އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ޔުނައިޓެޑް އަރަބް އެމިރޭޓްސް (ޔޫއޭއީ) އަށް ވަޑައިގެން، އެ ގައުމުގެ ރައީސް ޝެއިޚް މުހައްމަދު ބިން ޒައިދު އަލް ނަހުޔާނާ އާދީއްތަ ދުވަހު ބައްދަލުކުރައްވާފައިވާ ކަން ދެ ގައުމުން ވެސް ރަސްމީކޮށް ހާމަކޮށްފިއެވެ.

މި ބައްދަލުވުމާ ބެހޭ ގޮތުން އިޒްރޭލުގެ މީޑިއާތަކުން ކުރިން ރިޕޯޓުކޮށްފައިވާއިރު، ނަތަންޔާހޫގެ އޮފީހާއި ޔޫއޭއީގެ ސަރުކާރުގެ މީޑިއާއިން މިހާރު ވަނީ އެ ހަބަރު ކަށަވަރުކޮށްދީފައެވެ.

މި ބައްދަލުވުމުގައި ދެ ލީޑަރުން މައިގަނޑު ގޮތެއްގައި މަޝްވަރާ ކުރެއްވީ ދެ ގައުމުގެ ދެމެދުގައި އޮތް ގުޅުން އިތުރަށް ވަރުގަދަކުރުމާ ގުޅޭ ގޮތުންނެވެ. އަދި އީރާނާ ގުޅިގެން މިހާރު ހިނގަމުންދާ ހަނގުރާމައިގެ ސަބަބުން ސަރަހައްދަށް ކުރިމަތިވެފައިވާ ގޮންޖެހުންތަކާ ބެހޭ ގޮތުން ވެސް ދެބޭފުޅުން ފުޅާ ދާއިރާއެއްގައި ވާހަކަދެއްކެވި ކަމަށް ރިޕޯޓުތައް ބުނެއެވެ.

އިޒްރޭލުގެ މީޑިއާތަކުން ރިޕޯޓުކުރާ ގޮތުގައި، ނަތަންޔާހޫގެ މި ދަތުރުފުޅުގެ އެއް މަގުސަދަކީ 2023 ވަނަ އަހަރުގެ އޮކްޓޫބަރު 7 ގައި ހަމާސްއިން ދިން ހަމަލާގެ ކުރިން، ޔޫއޭއީގެ ރައީސް އެކަމުގެ އިންޒާރެއް ނަތަންޔާހޫއަށް ދެއްވި ކަމަށް ބުނެ ފެތުރެމުންދާ ރިޕޯޓުތަކަށް ރައްދު ދެއްވުމެވެ. އެފަދަ އެއްވެސް އިންޒާރެއް ލިބިފައިވާ ކަމަށް ބުނާ ވާހަކަތައް ނަތަންޔާހޫ ވަނީ މީގެ ކުރިން ވެސް ތަކުރާރުކޮށް ދޮގުކުރައްވާފައެވެ.

މި ދަތުރުފުޅުގެ ހަބަރު އިޒްރޭލުގެ ޗެނަލް 12 އިން ފެތުރުމާ ގުޅިގެން، އެ ގައުމުގެ ސަލާމަތީ ހިދުމަތް ކަމަށްވާ ޝިން ބެއިތުން ވަނީ އެ ޗެނަލާ ދެކޮޅަށް ޗީފް މިލިޓަރީ ސެންސަރަށް ރަސްމީ ޝަކުވާއެއް ހުށަހަޅާފަ އެވެ. ބޮޑުވަޒީރުގެ އޮފީހުން ހާމަކުރި ގޮތުގައި، ދަތުރުފުޅު ނިމުމުގެ ކުރިން މީޑިއާއަށް ހަބަރު ތިލަވުމުގެ ސަބަބުން ނަތަންޔާހޫ އާއި، އެމަނިކުފާނުގެ އަނބިކަނބަލުން އަދި މޮސާދުގެ ވެރިޔާ ހިމެނޭ ވަފުދުގެ ސަލާމަތާއި ރައްކާތެރިކަމަށް ބޮޑެތި ނުރައްކާތަކެއް ކުރިމަތިވިއެވެ.

2020 ވަނަ އަހަރު ސޮއިކުރެވުނު ތާރީހީ 'އަބްރަހަމް އެކޯޑްސް' ގެ ދަށުން އިޒްރޭލާއެކު ރަސްމީ ގުޅުން ގާއިމުކުރި ޔޫއޭއީއަކީ އެމެރިކާގެ ގާތް ބައިވެރިއެކެވެ. މީގެއިތުރުން، އީރާނާ ކުރިމަތިލަމުންދާ ހަނގުރާމައިގެ ތެރޭގައި އިޒްރޭލުން ވަނީ ޔޫއޭއީގައި 'އަޔަން ޑޯމް' ދިފާއީ ނިޒާމް ވެސް ބަހައްޓާފައެވެ.