ޖެހިގެން އައި ދުވަހުގެ ހެނދުނު މޫސުން މުޅިން އަލިކޮށްލިއެވެ. ސީޕްލޭން ފުރަން ތައްޔާރުވިއިރު، ޔާނާ ހުރީ ޖެޓީ މަތީގައި ކެމެރާ ހިފައިގެންނެވެ.

ޔަނާ ޒަޔާންއާ ދިމާލަށް ހަނާއަޅަމުން ދިން ހިނިތުންވުން، އެތައް އިރަކު ދުއްވި އިރުވެސް ޒަޔާންގެ ހަނދާނުން ނުފިލައެވެ.

މާލެއަށް ތިރިކުރުމާއެކު، ޒަޔާން އެންމެ ފުރަތަމަވެސް އަވަސްވެގަތީ އާލިޔާއާ ބައްދަލުކުރުމަށެވެ. މާލޭގެ ކާރޫބާރޫ ބޮޑު މަގުތައް ހުރަސްކޮށް، އޭނާ ދިޔައީ އާލިޔާގެ ގޭގެ ކައިރީގައި ހުރި ކުޑަ ކެފޭއަކަށެވެ. އާލިޔާ އިނީ އޭނާގެ އިންތިޒާރުގައެވެ.

"ޒަޔާން!" އާލިޔާގެ މޫނުމަތިން ފެނުނީ ފުން އުފާވެރިކަމެކެވެ. އޭނާ ތެދުވެ ޒަޔާންގެ ގައިގައި ބައްދާލިއެވެ. "ރޭގައި އަހަރެން ވަރަށް ބިރުގަތް އެހާ ވިއްސާރަވީމަ. ސޭފްކޮށް އާދެވުނީމާ ވަރަށް އުފާވެއްޖެ."

"އާނ... ރޭގައި މާ ބޮޑަށް ވިއްސާރަ ވީމަ ރިސޯޓުގައި ތާށިވީވެސް،" ޒަޔާން އިށީންނަމުން ބުންޏެވެ.

ދެމީހުން ކޮފީ ބޯން ތިބިއިރު، އާލިޔާ ދެއްކީ ހޮސްޕިޓަލުގެ ބުރަ މަސައްކަތުގެ ވާހަކައާއި، ކުރިއަށް އޮތް ބޮޑު ސަރޖަރީތަކުގެ ވާހަކަތަކެވެ. އާދައިގެ މަތިން އާލިޔާގެ މުޅި ދުނިޔެ އެނބުރެނީ އޭނާގެ ވަޒީފާގެ ވަށައިގެންނެވެ. ޒަޔާން އާލިޔާގެ ވާހަކަތަކަށް އަޑުއަހަން އިނެވެ. ނަމަވެސް، އޭނާގެ ޚިޔާލުތައް ވަނީ އެހެން ތަނެއްގައެވެ.

އޭނާގެ ސިކުނޑީގައި ސިފަވަމުންދިޔައީ ރޭގައި ޔާނާއާއެކު ހޭދަވި ލުއިފަސޭހަ، ހަމަޖެހޭ ވަގުތުކޮޅެވެ. ޔާނާގެ ސަކަރާތާއި، ދުނިޔެއަށް ބަލާ ތަފާތު ނަޒަރިއްޔާތެވެ. އާލިޔާގެ ކައިރީގައި އިނދެގެންވެސް، ޒަޔާންގެ ހިތް އެދެމުންދިޔައީ އެކަހަލަ ހަމަޖެހުމަކަށެވެ.

"ޒަޔާން... ކޮންކަމަކަށް ގެއްލިފަ؟" އާލިޔާ ސުވާލުކޮށްލިއެވެ. އޭނާ ޒަޔާންގެ އަތުގައި ހިފާލިއެވެ. "ކަމެއް ވީތަ؟"

"ނޫން... ހަމަ ކުޑަކޮށް ވަރުބަލީ،" ޒަޔާން ދޮގެއް ހަދާލިއެވެ. "ރޭގައި ރަނގަޅަށް ނުނިދޭތީ."

