އދގެ ޢާންމު މަޖިލީހުގައި ފަލަސްތީނުގެ ބިމަށް ވެރިވެގަނެގެން އުޅޭ ޔަހޫދީންގެ ނިރުބަވެރި ބޮޑުވަޒީރު ބެންޖަމިން ނަތަންޔާހޫ ތަޤުރީރު ކުރަން އެރުމުން ޖަލްސާކުރާ މާލަން ދޫކޮށް ގިނަ ގައުމުތަކުން ނުކުމެއްޖެ އެވެ.

ނިއުޔޯކުގައި ކުރިޔަށްދާ 80 ވަނަ އދ ގެ އާންމު މަޖިލީހުގައި ތަގުރީރުކުރަން ނިރުބަވެރި ނަތަންޔާހޫއަށް ފުރުސަތު ދިނީ ނިއުޔޯކުގެ ގަޑިން ހެނދުނު އެވެ. ނަތަންޔާހޫ ތަގުރީގު ދޭން ޕޯޑިއަމަށް އެރުމުގެ ކުރީން މުޅި މާލަން އޮތީ އެއްކޮށް ފުރިފައިއެވެ. ނަމަވެސް ތަޤުރީރު ކުރުމަށް އޭނާ ޕޯޑިއަމް ދޮށަށް ދިޔުމުން އެތައް ޤައުމެއްގެ ވަފުދުތައް ވަނީ ނުރުހުން ފާޅުކުރުމުގެ ގޮތުން މާލަމުން ބޭރަށް ނިކުމެ، މާލަމް އެއްކޮށްހެން ހުސްކޮށްލައިފައެވެ. އޭގެ ތެރޭގައި ރާއްޖޭގެ ވަފުދުވެސް ހިމެނެއެވެ.

ކުށެއް ނެތް އެތައް ބަޔަކު ޝަހީދުކުރުމުގެ ފަހަތުގައި ހުރި ނަތަންޔާހޫ މިފަދައިން ދުނިޔޭގެ ގިނަ ގައުމުތަކަކުން ލަދުގަންނުވާލުމުން އެތައް ބަޔަކު އަންނަނީ އޭނާއަށް ހަޖޫޖަހަމުންނެވެ.

އ.ދ ގައި ތަގުރީރު ކުރަން ނަތަންޔާހޫ އަށް ފުރުސަތު ދިނުމުން ވެސް ގިނަ ބައެއްގެ ފާޑުކިޔުން ވަނީ އަމާޒުވެގެން ގޮސްފަ އެވެ. މި ޖަލްސާ އަށް ވަޑައިގަތުމަށް ފަލަސްތީނުގެ ރައީސް މަހުމޫދު އައްބާސް އަދި އެގައުމުގެ އޮފިޝަލުންނަށް ވިސާ ދޭން އެމެރިކާ އިން ވަނީ ދެކޮޅު ހަދައިފަ އެވެ. އައްބާސް މި ޖަލްސާގައި ތަގުރީރު ކުރެއްވީ ވީޑިއޯ މެދުވެރިކޮށެވެ.

އދ. ގެ އާންމު މަޖިލީހުގެ ޖަލްސާގައި ގިނަ ގައުމުތަކަކުން ވަނީ ފަލަސްތީނުގެ ދައުލަތް ބަލައިގަތުމަށް ނިންމައި އެކަން ރަސްމީކޮށް އިއުލާންކޮށްފަ އެވެ.

ޔަހޫދީން ދަނީ ޣައްޒާގެ ރައްޔިތުން އެ ސަހަރުން ބޭރުކުރާނެ ކަމަށް ފާޅުގައި ބުނަމުންނެވެ. ޔަހޫދީންގެ ޢުދުވާނީ ޙަމަލާތަކުގައި ޣައްޒާގެ 65،000އަށް ވުރެ ގިނަ މީހުން ޝަހީދުކޮށްލާފައިވާ އިރު، ޔަހޫދީން ދަނީ އެ ސަހަރަށް ކާބޯތަކެއްޗާއި އެހީގެ ސާމާނު އެތެރެކުރުމަށް ވެސް ހުރަސްއަޅަމުންނެވެ.