ނެޓްބޯޅަ: ނިންޖާސް ކަޓުވާލުމަށްފަހު ފައިޓާރސް އިން ސެމީފައިނަލް ޔަގީންކޮށްފި

މިހާރު ކުރިއަށްދާ މައިލޯ ރަމަޟާން ހާފްކޯޓް ނެޓްބޯޅަ ޗެލެންޖް 2026 ގެ ސީނިއާ ކެޓަގެރީގައި މިރޭ ނިންޖާސް ކަޓުވާލުމަށްފަހު ފައިޓާރސް އިން ސެމީފައިނަލްގެ ޖާގައެއް ކަށަވަރުކޮށްފިއެވެ.

މުބާރާތުގެ ސީނިއާ ޑިވިޝަންގައި މިރޭ ކުޅުނު ފުރަތަމަ މެޗުގައި ހައި ފްލަޔާސް އާއި ވޯރިއާސް ވާދަކުރިއިރު، މެޗުގެ ފުރަތަމަ ހާފުގެ ކުޅުން ނިމިގެންދިޔައީ 4-3 ގެ ނަތީޖާއަކުން ފްލަޔާސް ކުރީގައި އޮވެގެންނެވެ. އަދި ދެވަނަ ހާފުގައި ފްލެޔާސް އިން އިތުރު ހަތަރު ޕޮއިންޓް ހޯދިއިރު، މިހާފުގައި ވޯރިއާސްއަށް ހޯދިފައިވަނީ އެންމެ ޕޮއިންޓެކެވެ. މިއާއެކު 4-8 ގެނަތީޖާއަކުން ފްލަޔާސް މެޗު ކާމިޔާބުކުރިއިރު، މިމެޗުގެ މޮޅު ކުޅުންތެރިއަކަށް ހޮވުނީ އެޓީމުގެ އިންޝާ ބިންތް ޝިހާބް އެވެ.

މިރޭގެ ދެވަނަ މެޗުގައި ޝޫޓާސް އާއި ދަ ބޯލްޓްސް ވާދަކުރިއިރު، މެޗުގެ ފުރަތަމަ ހާފުގެ ކުޅުން ނިމިގެންދިޔައީ 0-6 ގެ ނަތީޖާއަކުން ޝޫޓާރސް ކުރީގައި އޮވެެގެންނެވެ. އަދި ދެވަނަ ހާފުގައި ޝޫޓާރސް އިން އިތުރު ތިން ޕޮއިންޓް ހޯދިއިރު މިހާފުގައި ދަ ބޯލްޓްސް އިން ވަނީ ހަތަރު ޕޮއިންޓް ހޯދާފައެވެ. މިއާއެކު 4-9 ގެ ނަތީޖާއަކުން ޝޫޓާރސް މެޗު ކާމިޔާބުކުރިއިރު، މިމެޗުގެ މޮޅު ކުޅުންތެރިއަކަށް ހޮވުނީ އެޓީމުގެ ކަޔާނީ އެވެ.

މިރޭގެ ތިންވަނަ މެޗުގައި ނިންޖާސް އާއި ފައިޓާރސް ވާދަކުރިއިރު، މެޗުގެ ފުރަތަމަ ހާފު ނިމިގެންދިޔައީ 1-2 ގެ ނަތީޖާއަކުން ފައިޓާރސް ކުރީގައި އޮވެގެންނެވެ. އަދި ދެވަނަ ހާފުގައި ފައިޓާރސް އިން އިތުރު ދެ ޕޮއިންޓް ހޯދިއިރު، މިހާފުގައި ނިންޖާސްއަށް ހޯދިފައިވަނީ އެންމެ ޕޮއިންޓެކެވެ. މިއާއެކު 4-2 ގެ ނަތީޖާއަކުން ފައިޓާރސް މެޗު ކާމިޔާބުކުރިއިރު، މި މެޗުގެ މޮޅު ކުޅުންތެރިއަކަށް ހޮވުނީ އެޓީމުގެ ފާތުމަތު އީނަލް އެވެ.

މީގެ އިތުރުން މިރޭގެ ހަތަރުވަނަ މެޗުގައި ފަލްކަންސް އާއި އެޓޭކާރސް ވާދަކުރިއިރު. މެޗުގެ ފުރަތަމަ ހާފުގެ ކުޅުން ނިމިގެންދިޔައި 3-1 ގެ ނަތީޖާއަކުން އެޓޭކާރސް ކުރީގައި އޮވެގެންނެވެ. އަދި ދެވަނަ ހާފުގައި އެޓޭކާރސް އިން އިތުރު ހަތަރު ޕޮއިންޓް ހޯދިއިރު މިހާފުގައި ފަލްކަންސްއަށް ހޯދިފައިވަނީ އެންމެ ޕޮއިންޓެކެވެ. މިއާއެކު 7-2 ގެ ނަތީޖާއަކުން އެޓޭކާރސް މެޗު ކާމިޔާބުކުރިއިރު، މި މެޗުގެ މޮޅު ކުޅުންތެރިއަކަށް ހޮވުނީ އެޓީމުގެ ލިބާ ވާސިފް ވަހީދު އެވެ.

މިނަތީޖާތަކާއެކު ލީގުބުރުގައި ކުޅުނު ހަތް މެޗުން ވެސް މޮޅުވެ 21 ޕޮއިންޓާއެކު ހައި ފްލަޔާސް ތާވަލުގެ އެއްވަނަ ޔަގީންކުރިއިރު، ދެވަނައިގައި އޮތް ފައިޓާރސްއަށް ހަތް މެޗުން ލިބިފައިވަނީ 14 ޕޮއިިންޓެެވެ. އަދި 13 ޕޮއިންޓާއެކު ތާވަލުގެ ތިންވަނައިގައި ޝޫޓާރސް އޮތްއިރު، ހަތަރުވަނައިގައި އޮތް އެޓޭކާރސްއަށް ހަތް މެޗުން ލިބިފައިވަނީ 13 ޕޮއިިންޓެވެ.

23 ފެބުރުއަރީ 2025 އިން 05 މާރިޗު 2026 ނިޔަލަށް ކުރިއަށްދާ މި މުބާރާތުގެ ސީނިއާ ކެޓަގެރީގައި މިއަހަރު ޖުމްލަ އަށް ޓީމަކުން ބައިވެރިވެފައިވާއިރު، މިޑިވިޝަންގެ މެޗުތައް ކުރިއަށް ގެންދިއުމަށް ހަމަޖެހިފައިވަނީ ލީގު އުސޫލުން ކޮންމެ ޓީމެއް ކޮންމެ ޓީމަކާއި އެއްމެޗު ކުޅެ އެންމެ ރަނގަޅު ނަތީޖާއެއް ހޯދާ ހަތަރު ޓީމު ސެމީފައިނަލަށް ހޮވޭގޮތަށެވެ.

އެގޮތުން ސެމީފައިނަލްގެ ފުރަތަމަ މެޗުގައި ލީގު ބުރުގެ އެއްވަނަ ޓީމާއި ހަތަރުވަނަ ޓީމު ވާދަކުރާއިރު، ސެމީފައިނަލުގެ ދެވަނަ މެޗުގައި ލީގުބުރުގެ ދެވަނަ ޓީމު ވާދަކުރަންޖެހޭނީ ލީގުބުރުގެ ތިންވަނަ ޓީމައި ދެކޮޅަށެވެ.