ޔަހޫދީ އިސްރާއީލުގެ ބޮޑު ނަތަންޔާހޫ ހައްޔަރުކުރުމަށް އިންޓަނޭޝަނަލް ކްރިމިނަލް ކޯޓް, އައިސީސީއީން އަމުރެއް ނެރުމަށް ތައްޔާރުވެފައިވާ ކަމުގެ މައުލޫމާތު އިތުބާރު ހުރި މަސްދަރުތަކުން ލިބިފައިވާ ކަމަށް އިސްރާއީލުގެ މީޑިއާތަކުން ރިޕޯޓްކޮށްފި އެވެ.

އިޒްރޭލުގެ ޗެނަލް 12 އިން ރިޕޯޓްކޮށްފައިވާ ގޮތުގައި އިޒްރޭލުގެ ބޮޑުވަޒީރު ނަތަންޔާހޫ ހިމެނޭ ގޮތަށް އިޒްރޭލުގެ އޮފިޝަލުން ހައްޔަރުކުރުމުގެ އަމުރެއް ނެރުމަށް އިންޓަނޭޝަނަލް ކްރިމިނަލް ކޯޓު (އައިސީސީ) ގެ ޕްރޮސެކިއުޓަރު ވިސްނަމުންދާ ކަމުގެ އިޝާރާތެއް އިސްރާއީލު ސަރުކާރަށް ލިބިފައިވާ ކަމަށެވެ.

އިސްރާއީލުން ހިފާފައިވާ ހުޅަނގު އައްސޭރި އާއި ޣައްޒާގައި އިޒްރޭލުން އަމަލުކުރާ ގޮތް އައިސީސީން ދަނީ ބަލަމުންނެވެ.

ނަތަންޔާހޫގެ އިތުރުން މި ތަހުގީގުތަކުގެ ސަބަބުން ޑިފެންސް މިނިސްޓަރު ޔޯވް ގަލަންޓާއި ޗީފް އޮފް ސްޓާފް ހަރްޒީ ހަލެވީ ހައްޔަރު ކުރުމުގެ އަމުރެއް ނެރުމަކީ އެކަށީގެންވާ ކަމެކެވެ.

އިޒްރޭލުގެ ނޫހެއް ކަމަށްވާ މާރިވް އިން ވެސް ބުނެފައި ވަނީ އައިސީސީން ހައްޔަރު ކުރުމުގެ އަމުރެއް ނެރުމުގެ ފުރުސަތު އޮތުމުން ނަތަންޔާހޫ ހުރީ ބިރުން އަދި އާދަޔާ ހިލާފަށް ހާސްވެފައި ކަމަށެވެ.

ހުކުރު ދުވަހު ޔަހޫދީ ނަތަންޔާހޫ އެކްސްގައި ކުރެއްވި ޕޯސްޓެއްގައި ބުނީ އޭނާގެ ލީޑާޝިޕްގެ ދަށުން ޣައްޒާގައި ކުރިޔަށްދާ ކަންކަމާއި ގުޅިގެން އައިސީސީން އަމިއްލަ ދިފާއުގައި ލިބިދޭ ހައްގަށް އުނިކަން ގެނައުމަށް ކުރާ އެއްވެސް މަސައްކަތެއް އިސްރާއީލުން ބަލައިނުގަންނާނެ ކަމަށެވެ.

އައިސީސީގެ މައްސަލައަކީ ބައިނަލްއަގުވާމީ ކޯޓް އޮފް ޖަސްޓިސް (އައިސީޖޭ) ގައި އިސްރާއީލާ ދެކޮޅަށް ހިނގަމުންދާ ގިނަ މައްސަލަތަކަކާ ވަކިން ހުށަހަޅާފައިވާ މައްސަލައެކެވެ. އައިސީޖޭ އުފެއްދީ ދައުލަތްތަކުގެ މެދުގައި އުފެދިފައިވާ ހަމަނުޖެހުންތައް ހައްލުކުރުމަށެވެ. އައިސީސީން ކުށުގެ ތުހުމަތުގައި ވަކި ވަކި ފަރުދުންގެ މައްޗަށް ދައުވާ ކުރެ އެވެ.