ނެޓްބޯޅަ: އޯޕަން ޑިވިޝަންގެ ފައިނަލުން ފޯ ދަ ވައިބްސް އަދި ޔުނިކޯންސް ޖާގަހޯދިއިރު، ތިންވަނަ ޑައިމަންޑްސްއަށް

މިހާރު ކުރިއަށްދާ މައިލޯ ރަމަޟާން ހާފްކޯޓް ނެޓްބޯޅަ ޗެލެންޖް 2026 ގެ އޯޕަން ޑިވިޝަންގެ ފައިނަލުން ފޯ ދަ ވައިބްސް އަދި އެފްއެސްސީ ޔުނިކޯންސް ޖާގަ ހޯދިއިރު، މުބާރާތުގެ ތިންވަނަ ޑައިމަންޑްސް އިން ހޯދައިފިއެވެ.

މުބާރާތުގެ އޯޕަން ޑިވިޝަން ސެމީފައިނަލުގެ ފުރަތަމަ މެޗުގައި ފޯ ދަ ވައިބްސް އާއި ކުއީންސް ވާދަކުރިއިރު، މެޗުގެ ފުރަތަމަ ހާފުގެ ކުޅުން ނިމިގެންދިޔައީ ތިން ޕޮއިންޓްގެ ލީޑަކާއެކު 6-3 ގެ ނަތީޖާއަކުން ފޯ ދަ ވައިބްސް ކުރީގައި އޮވެގެންނެވެ. އަދި ދެވަނަ ހާފުގައި ފޯ ދަ ވައިބްސް އިން އިތުރު ތިން ޕޮއިންޓް ހޯދިއިރު، މިހާފުގައި ކުއީންސް އިން ވަނީ އިތުރު ހަތަރު ޕޮއިންޓް ހޯދާފައެވެ. މިއާއެކު 7-9 ގެ ނަތީޖާއަކުން ފޯ ދަ ވައިބްސް މެޗު ކާމިޔާބުކުރިއިރު، މެޗުގެ މޮޅު ކުޅުންތެރިއަކަށް ހޮވުނީ އެޓީމުގެ އާމިނަތު ނަޒުހާން އެވެ.

އޯޕަން ޑިވިޝަން ސެމީފައިނަލުގެ ދެވަނަ މެޗުގައި އެފްއެސްސީ ޑައިމަންޑްސް އާއި އެފްއެސްސީ ޔުނިކޯންސް ވާދަކުރިއިރު، މެޗުގެ ފުރަތަމަ ހާފުގެ ކުޅުން ނިމިގެންދިޔައީ ވާދަވެރި ކުޅުމަކަށްފަހު 4-4 ގެ ނަތީޖާއަކުން ދެޓީމު އެއްވަރުވެފައި އޮވެގެންނެވެ. އަދި ދެވަނަ ހާފުގައި ޔުނިކޯންސް އިން އިތުރު ފަސް ޕޮއިންޓް ހޯދިއިރު. މިހާފުގައި ޑައިމަންޑްސްއަށް ހޯދިފައިވަނީ ހަތަރު ޕޮއިންޓެވެ. މިއާއެކު 9-8 ގެ ނަތީޖާއަކުން ޔުނިކޯންސް މެޗު ކާމިޔާބުކުރިއިރު، މެޗުގެ މޮޅު ކުޅުންތެރިއަކަށް ހޮވުނީ އެޓީމުގެ ކިޔާނީ ބިންތް ޝައްފާޒް އެވެ.

މީގެ އިތުރުން މިރޭ، އޯޕަން ޑިވިޝަންގެ ތިންވަަނަ ހޮވަން ކުޅުނު މެޗުގައި ކުއީންސް އާއި އެފްއެސްސީ ޑައިމަންޑްސް ވާދަކުރިއިރު، މެޗުގެ ފުރަތަމަ ހާފުގެ ކުޅުން ނިމިގެންދިޔައީ ވާދަވެރި ކުޅުމަކަށްފަހު 2-3 ގެ ނަތީޖާއަކުން ކްއީންސް ކުރީގައި އޮވެގެންނެވެ. އަދި ދެވަނަ ހާފުގައި ޑައިމަންޑްސް އިން އިތުރު ހަ ޕޮއިންޓް ހޯދިއިރު މިހާފުގައި ކްއީންސްއަށް ހޯދިފައިވަނީ އިތުރު ހަތަރު ޕޮއިންޓެވެ. މިއާއެކު 7-8 ގެ ނަތީޖާއަކުން ޑައިމަންޑްސް މެޗު ކާމިޔާބުކުރިއިރު. މެޗުގެ މޮޅު ކުޅުންތެރިއަކަށް ހޮވުނީ އެޓީމުގެ އިންޝާ ބިންތް ޝިހާބް އެވެ.

23 ފެބުރުއަރީ 2025 އިން 05 މާރިޗު 2026 ނިޔަލަށް ކުރިއަށްދާ މި މުބާރާތުގެ އޯޕަން ކެޓަގެރީގައި މިއަހަރު ޖުމްލަ އަށް ޓީމަކުން ވާދަކުރިއިރު، މި ޑިވިޝަންގެ މެޗުތައް ކުރިއަށް ގެންގޮސްފައި ވަނީ ލީގު އުސޫލުން ކޮންމެ ޓީމެއް ކޮންމެ ޓީމަކާއި އެއްމެޗު ކުޅެ އެންމެ ރަނގަޅު ނަތީޖާއެއް ހޯދާ ހަތަރު ޓީމު ސެމީފައިނަލަށް ހޮވޭގޮތަށެވެ.