"އެހެންވިއްޔާ ދޭ ގެއަށް ގޮސް އަރާމުކޮށްލަން،" އާލިޔާ އޯގާތެރިކަމާއެކު ބުންޏެވެ. "އަހަރެންވެސް 1 ޖަހާއިރު ޑިއުޓީއަށް ދާން ޖެހޭ."

ޒަޔާން ގެއަށް އައިސް އެނދުގައި އޮށޯތް ނަމަވެސް، އޭނާއަކަށް ނުނިދުމެވެ. ފޯނު ނަގައި، އިންސްޓަގްރާމް ހުޅުވާލިއެވެ. އޭނާ ރޭގައި ޔާނާ ދިން ނަން ޖަހައިގެން ސާޗްކޮށްލިއެވެ. ޔާނާގެ ޕްރޮފައިލް ފެނުމާއެކު، އޭގެ ތެރޭގައި ހުރި ފޮޓޯތައް ބަލަން ފެށުނެވެ. އެއީ މުޅިންވެސް ދިރިއުޅުމުގެ ރީތިކަމާއި އުފާވެރިކަން ދައްކުވައިދޭ މަންޒަރުތަކެވެ.

އެވަގުތު، ޔާނާގެ އާ ކެޕްޝަނަކާއެކު ފޮޓޯއެއް އަޕްލޯޑްވިއެވެ. އެއީ ރޭގައި ޒަޔާން ސީޕްލޭންއިން ފޭބި މަންޒަރުގެ ފޮޓޯއެވެ. އޭގެ ތިރީގައި ލިޔެފައިވެއެވެ: 'ނުބައި މޫސުމެއްގެ ތެރެއިން ލިބުނު އާދަޔާޚިލާފު އެކުވެރިކަމެއް.'

ޒަޔާންގެ ތުންފަތްމައްޗަށް ހިނިތުންވުމެއް ވެރިވިއެވެ. އޭނާގެ ހިތް ބާރަށް ތަޅެން ފެށިއެވެ. އާލިޔާއަށް އޮތް ލޯބި ހިތުގައި އޮތް ނަމަވެސް، ޔާނާގެ އިހުސާސްތައް އޭނާގެ ހިތުގައި މޫނަގަމުންދާކަން ޒަޔާންއަށް ގަބޫލުކުރެވުނެވެ.

ޖެހިގެން އައި ދުވަހު، ޒަޔާންއަށް އަނެއްކާވެސް ލިބުނީ އެޒޫރް ބްލޫ ރިސޯޓަށް ދާންޖެހޭ ފްލައިޓެކެވެ. މާލޭގެ އެއާޕޯޓުގައި ހުރެ، އޭނާ އާލިޔާއަށް ގުޅާލިއެވެ. ނަމަވެސް އާލިޔާ އިނީ ސަރޖަރީއެއްގައި ކަމުން ފޯނެއް ނުނެގިއެވެ.

ސީޕްލޭން ރިސޯޓުގެ ފަޅަށް ތިރިކޮށް، ޖެޓީއަށް މަޑުކޮށްލި ވަގުތު، ޒަޔާންގެ ދެލޯ ހޯދައިގަތީ ޔާނާއެވެ. ޖެޓީގެ ތަންކޮޅެއް ދުރުގައި ކެމެރާ ހިފައިގެން ޔާނާ ހުއްޓެވެ. އޭނާއަށް ޒަޔާން ފެނުމާއެކު، އަތުން އިޝާރާތްކޮށްލަމުން ބޮޑު ހިނިތުންވުމެއް ދިނެވެ.

ޒަޔާންގެ ހިތް ދެކަފިވަނީއެވެ. މާލޭގައި އޭނާއަށް އިތުބާރުކޮށްގެން ހުރި އާލިޔާއާއި، މި ރިސޯޓުން އޭނާގެ ހިތް އަތުލަމުންދާ ޔާނާގެ މެދުގައެވެ.

މި ވާހަކައިގެ ހަތަރު ވަނަ ބައި ގެނެސްދޭނީ އަންނަ ހުކުރު ދުވަހު އެވެ.