއިމުކުރުމާއި ބަންކަރިންގެ ޚިދުމަތް ދިނުމުގެ އިންތިޒާމުތައް ހަމަޖެއްސުން.

މި މަޝްރޫޢު އެއްކޮށް ނިމިގެންދާއިރު ސެންޓްރަލް ޕަވަރ ސްޓޭޝަނުން 26.37 މެގަވޮޓުގެ ކަރަންޓު އުފެއްދުމުގެ ޤާބިލުކަން ލިބިގެންދާނެއެވެ. މިއާއެކު، އައްޑޫ ސިޓީގައި ގުޅިފައިވާ ހިތަދޫ، މަރަދޫ، މަރަދޫފޭދޫ، ފޭދޫ އަދި ގަން ހިމެނޭހެން 5 އަވަށުގެ ކަރަންޓު ވިއުގަ ވަރުގަދަވެ، ކުރިއަށް އޮތް 20 އަހަރަށް ބޭނުންވާ މިންވަރަށް އައްޑޫގެ ކަރަންޓު ކެޕޭސިޓީ ކަށަވަރުވެގެންދާނެ ކަމަށް ސަރުކާރުން ވިދާޅުވެއެވެ.