މޯލްޑިވްސް ޒަކާތު ހައުސްއިން ވިދިވިދިގެން ތިންވަނަ އަހަރަށް ބާއްވާ "އިންޓަރނޭޝަނަލް ޒަކާތު ކޮންފަރެންސް މޯލްޑިވްސް (އިންޒެކް) 2026" ގައި ބައިވެރިވުމަށް ރަޖިސްޓަރީވުމުގެ ފުރުޞަތު ރަސްމީކޮށް ހުޅުވާލައިފިއެވެ.

މި އަހަރުގެ އޮކްޓޫބަރު މަހުގެ 28 ވަނަ ދުވަހު ބޭއްވުމަށް ހަމަޖެހިފައިވާ މި ކޮންފަރެންސަކީ، މާލީ އަދި އިޖުތިމާޢީ ނާޒުކު ޙާލަތްތަކާ ގުޅިގެން ކުރިމަތިވާ އެކިއެކި ގޮންޖެހުންތަކާއި، ވިލުންވެރި މުޖުތަމަޢުތަކެއް ބިނާކުރުމުގައި ޒަކާތުގެ މުހިންމު ދައުރާ ގުޅޭގޮތުން ފުޅާ ދާއިރާއެއްގައި މަޝްވަރާކުރުމަށް ބާއްވާ ޚާއްޞަ ބައްދަލުވުމެކެވެ. މި ކޮންފަރެންސްގައި ދީނީ ޢިލްމުވެރިންނާއި، އިޤްތިޞާދީ މާހިރުންނާއި، ޒަކާތުގެ ކަންކަން ބަލަހައްޓާ ފަރާތްތަކާއި، ސިޔާސަތު ކަނޑައަޅާ އިސްވެރިންނާއި، މާލީ އިދާރާތަކާއި މަދަނީ ޖަމްޢިއްޔާތަކުގެ މަންދޫބުން އެއްތަނަކުން ބައްދަލުވާނެއެވެ.

މިއަހަރުގެ ކޮންފަރެންސްގެ ޝިޢާރަކަށް ކަނޑައަޅާފައިވަނީ "ރެޒިލިއަންޓް ފައުންޑޭޝަންސް: ޑިސައިފަރިންގ ވަލްނަރަބިލިޓީ، އިކޮނޮމިކް އިމްޕެކްޓް، އެންޑް ކޮލާބޮރޭޓިވް ސޭފްޓީ ނެޓްސް އިން މޮޑަން ސޮސައިޓީޒް" އެވެ.

މި ކޮންފަރެންސްގެ ތެރޭގައި ކީނޯޓް އެޑްރެސްތަކާއި، އެކި ދާއިރާތަކުގެ ތަޖުރިބާކާރުން ބައިވެރިވާ މުހިންމު ޕެނަލް ޑިސްކަޝަންތައް ކުރިއަށްދާނެއެވެ. އެގޮތުން މަޝްވަރާކުރުމަށް ހަމަޖެހިފައިވާ މައިގަނޑު ދާއިރާތަކުގެ ތެރޭގައި:

• ގޭބިސީތަކުގެ ނާޒުކު ޙާލަތަށް އަންނަމުންދާ ބަދަލުތަކާއި މާލީ ދަތިކަމުގެ ސަބަބުން ކުރާ އިޤްތިޞާދީ އަސަރުތައް ދެނެގަތުން.
• ދާއިރާތަކުގެ މެދުގައި މަޢުލޫމާތު ޙިއްޞާކުރުމާއި ގުޅިފައިވާ އިޖުތިމާޢީ ރައްކާތެރިކަމުގެ ނިޒާމުތައް ވަރުގަދަކުރުން.
• ނާޒުކު ޙާލަތްތަކުގައިވާ ޢާއިލާތަކަކީ އަމިއްލަ ފައިމައްޗަށް ތެދުވެވިފައިވާ މާލީ މިނިވަންކަން ލިބިފައިވާ ބަޔަކަށް ހެދުމަށް ބޭރު ޤައުމުތަކުގައި ބޭނުންކުރާ ކާމިޔާބު މޮޑެލްތައް ދިރާސާކުރުން.

އިންޒެކް 2026 ގައި ބައިވެރިވުމަށް ޝައުޤުވެރިވާ ފަރާތްތަކަށް މިހާރު ވަނީ އޮންލައިން ފޯމު މެދުވެރިކޮށް ރަޖިސްޓަރީވުމުގެ ފުރުޞަތު ހުޅުވާލާފައެވެ.