ޖެޓީ މަތީގައި އުފެދުނު ކުއްލި ހިމޭންކަމުގެ ތެރެއިން ޒަޔާން އަވަސް އަވަހަށް ހިންދިރުވާލިއެވެ. އޭނާގެ ހިތް ބާރަށް ތަޅެމުންދިޔައީ، ކުރިމަތީގައި ތިބި ދެ އަންހެން ކުދިންގެ ނަޒަރު އޭނާއަށް އަމާޒުވެފައިވުމުންނެވެ.

"އާ... އާލިޔާ،" ޒަޔާން އޭނާގެ އަޑު ހަމައަކަށް އަޅުވަން މަސައްކަތްކުރިއެވެ. "މިއީ ޔާނާ. މި ރިސޯޓުގެ ފޮޓޯގްރާފަރ. އެއްކަލަ ވިއްސާރަ ދުވަހު މިތަނުގައި ތާށިވި ދުވަހު ދިމާވި އެކުވެރިއެއް."

އާލިޔާގެ މޫނުމަތިން ފެނުނީ އުފާވެރި، އެކުވެރި ހިނިތުންވުމެކެވެ. އޭނާ އަތްދިއްކޮށްލިއެވެ. "ހެލޯ ޔާނާ. އަހަންނަކީ އާލިޔާ. ޒަޔާން މި ރިސޯޓުގެ ވާހަކަ ވަރަށް ދައްކާ."

"ހެލޯ..." ޔާނާ ސަލާމްކޮށްލިއެވެ. ނަމަވެސް އޭނާގެ ދެލޮލުން ފެންނަމުންދިޔައީ ފޮރުވަން އުޅުނު ނުތަނަވަސްކަމެކެވެ. ޒަޔާންގެ އުޅުމަށް އައި ކުއްލި ބަދަލާއި، އޭނާ އާލިޔާގެ ކުރިމަތީގައި ޔާނާއާ މާ ދުރުން ވާހަކަދައްކަން އުޅުނު ގޮތުން، ޔާނާގެ ހިތުގައި ސުވާލުތަކެއް އުފެދުނެވެ.

"ޒަޔާން، ރޫމް މިހާރު ރެޑީވެފަ ކައްނޭގެ ހުންނާނީ،" އާލިޔާ ޒަޔާންގެ އަތުގައި ހިފާލަމުން ބުންޏެވެ. "ހިނގާ ދާން. ވަރަށް ވަރުބަލި."

"އާނ... ހިނގާ،" ޒަޔާން އަވަސް އަވަހަށް ބުންޏެވެ. އަދި ޔާނާއަށް ބަލާލިއެވެ. "ޔާނާ... ދަނީ އިނގޭ."

ޔާނާ ހަމައެކަނި ބޯޖަހާލިއެވެ. ޒަޔާން އާލިޔާއާއެކު ހިނގައިގަތީ، ޔާނާއާ ވީހާވެސް ދުރުވާން ބޭނުންވެފައި ހުރި ގޮތަކަށެވެ. އޭނާގެ މޫނުމަތިން ފެންނަމުންދިޔަ ހާސްކަމާއި، ޔާނާއާ ހަތަރުކަޅި ހަމަނުކުރަން އުޅުނު އުޅުން ޔާނާއަށް ވަރަށް ރަނގަޅަށް ފާހަގަކުރެވުނެވެ. ޔާނާގެ ހިތުގައި ކުޑަ ރިއްސުމެއް އުފެދުނެވެ. 

އެރޭގެ އިރުއޮއްސުނު ވަގުުތު އާލިޔާ ބޭނުންވީ ރިސޯޓުގެ މައި ރެސްޓޯރެންޓުގައި ޒަޔާންގެ އުފަންދުވަހުގެ ކުރީރޭގެ ޚާއްސަ ރޭގަނޑުގެ ކެއުމެއް ބޭއްވުމަށެވެ. އާލިޔާ ހުރީ އިންތިހާއަށް އުފަލުންނެވެ. 

ނަމަވެސް، ޒަޔާން އިނީ މޭޒުދޮށުގައި ނުހަނު ނުތަނަވަސްވެފައެވެ. އޭނާގެ ދެލޯ ވަގުވަގަށް ހޯދަމުންދިޔައީ ޔާނާއެވެ.

އިއްތިފާގުން، ރެސްޓޯރެންޓުގައި އޮތް ސެލަބްރޭޝަނެއްގެ ފޮޓޯ ނަގަމުންދިޔަ ޔާނާ، އެމީހުންގެ މޭޒާ ކައިރިއަށް އައެވެ.

"އޯ، ޔާނާ!" އާލިޔާ ގޮވާލިއެވެ. "އާދެބަލަ މިތަނަށް. އަހަރެމެން ދެމީހުންގެ ރީތި ފޮޓޯއެއް ނަގައިދީބަލަ!"

ޒަޔާންގެ ނޭވާ ތާށިވިއެވެ. ޔާނާ މަޑުމަޑުން އެމީހުންގެ މޭޒާ ކައިރިވެލިއެވެ. އާލިޔާ ޒަޔާންގެ ކޮނޑުގައި ބޯއެޅުމަށްފަހު، ލޯބިން ހިނިތުންވެލިއެވެ.

"ޒަޔާން، ސްމައިލް ކޮށްލަބަލަ!" އާލިޔާ ބުންޏެވެ.

ޔާނާ ކެމެރާ ނަގައި، އޭގެ ލެންސުން ޒަޔާންއަށް ބަލާލިއެވެ. ކެމެރާގެ ސްކްރީނުން ޔާނާއަށް ފެނުނީ ޒަޔާންގެ މޫނުމަތީގައިވާ ގަދަކަމުން ވެފައިވާ ހިނިތުންވުމާއި، އޭނާގެ ލޮލުގައިވާ ކުށްވެރިކަމުގެ އިހުސާސެވެ. ޔާނާގެ އަތް ތުރުތުރުލައިގަތެވެ.

"1... 2... 3،" ޔާނާ ފޮޓޯ ނެގިއެވެ.

"ތޭންކްސް ޔާނާ!" އާލިޔާ އުފަލުން ބުންޏެވެ.

ޔާނާ މަޑުމަޑުން ބޯޖަހާލުމަށްފަހު، އެތަނުން ދާން ހިނގައިގަތެވެ. ނަމަވެސް އޭނާ ދިޔައީ ޒަޔާންއަށް ސީދާ ބަލާލުމަށްފަހުގައެވެ. އެ ބަލާލުމުގައިވާ މާނަ ޒަޔާންއަށް ވަރަށް ރަނގަޅަށް ވިސްނުނެވެ. ޔާނާއަށް ހުރިހާ ކަމެއް ސާފުވެއްޖެއެވެ. ޒަޔާން އެއުޅެނީ ދެ ދުނިޔެއެއްގެ މެދުގައި ތާށިވެގެންނެވެ.