އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ އާދީއްތަ ދުވަހު ވަރަށް ސިއްރިއްޔާތުގައި ޔުނައިޓެޑް އަރަބް އެމިރޭޓްސް (ޔޫއޭއީ) އަށް ޒިޔާރަތް ކުރައްވައި، އެ ގައުމުގެ ރައީސް ޝައިޚް މުހައްމަދު ބިން ޒާޔިދު އަލް ނަހްޔާންއާ ބައްދަލުކުރައްވާފައިވާ ކަމަށް އިސްރާއީލުގެ މީޑިއާ ރިޕޯޓްތައް ބުނެފިއެވެ.

މި ދަތުރުފުޅުގެ މައުލޫމާތު ފަޅާއަރުވާލާފައިވަނީ އިސްރާއީލުގެ ޗެނަލް 12 (އެން12) އާއި އެ ގައުމުގެ އިތުރު މީޑިއާތަކުންނެވެ.

ރިޕޯޓުތައް ބުނާ ގޮތުގައި ނަތަންޔާހޫ ޔޫއޭއީގެ އަބޫދާބީއަށް ވަޑައިގެންނެވީ އަމިއްލަ އެގްޒެކެޓިވް ޖެޓެއްގައެވެ. އިސްރާއީލުގެ ބެން ގޫރިއަން އެއާޕޯޓުން މެންދުރު 12:00 ގެ އިރުކޮޅެއް ފަހުން ފުރައިގެން ދަތުރުކުރެއްވީ، މި އަހަރުގެ ކުރީކޮޅު އީރާނާއެކު ހިނގި ހަނގުރާމައިގެ ތެރޭގައިވެސް ޔޫއޭއީއަށް ދިޔުމަށް ބޭނުންކުރި އަމިއްލަ ބޯޓުގައެވެ. އަބޫދާބީގެ ގަޑިން މެންދުރުފަހު 3:10 ގައި އެއާޕޯޓުގައި ޖެއްސި މި ބޯޓުގައި ވަޑައިގެން ނަތަންޔާހޫ ވަނީ އަބޫދާބީގައި ގާތްގަނޑަކަށް ހަތަރު ގަޑިއިރު ހޭދަކުރައްވާފައެވެ. އަދި އެ ރޭ އިރުއޮއްސި 7:10 ހާއިރު އޭނާ ވަނީ އަނބުރާ އިސްރާއީލަށް ފުރާވަޑައިގެންފައެވެ.

މި ސިއްރު ބައްދަލުވުމާ ގުޅޭގޮތުން އިސްރާއީލުގެ ބޮޑުވަޒީރުގެ އޮފީހުންނާއި ޔޫއޭއީގެ ފޮރިން މިނިސްޓްރީންވެސް އެއްވެސް އެއްޗެއް ބުނަން އިންކާރުކޮށްފައިވާއިރު، މި ދަތުރާ ބެހޭ އިތުރު ތަފްސީލެއް އެއްވެސް ރަސްމީ އިދާރާއަކުން ހާމަކޮށްފައެއް ނުވެއެވެ.

ނަތަންޔާހޫ ސިއްރިއްޔާތުގައި މި ކުރު ދަތުރުފުޅު ކުރައްވާފައި މިވަނީ އިސްރާއީލުގެ އެތެރޭގެ ސިޔާސީ މަޝްރަހު ނުހަނު ގަޑުބަޑުވެފައިވާ ދަނޑިވަޅެއްގައެވެ. ހާއަރެޓްޒް އާއި ނިއުޔޯކް ޓައިމްސްގެ ތަހުގީގުތަކާ ހަވާލާދީ ރިޕޯޓުކޮށްފައިވާ ގޮތުގައި، 7 އޮކްޓޯބަރު 2023 ގައި ހަމާސްއިން ދޭން ރޭވި ބޮޑު ހަމަލާގެ ހަފުތާއެއްހާ ދުވަސް ކުރިން ޔޫއޭއީގެ ރައީސް މުހައްމަދު ބިން ޒާޔިދު ވަނީ އެކަމުގެ އިންޒާރު ސީދާ ނަތަންޔާހޫއަށް ދެއްވާފައެވެ. ނަމަވެސް، އެ މައުލޫމާތު އިސްރާއީލުގެ ސެކިއުރިޓީ ވެރިންނަށް ފޯރުކޮށްދިނުމުގައި ނަތަންޔާހޫ އިހުމާލުވި ކަމަށް އެ ރިޕޯޓުތަކުގައި ބުނެފައިވެއެވެ. އެހެންނަމަވެސް، ނަތަންޔާހޫ ވަނީ އެ މައުލޫމާތު ދޮގުކޮށް، އެފަދަ އިންޒާރެއް ލިބިވަޑައިގެންނެވި ކަމަށް ކުރެވޭ ތުހުމަތުތައް މުޅިން އިންކާރު ކުރައްވާފައެވެ.

މީގެއިތުރުން، 2026 ވަނަ އަހަރުގެ ކުރީކޮޅު އީރާނާއެކު ހިނގި ސަރަހައްދީ ހަނގުރާމައަށްފަހު އިސްރާއީލާއި ޔޫއޭއީގެ ގުޅުން ވަނީ ވަރަށް ބޮޑަށް ބަދަހިވެގެން ގޮސްފައެވެ. އެ ހަނގުރާމައިގެ ތެރޭގައި އިސްރާއީލުން ވަނީ ވަގުތީ ގޮތުން އެމިރޭޓްސްއަށް އައިރަން ޑޯމް މިސައިލް ދިފާއީ ނިޒާމާއި އިސްރާއީލުގެ އޮޕަރޭޓަރުން ފޯރުކޮށްދީފައެވެ.