ޤާނޫނު ނަންބަރު 27/2025 (ޒަކާތުގެ ޤާނޫނު) ގެ 12 ވަނަ މާއްދާގެ (ގ) ގެ ދަށުން 'ޒަކާތް ނެރުމާއި ބެހުމުގައި ޢަމަލުކުރާނެ ގޮތުގެ ޝަރުޢީ އަސާސުތަކާއި މިންގަނޑުތައް' ފޮތުގެ ދެވަނަ އިޞްދާރު މިއަދު ރަސްމީކޮށް ނެރެފިއެވެ.

މި ފޮތުގެ ދެވަނަ އިޞްދާރު ރަސްމީކޮށް ނެރެދެއްވީ މިކަމަށްޓަކައި މިއަދު ބޭއްވި ޚާއްޞަ ރަސްމިއްޔާތެއްގައި، މިނިސްޓަރ އޮފް އިސްލާމިކް އެފެއާޒް އެންޑް އެންޑައުމެންޓްސް ޑރ. މުޙައްމަދު ޝަހީމް ޢަލީ ސަޢީދެވެ.

މިއީ ޝަރުޢީ އުޞޫލުތަކާ އެއްގޮތްވާ ގޮތުގެ މަތީން ރާއްޖޭގެ ޒަކާތް ނެގުމާއި ބެހުމުގެ ނިޒާމު އިތުރަށް ހަރުދަނާކުރުމަށްޓަކައި، އަދާހަމަކުރެވިފައިވާ އިރުޝާދުތަކާއެކު އެކުލަވާލާފައިވާ ފޮތެކެވެ.

އަލަށް ނެރުނު މި އިޞްދާރުގައި ހިމަނާފައިވަނީ 1 ޖަނަވަރީ 2026 ގައި ޢަމަލުކުރަން ފެށުނު ޒަކާތުގެ އައު ޤާނޫނުގެ ދަށުން އެކުލަވާލެވުނު ޝަރީޢާ އެޑްވައިޒަރީ ކޮމިޓީގެ ލަފަޔާއި އިރުޝާދުގެ މަތީން ގެނެވިފައިވާ އިޞްލާޙުތަކެވެ. ޒަކާތުގެ އައު ޤާނޫނާއެކު ގެނެވުނު ބަދަލުތަކާއި، ޒަކާތުގެ އިދާރީ ކަންކަން ހިންގުމުގައި ބޭނުންވާ ޝަރުޢީ އަދާހަމަ މިންގަނޑުތައް މި ފޮތުން ސާފުކޮށް ފޯރުކޮށްދެއެވެ.

މި ފޮތަކީ ޒަކާތް ނެގުމާއި، ބެލެހެއްޓުމާއި، އަދި ބެހުމުގެ މަސައްކަތުގައި ޝާމިލުވާ މުއައްސަސާތަކަށާއި ވަކިވަކި ފަރުދުންނަށް ބޭނުންތެރި މުހިންމު ރެފަރެންސަކަށް ވެގެންދާނެއެވެ. އަދި މި ފޮތް މިހާރު މޯލްޑިވްސް ޒަކާތު ހައުސްގެ ރަސްމީ ވެބްސައިޓުން ޑައުންލޯޑް ކުރެވޭނެ އިންތިޒާމު ވަނީ ހަމަޖައްސާފައެވެ.