އާލިޔާގެ ފޯނުގެ ސްކްރީނުން ފެންނަމުންދިޔަ ކުރެހުމާއި، އޭގެ ތިރީގައިވާ ޔާނާގެ އަތުލިޔުމަށް ބަލަހައްޓައިގެން ހުރި ޒަޔާންގެ ދޫ ވަނީ ބަންދުވެފައެވެ. ކުށްވެރިއެއް ފަދައިން އިސްޖަހާލިއެވެ. ގަމީހުގެ އެންމެ ފަހު ގޮށް އަޅުވަން އުޅުނު އޭނާގެ އިނގިލިތައް ދިޔައީ ގަނޑުފެންކޮޅެއް ފަދައިން ފިނިވެ ތުރުތުރުލަމުންނެވެ.

"އެއްޗެއް ނުބުނާނަންތަ، ޒަޔާން؟" އާލިޔާގެ އަޑު ތުރުތުރުލަމުން ދިޔައީ ހިތާމައާއި ރުޅިވެރިކަން އެކުވެގެންނެވެ. އޭނާގެ ކޯތާފަތްމަތިން ހޫނު ކަރުނަތިކިތައް ވެރެމުންދިޔައެވެ. "އަހަރެން ހީކުރީ އަހަރެމެންގެ ގުޅުމުގައި އޮތީ ހަމައެކަނި ވަގުތުގެ މައްސަލައެއް ކަމަށް. އަހަރެން ހޮސްޕިޓަލުގައި ހޭބޯނާރާ އުޅޭއިރު، ޒަޔާން ހޯދަމުން ދިޔައީ މިފަދަ ބަދަލެއްތަ؟"

"އާލިޔާ... އަޑުއަހާބަލަ،" ޒަޔާން އިސްއުފުލައި، އާލިޔާގެ އަތުގައި ހިފަން އަތް ދިއްކޮށްލިއެވެ. "ކަންތައް ވީ ގޮތް..."

"ޒަޔާންގެ ކުށެއް ނެތް!"

ކުއްލިއަކަށް ކޮޓަރީގެ ދޮރުމަތިން އިވުނު އަޑާއެކު ދެމީހުންގެ ނަޒަރު ދޮރާ ދިމާލަށް ހުއްޓުނެވެ. ދޮރުމަތީގައި ހުރީ ޔާނާއެވެ. ދެލޮލުން ފެންނަނީ އިންތިހާ ދަރަޖައިގެ ހާސްކަމެވެ.

"ޔާނާ... މިތަނުން ދޭ،" ޒަޔާން އަވަސް އަވަހަށް ބުންޏެވެ. އޭނާގެ ހިތް ބިރުން ފުރިގެން ދިޔައެވެ.

ޔާނާ އެ އަޑެއް ނޭހިއެވެ. އޭނާ ކުރިއަށް ފިޔަވަޅެއް އަޅައި، އާލިޔާގެ ކުރިމައްޗަށް ހުއްޓުނެވެ. "އާލިޔާ، ޕްލީޒް. އެ ކުރެހުމާއި އެ ނޯޓަކީ އަހަރެން އަމިއްލައަށް ކުރި ކަމެއް. ޒަޔާންއަކަށް އެއިން އެއްވެސް އެއްޗެއް ނޭނގޭނެ. ޒަޔާން އަހަންނަށް ދުވަހަކުވެސް އެކަހަލަ އުންމީދެއް ނުދޭ. އޭނާ އަބަދުވެސް ދައްކަނީ އާލިޔާގެ ވާހަކަ. ކުށްވެރިއަކީ އަހަރެން. ޒަޔާންއެއް ނޫން!"

ޔާނާ ބޭނުންވީ ޒަޔާން ސަލާމަތްކުރާށެވެ. ނަމަވެސް ކަންތައް ވީ މުޅިން އިދިކޮޅަށެވެ. އަލިފާންގަނޑަކަށް ޕެޓްރޯލް އެޅުނު ފަދައެވެ.

އާލިޔާ ދެލޯ ބޮޑުކޮށްލަމުން ޔާނާއަށް ބަލާލިއެވެ. އަދި އޭގެ ފަހުގައި ޒަޔާންގެ މޫނަށެވެ.

