ރާއްޖޭގައި މިހާތަނަށް ޗާޕުކުރެވުނު އެންމެ ބޮޑު ފޮތް ކަމަށްވާ އިނގިރޭސި-ދިވެހި ރަދީފު ރަސްމީކޮށް ނެރެފިއެވެ.

މިއީ 1,992 ޞަފްޙާގެ މައްޗަށް އެކުލެވޭ، 120,000 އަށްވުރެ ގިނަ ބަސް ހިމެނޭ ބިޔަ އިނގިރޭސި-ދިވެހި ރަދީފެކެވެ.

ބަރުދަނުގައި 2.1 ކިލޯ ހުންނަ މި ފޮތަކީ ރާއްޖޭގެ މަޝްހޫރު ތަޢުލީމީ މާހިރު އަދި ޓައިޕޯގްރާފަރ ޑރ. ޙަސަން ޙަމީދު 8 އަހަރަށްވުރެ ދިގު މުއްދަތެއް ވަންދެން ކުރެއްވި ބުރަ މަސައްކަތުގެ ނަތީޖާއެވެ. މި ފޮތުގައި 120,000 އަށްވުރެ ގިނަ އިނގިރޭސި ބަހުގެ ދިވެހި މާނައާއި އެއާ ގުޅޭ ދިވެހި ބަސްތައް ހިމަނާފައިވެއެވެ.

މި ރަދީފު ނެރެދެއްވީ އިއްޔެ ދިވެހިރާއްޖޭގެ ޤައުމީ ޔުނިވަރސިޓީގައި ބޭއްވި ޚާއްޞަ ރަސްމިއްޔާތެއްގައި، ރާއްޖޭގެ ކުރީގެ ރައީސުލްޖުމްހޫރިއްޔާ އަލްއުސްތާޛު މައުމޫން ޢަބްދުލްޤައްޔޫމެވެ.

ޑރ. ޙަސަން ޙަމީދު ވިދާޅުވެފައިވަނީ، މި މަސައްކަތުގައި އެންމެ ބޮޑު ގޮންޖެހުމަކަށްވީ އެހާ ގިނަ މަޢުލޫމާތު އެއް ފޮތެއްގެ ތެރޭގައި ހިމެނުން ކަމަށެވެ. އެހެންކަމުން، ތާނަ އަކުރު ފަސޭހައިން ކިޔަން އެނގޭނެހެން އަދި 2,000 ޞަފްޙާއަށްވުރެ ފޮތް ބޮޑުވިޔަ ނުދިނުމަށްޓަކައި، މި ޕްރޮޖެކްޓަށް ޚާއްޞަކޮށްގެން އައު ފޮންޓެއް ފަރުމާކުރެއްވި ކަމަށް އެމަނިކުފާނު ވިދާޅުވިއެވެ.

ދިވެހިރާއްޖޭގެ ޤައުމީ ޔުނިވަރސިޓީގެ ވައިސް ޗާންސެލަރކަމާއި ޗާންސެލަރކަންވެސް ކުރައްވާފައިވާ ޑރ. ޙަސަން ޙަމީދަކީ ތަޢުލީމީ ދާއިރާއާއި، މަންހަޖު އެކުލަވާލުމާއި އަދި ޓެކްނޮލޮޖީގެ ރޮނގުން ގިނަ ޚިދުމަތްތަކެއް ކުރައްވާފައިވާ ބޭފުޅެކެވެ.

މީގެ އިތުރުން 'އެމްވީ ފަސޭހަ'، 'އެމްވީ އޭ ވަޙީދު'، 'އެމްވީ ޓައިޕްރައިޓަރ' އަދި 'އެމްވީ އިލްހާމް' ފަދަ އާންމުކޮށް ބޭނުންކުރާ ގިނަ ތާނަ ފޮންޓުތަކެއްވެސް ފަރުމާކުރައްވާފައިވަނީ އެމަނިކުފާނެވެ.

ފިޒިކްސް އަދި އިންފޮމޭޝަން ސައިންސްގެ ދާއިރާއިން މަތީ ތަޢުލީމު ހާސިލުކުރައްވާފައިވާއިރު، އެމަނިކުފާނު ޕީއެޗްޑީ ހާސިލުކުރެއްވީ ފިޒިކްސް އެޑިއުކޭޝަންގައި ކްރިޓިކަލް ތިންކިންގ އާ ގުޅޭގޮތުންނެވެ.