ބޮލީވުޑްގެ އެންމެ މަޝްހޫރު އަދި އެންމެ ގިނަ ބަހުސްތަކާއި ސިއްރުތައް ފަޅާއަރުވާލާ ސެލެބްރިޓީ ޓޯކް ޝޯ "ކޮފީ ވިތު ކަރަން" ގެ 9 ވަނަ ސީޒަން ނެރޭނެ ތާރީޚު، ޝޯގެ ހޯސްޓް އަދި ޑައިރެކްޓަރ ކަރަން ޖޯހަރ ރަސްމީކޮށް އިއުލާންކޮށްފިއެވެ.

ކަރަން އިންސްޓަގްރާމް މެދުވެރިކޮށް ހިއްސާކުރި ވީޑިއޯ މެސެޖުގައި އޭނާ ބުނެފައިވަނީ މި ސީޒަނަކީ "ކޮފީ ވިތު ކަރަން" ފްރެންޗައިޒްގެ އެންމެ ފަހު އަދި ވަދާއީ ސީޒަންކަމަށެވެ.

މި ޚާއްޞަ ސީޒަން ރަސްމީކޮށް ސްޓްރީމްކުރަން ފަށާނީ އަންނަ އޮކްޓޯބަރ މަހުގެ 14 ވަނަ ދުވަހު ޖިއޯހޮޓްސްޓާރ ޕްލެޓްފޯމުގައެވެ.

ދެ އަހަރު ދުވަހުގެ މެދުކެނޑުމަކަށްފަހު އެނބުރި އަންނަ މި ސީޒަނަކީ މުޅި ޝޯގެ ވަދާއީ ސީޒަން ކަމަށް ވުމުން، މިއީ އެހެން ހުރިހާ ސީޒަންތަކަށްވުރެ މާ ބޮޑު، އަދި ހަނދާން ނައްތާނުލެވޭނެ ފަދަ ސީޒަނަކަށް ހެދުމަށް ކަރަން ވަނީ ނިންމާފައެވެ.

2004 ވަނަ އަހަރު ފެށި މި ޝޯއަކީ ވޭތުވެދިޔަ 22 އަހަރު ތެރޭގައި ޖުމުލަ 161 އެޕިސޯޑް ގެނެސްދިން ބޮލީވުޑްގެ މުހިންމު ބަޔަކަށް ވެފައިވާ އުފެއްދުމެކެވެ.

ބޮލީވުޑްގެ އެންމެ ނުފޫޒުގަދަ ތަރިންގެ ލޯބީގެ ގުޅުންތަކާއި، ކޯޅުންތަކާއި އަދި ޒާތީ އެތައް ވާހަކަތަކެއް ފެންމަތިވެގެންދިޔަ މި ޝޯ ނިންމާލާ ޚަބަރަކީ ބޮލީވުޑްގެ ފޭނުންނަށް ލިބުނު ވަރަށް އަސަރުގަދަ އަދި ސިހުން ގެނުވި ޚަބަރެކެވެ.

މި ފަހު ސީޒަނުންވެސް ބޮލީވުޑްގެ އެތަކެއް މަޝްހޫރު ތަރިންތަކެއް ފެނިގެންދާނެކަމަށް ބެލެވެއެވެ.