"ސުބްހާނަﷲ..." އާލިޔާ ހިތި ހިނިތުންވުމަކާއެކު ބޯ ހޫރާލިއެވެ. "ޒަޔާންގެ ދިފާއުގައި ތިހާ ވަރަށް ދޮގުހަދަން ޖެހޭ ހިސާބަށް ކަލޭމެންގެ ގުޅުން ގޮސްފިތަ؟ ޔާނާ، ޔާނާ ހީކުރީ އަހަރެން މީ މޮޔައެއް ކަމަށްތަ؟ ޒަޔާން ހަމަ އެއްވެސް އިޝާރާތެއް ނުދޭނަަމަ، އެ ފޮޓޯތަކުގައި އޭނާ ޔާނާ އާއި ދިމާލަށް އެގޮތަށް ބަލަހައްޓައިގެން ހުރީ ކޮން ނަޒަރަކުން؟ އެރޭ ދެމީހުން އެކުގައި ކޮފީ ބޮއި ހޭދަކުރި ހުރިހާ ވަގުތެއްގެ ވާހަކަ ޒަޔާން އަހަރެން ގާތުން ސިއްރުކުރީ ކީއްވެ؟"

ޒަޔާންއަށް ހިންދިރުވާލެވުނެވެ. "އާލިޔާ... އަހަރެން ސިއްރުކުރީ އާލިޔާ ނުބައި ގޮތަކަށް މާނަ ނަގައިފާނެތީވެ..."

"ނޫން، ޒަޔާން!" އާލިޔާ ހަޅޭއްލަވައިގަތެވެ. އޭނާގެ އަޑު ކޮޓަރީގެ ހަތަރުފާރު ތެރޭގައި ގުގުމައިގެން ދިޔައެވެ. "ސިއްރުކުރީ ކުށްވެރިކަން އިހުސާސްވާތީ! އެންމެ ދެރައީ، މަގޭ އަތުން ޒަޔާން ދިފާއުކުރަން މި އަންހެންކުއްޖާ އައިސް މިތަނުގައި ހުއްޓި ހުންނަން ޖެހުނުކަން. ޒަޔާންއަށް އަމިއްލަ ދުލުން ތެދަށް އެއްބަސްވާނެ ހިތްވަރެއްވެސް ނެތް!"

ޔާނާ އަނެއްކާވެސް ވާހަކަދައްކަން އުޅުނެވެ. "އާލިޔާ، ގަބޫލުކޮށްބަލަ—"

"އިތުރަށް އެންމެ ބަހެއްވެސް ބުނެގެން ނުވާނެ!" އާލިޔާ ޔާނާއާ ދިމާލަށް އިނގިލި ދިއްކުރަމުން ހަރުކަށިކަމާއިއެކު ބުންޏެވެ. "ޔާނާއަކަށް ނޭނގޭނެ އަހަރެމެން ދެމީހުންގެ މާޒީއެއް. އަހަރެމެން އެކުގައި އުޅޭތާ ފަސް އަހަރު ވެއްޖެ! އަހަރެން ހުރިހާ ވަގުތެއް ގުރުބާންކުރީ މި ދިރިއުޅުމަށް. އެކަމަކު ހަފުތާއެއްގެ ތެރޭގައި ޔާނާ އަހަރެންގެ މުޅި ދުނިޔެ ތި ފޭރިގަތީ!"

ކޮޓަރިތެރެއަށް ވެރިވީ ނުރައްކާތެރި ހަމަހިމޭންކަމެކެވެ. އާލިޔާގެ ނޭވާ އަވަސްވެފައިވާއިރު، ޔާނާގެ ލޮލުންވެސް ކަރުނަ ފާއްދާލައިފިއެވެ. ޒަޔާން ދެއަތުން ބޮލުގައި ހިފަހައްޓައިގެން އިސްދަށަށް ޖަހައިލިއެވެ. އޭނާގެ ފިނޑިކަމުން ދެ އަންހެނުންގެ ހިތް ހަލާކުވެ، މުޅި މަސްރަހު ކޮންޓްރޯލުން ނެއްޓިއްޖެއެވެ.

އާލިޔާ އެނބުރި އެނދު ކައިރިއަށް ގޮސް، އޭނާގެ ފޮށި ނެގިއެވެ. 

"އަހަރެން މި ރިސޯޓުގައި އެންމެ ސިކުންތަކުވެސް ދެން މަޑެއް ނުކުރާނަން،" އާލިޔާ ފޮއްޓަށް އޭނާގެ އެއްޗިހިތައް އަޅަމުން ބުންޏެވެ.

މި ވާހަކައިގެ 8 ވަނަ އެޕިސޯޑު ގެނެސްދޭނީ އަންނަ ހުކުރު ދުވަހު އެވެ.