ހެނދުނުގެ އިރުގެ ރަން ދޯދިތަކުން މުޅި ރިސޯޓު ވަނީ އަލިކޮށްލާފައިއެވެ. އާލިޔާ ހޭލީ ވަރަށް ތާޒާ ހިތަކާއެކުގައެވެ. މިއަދަކީ ޒަޔާންގެ އުފަންދުވަހެވެ. އޭނާ ކޮޓަރީގެ ބެލްކަނީގައި ހުރެ، ރިސޯޓުގެ މެނޭޖްމަންޓާ ވާހަކަދައްކައިގެން އިރުއޮށްސޭއިރަށް އަތިރިމަތީގައި ކެންޑަލްލައިޓް ޑިނާއެއް ރޭވިއެވެ. އޭނާ ބޭނުންވީ މި ދަތުރަކީ ޒަޔާންގެ ހަޔާތުގައިވެސް ދުވަހަކުވެސް ހަނދާން ނުނެތޭނެ ފަދަ އުފާވެރި ދުވަހަކަށް ހަދާށެވެ.

ނަމަވެސް، ޒަޔާން ހޭލި އިރުވެސް އޭނާގެ މޫނުމަތިން ފެންނަނީ ނުތަނަވަސްކަމެވެ. އުފަންދުވަހުގެ ހަދިޔާއަކަށް އާލިޔާ ދިން އެންމެ ފަހުގެ ފޯނު ފެނުމުންވެސް ޒަޔާންގެ ތުންފަތްމަތިން ފެނިގެންދިޔައީ މަޖުބޫރީ ހިނިތުންވުމެކެވެ.

މެންދުރުފަހު، އާލިޔާ ނިންމީ ރޭގައި ޔާނާ ނެގި ފޮޓޯތައް ބަލާލުމަށް ރިސޯޓުގެ ފޮޓޯ ސްޓޫޑިއޯއަށް ދާށެވެ. ޒަޔާން ކޮޓަރީގައި ފެންވަރަން ހުރި ވަގުތު ބަލައި، އާލިޔާ އެކަނި ހިނގައިގަތީ ސްޓޫޑިއޯއާ ދިމާލަށެވެ.

ފޮޓޯ ސްޓޫޑިއޯގެ ދޮރު ހުޅުވާލިއިރު، އެތެރޭގައި ޔާނާއެއް ނެތެވެ. މޭޒުމަތީގައި ހުރި ބޮޑު ކޮމްޕިއުޓަރުގެ ސްކްރީން ހުރީ ދިއްލިފައެވެ. އާލިޔާ މަޑުމަޑުން އެ ދިމާލަށް ހިނގައިގަތެވެ. އޭނާ ބޭނުންވީ ރޭގައި ނެގި ފޮޓޯ ފެނޭތޯ ބަލާށެވެ.

ސްކްރީނަށް ބަލައިލި ވަގުތު، އާލިޔާގެ ފިޔަވަޅުތައް ގަނޑުވިއެވެ.

އޭގައި ހުރީ ރޭގެ ފޮޓޯއެއް ނޫނެވެ. އޭގައި ހުރީ މީގެ ހަފުތާއެއްހާ ދުވަސް ކުރިން، ނުބައި މޫސުމުގައި ޒަޔާން މި ރަށަށް އައި ދުވަހު ނަގާފައިވާ ފޮޓޯތަކެކެވެ. ކެފޭގެ މޭޒުދޮށުގައި ދެމީހުން ކޮފީ ބޯން ތިބިއިރު ނަގާފައިވާ ވަރަށް ގާތް ފޮޓޯތަކެކެވެ. އެ ފޮޓޯތަކުގައި ޒަޔާން ޔާނާއަށް ބަލަހައްޓައިގެން ހުރި ގޮތުން، އަދި ޔާނާގެ މޫނުމަތިން ފެންނަ އުފާވެރިކަމުން، އެއީ ހަމައެކަނި "އެއްފަހަރު ދިމާވި އެކުވެރިއެއް" ނޫންކަން އާލިޔާއަށް ވަގުތުން ޔަގީންވިއެވެ.

