69 ވަނަ ކޮމަންވެލްތު ޕާލިމެންޓަރީ ކޮންފަރެންސްގައި ބައިވެރިވަޑައިގަތުމަށް ރާއްޖޭގެ ރައްޔިތުންގެ މަޖިލީހުގެ މަތީ ފަންތީގެ ވަފުތެއް އެފްރިކާއަށް ފުރާވަޑައިގެންފި އެވެ.

މިއަދުން ފެށިގެން މި މަހުގެ 19 ވަނަ ދުވަހާ ހަމައަށް ކުރިއަށްދާ މި ކޮންފަރެންސް އޮންނަނީ ސައުތު އެފްރިކާގެ ކޭޕް ޓައުންގަ އެވެ.

މިއީ ސައުތު އެފްރިކާގެ ގާނޫނު ހަދާ މަޖިލީހާއި ސީޕީއޭ ސައުތު އެފްރިކާ ބްރާންޗުން ގުޅިގެން އިންތިޒާމްކުރާ ކޮންފަރެންސް އެކެވެ. މި ކޮންަފަރެންސްގައި ކޮމަންވެލްތުގެ ޤައުމުތަކުގެ މެދުގައި ޕާލިމެންޓަރީ ޑިމޮކްރަސީ އިތުރަށް ހަރުދަނާކުރުމަށާއި، ވެރިކަން ހިންގުމުގެ ނިޒާމުތައް ހަރުދަނާކުރުމަށް މަޝްވަރާކުރުމަށް ހަމަޖެހިފަ އެވެ.

މީގެ އިތުރުން، ބައިނަލްއަޤްވާމީ ޤާނޫނުތަކާއި ދެފަރާތުގެ މަޞްލަޙަތު ހިމެނޭ އެކި ދާއިރާތަކުން ގުޅުން ބަދަހިކުރުމާ ގުޅޭގޮތުން ކޮމަންވެލްތުގެ އެކި ޤައުމުތަކުގެ ޤާނޫނު ހަދާ މަޖިލިސްތަކުގެ މެންބަރުންނާއި އިސް އޮފިޝަލުން މި ކޮންފަރެންސްގައި ފުޅާ ދާއިރާއެއްގައި މަޝްވަރާކުރައްވާނެ އެވެ.

މި ކޮންފަރެންސްގައި ބައިވެރިވެވަޑައިގަންނަވާ ރައްޔިތުންގެ މަޖިލީހުގެ ވަފުދުގައި ހިމެނިވަޑައިގަންނަވަނީ:

• ހުރާ ދާއިރާގެ މެންބަރު ޑރ. އަނާރާ ނަޢީމް
• ދިއްގަރު ދާއިރާގެ މެންބަރު އަދި ސީ.ޕީ.އޭ އޭޝިއާ ރީޖަނަލް ރެޕްރެޒެންޓެޓިވް އަޙްމަދު ނާޡިމް
• ހިތަދޫ މެދު ދާއިރާގެ މެންބަރު އަޙްމަދު އަޒާން މަރުޒޫޤު
• ގަލޮޅު އުތުރު ދާއިރާގެ މެންބަރު މުޙައްމަދު އިބްރާހީމް
• ރައްޔިތުންގެ މަޖިލީހުގެ އަމީން ޢާންމު އަލްއުސްތާޛާ ފާތިމަތު ނިޔުޝާ
• މަޖިލީހުގެ އިދާރާގެ ސީނިއަރ ފޮރިން ރިލޭޝަންސް އޮފިސަރ އަލްފާޟިލާ ޢާއިޝަތު އީމާން

މި ދަތުރުފުޅުގެ ސަބަބުން ކޮމަންވެލްތު ޕާލިމެންޓަރީ އެސޯސިއޭޝަނާއި ރާއްޖޭގެ ރައްޔިތުންގެ މަޖިލީހާ ދެމެދު އޮތް ގުޅުން އިތުރަށް ބަދަހިވެގެންދާނެ އެވެ. އަދި ބައިނަލްއަގްވާމީ މައިދާނުގައި ރާއްޖޭގެ މަޖިލީހުގެ ދައުރު ފުޅާވެގެންދާނެ ކަމަށްވެސް ބެލެވެ އެވެ.