ބޮލީވުޑްގެ ކުޅަދާނަ ބަތަލާ ޔާމީ ގޯތަމް ލީޑު ރޯލުން ފެނިގެންދާ، ހޮރޯ-ކޮމެޑީ "ނައީ ނަވެލީ" ގެ ރަސްމީ ޓްރެއިލަރ އާންމުކޮށްފިއެވެ.

މި ފިލްމުގައި ޔާމީ ފެނިގެންދާނީ މީރަތުގެ އާއިލާއަކާ އަލަށް ގުޅޭ "ޕަރފެކްޓް" އާ ފަހަރިއެއްގެ ގޮތުގައެވެ.

އޭނާ އާއިލާއާ ގުޅުމާއެކު އެ ގޭތެރެއަށް އުފާވެރިކަމާއި ހަމަޖެހުން ގެނެސްދެއެވެ. ނަމަވެސް އޭނާގެ ފިރިމީހާގެ ކޮއްކޮއަށް، އޭނާއަކީ އާދައިގެ އިންސާނެއް ނޫންކަމަށާއި އޭނާއަކީ 'ޑާޔަން' އެއް ކަމަށް ޝައްކުކުރެވެން ފަށައެވެ.

ބޭރުފުށުން ވަރަށް ރަނގަޅު މީހެއްގެ ގޮތުގައި ފެންނަ މި ފަހަރި ފޮރުވައިގެން އުޅެނީ ކޮންކަހަލަ ބިރުވެރި ސިއްރެއްކަން ޓްރެއިލަރ އިން ވަރަށް ޝައުގުވެރިކޮށް ދައްކުވައިދީފައިވެއެވެ.

ބާލާޖީ މޯހަން ޑައިރެކްޓްކޮށް، އާނަންދު އަދި ޝަރުމާ ޕްރޮޑިއުސްކޮށްފައިވާ މި ފިލްމަކީ އިންޑިއާގެ އާދަކާދަތަކާއި، ބިރުވެރިކަމާއި އަދި މަޖާ ކަންތައްތަކެއް އެކުލެވޭނެ ފިލްމެކެވެ.

ޔާމީގެ އިތުރުން އަދިނާތު ކޮތާރޭ، ަނުރާގް ތާކުރް އަދި ސުނީތާ ރާޖްވަރް ފަދަ ތަރިން މި ފިލްމުގެ މުހިންމު ރޯލަކުން ފެނިގެންދާނެއެވެ.

ޖީ.ވީ ޕްރަކާޝް ކުމާރު މިއުޒިކް ތައްޔާރުކޮށްފައިވާ "ނައީ ނަވެލީ" ސިނަމާތަކަށް އަންނާނީ އަންނަ އޮކްޓޯބަރ މަހުގެ 16 ވަނަ ދުވަހުއެވެ.