އެންމެ ބޮޑު ސިހުމެއް ލިބުނީ އެއްލި ކަޅިއަކުން ފެނުނު ނޯޓު ފޮތުންނެވެ. އޭގައި ކުރަހާފައިވަނީ ޒަޔާން ސީޕްލޭންއިން ފައިބައިގެން ވާރެއިން ސަލާމަތްވާން ދުވެފައި އަންނަ މަންޒަރެވެ. އަދި ގަޑުގެ މަތީގައި "މައި ޕައިލެޓް – ޒަޔާން" މިހެން ޖަހާފައި ހުއްޓެވެ. އެ ކުރެހުމުގެ ތިރީގައި "އިއްތިފާގުން ދިމާވި ނަމަވެސް، ހިތް އެދެނީ މި މަންޒިލުގައި ތާއަބަދު މަޑުކުރަން" މިފަދައިންވެސް ލިޔެފައިވެއެވެ. 

އާލިޔާގެ ދެލޮލުން ކަރުނަ ފައިބަން ފެށިއެވެ. އޭނާގެ ހިތް ކުދިކުދިވެގެން ދިޔަ ފަދަ ތަދެއް އިހުސާސްކުރެވުނެވެ. ޒަޔާން ފަހަކަށް އައިސް ފޯނު ނުނަގާ ސަބަބާއި، މާލޭގައި ހުރެގެންވެސް ހިޔާލެއްނެތި އިންނަ ސަބަބު އޭނާއަށް މިހާރު ސާފުވެއްޖެއެވެ. ޒަޔާންގެ ހިތް ވަނީ އެހެން މީހަކަށް ދެވިފައެވެ.

އެވަގުތު ސްޓޫޑިއޯގެ ދޮރު ހުޅުވާލާފައި ޔާނާ އެތެރެއަށް ވަނެވެ. ސްކްރީނުގެ ކުރިމަތީގައި ރޮވިފައި ހުރި އާލިޔާ ފެނުމާއެކު، ޔާނާގެ މޫނުމަތިން ކުލަވަރު އޮއްސުނެވެ.

"އާލިޔާ..." ޔާނާ ހާސްވެފައި ގޮވާލިއެވެ.

އާލިޔާ ފަސްއެނބުރި ޔާނާއަށް ބަލައިލިއެވެ. "މިއީތަ ތިޔަ ދެމީހުންގެ 'އާދައިގެ އެކުވެރިކަމަކީ'؟"

ޔާނާ އިސްދަށަށް ޖެހިއެވެ. އޭނާގެ ދުލުން ބުނާނެ އެއްވެސް ބަހެއް ނައެވެ.

އާލިޔާ ކަރުނަތައް ފޮހެލުމަށްފަހު، ހަރު ހިނގުމެއްގައި ސްޓޫޑިއޯއިން ނިކުމެގެން ދިޔައީ ސީދާ ޒަޔާން ހުރި ކޮޓަރިއާ ދިމާލަށެވެ. ކޮޓަރީގެ ދޮރު ހުޅުވާލިއިރު، ޒަޔާން ހުރީ އުފަންދުވަހުގެ ހަވީރަށް ތައްޔާރުވާން ގަމީހުގެ ގޮށްތައް އަޅުވާށެވެ.

އާލިޔާ ވަދެގެން އައި ގޮތާއި، އޭނާގެ ރަތްވެފައިވާ ދެލޯ ފެނުމުން ޒަޔާންގެ ހިތް ތެޅިގަތެވެ.

"އާލިޔާ... ކިހިނެއްވީ؟"

އާލިޔާ އޭނާގެ އަތުގައި އޮތް ފޯނުން ނަގާފައިވާ ކުރެހުމުގެ ފޮޓޯ ޒަޔާންގެ މޫނުމައްޗަށް ދިއްކޮށްލިއެވެ. "ހެޕީ ބާރތްޑޭ، ޒަޔާން. މިއަދު އަހަންނަށް އެނގިއްޖެ ޒަޔާންގެ ހަގީގީ މަންޒިލަކީ އަހަރެން ނޫންކަން!"

ޒަޔާންގެ މުޅި ހަށިގަނޑު ގަނޑުވިއެވެ.

މި ވާހަކައިގެ ފަހު ބައި ގެނެސްދޭނީ އަންނަ އަންގާރަ ދުވަހު އެވެ.