ނެޓްބޯޅަ: ލީގުބުރުގެ ފަހު މެޗުގައި ޔުނިކޯންސް އަތުން ބަލިވެ ކުލަބު ހުޅު މުބާރާތުން ކަޓައިފި

މިހާރު ކުރިއަށްދާ މައިލޯ ރަމަޟާން ހާފްކޯޓް ނެޓްބޯޅަ ޗެލެންޖް 2026 ގެ އޯޕަން ކެޓަގެރީގައި މިރޭ އެފްއެސްސީ ޔުނިކޯންސް އަތުން ބަލިވެ ކުލަބު ހުޅުނު މުބާރާތުން ކަޓައިފިއެވެ.

މުބާރާތުގެ އޯޕަން ކެޓަގެރީގައި މިރޭ ކުޅުނު ފުރަތަމަ މެޗުގައި އެފްއެސްސީ ފަޔާރސް އާއި އެފްއެސްސީ އެލީޓް ސްޕާކްސް ވާދަކުރިއިރު، މެޗުގެ ފުރަތަމަ ހާފުގެ ކުޅުން ނިމިގެންދިޔައީ 5-5 ގެ ނަތީޖާއަކުން ދެޓީމު އެއްވަރުވެފައި އޮވެެގެންނެވެ. އަދި ދެވަނަ ހާފުގައި ފަޔާރސް އިން އިތުރު ހަ ޕޮއިންޓް ހޯދިއިރު މިހާފުގައި އެލީޓް ސްޕާކްސް އިން ވެސް ވަނީ އިތުރު ހަތަރު ޕޮއިންޓް ހޯދާފައެވެ. މިއާއެކު 9-11 ނަތީޖާއަކުން ފަޔާރސް މެޗު ކާމިޔާބުކުރިއިރު މިމެޗުގެ މޮޅު ކުޅުންތެރިއަކަށް ހޮވުނީ އެޓީމުގެ އީލަފް އެވެ.

އޯޕަން ކެޓަގެރީގައި މިރޭ ކުޅުނު ދެވަނަ މެޗުގައި އެފްއެސްސީ ޔުނިކޯންސް އާއި ކުލަބު ހުޅު ވާދަކުރިއިރު، މެޗުގެ ފުރަތަމަ ހާފުގެ ކުޅުން ނިމިގެންދިޔައީ ތިން ޕޮއިންޓްގެ ލީޑަކާއެކު 5-2 ގެ ނަތީޖާއަކުން ޔުނިކޯންސް ކުރީގައި އޮވެގެންނެވެ. އަދި ދެވަނަ ހާފުގައި ޔުނިކޯންސް އިން އިތުރު ހަ ޕޮއިންޓް ކާމިޔާބުކުރިއިރު، މިހާފުގައި ކުލަބު ހުޅަށް ހޯދިފައިވަނީ އިތުރު އެއްޕޮއިންޓެވެ. މިއާއެކު 11-3 ގެ ތަފާތުބޮޑު ނަތީޖާއަކުން ޔުނިކޯންސް މެޗު ކާމިޔާބުކުރިއިރު، މިމެޗުގެ މޮޅު ކުޅުންތެރިއަކަށް ހޮވުނީ އެޓީމުގެ އަމްސާ އަބްދުﷲ ހަނީފް އެވެ.

އޯޕަން ކެޓަގެރީގައި މިރޭ ކުޅުމަށް ހަމަޖެހިފައިއޮތް ތިންވަނަ މެޗުގައި އެފްއެސްސީ ޑައިމަންޑްސް އާއި ހައި ފައިވްސް ވާދަކުރުމަށް ހަމަޖެހިފައި އޮތް މެޗަށް ހައި ފައިވްސް ހާޒިރު ނުވުމުން، މުބާރާތް އިންތިޒާމުކުރާ ފަރާތުން ވަނީ 3-0 ގެ ނަތީޖާއަކުން ޑައިމަންޑްސް މޮޅުވިކަމަށް ނިންމާފައެވެ.

މީގެ އިތުރުން މިރޭގެ ހަތަރުވަނަ މެޗުގައި ފޯ ދަ ވައިބްސް އާއި ކުއީންސް ވާދަކުރިއިރު، މެޗުގެ ފުރަތަމަ ހާފު ނިމިގެންދިޔައީ 2-4 ގެ ނަތީޖާއަކުން ފޯ ދަ ވައިބްސް ކުރީގައި އޮވެގެންނެވެ. އަދި ދެވަނަ ހާފުގައި ފޯ ދަ ވައިބްސް އިން އިތުރު ފަސް ޕޮއިންޓް ކާމިޔާބުކުރިއިރު، މިހާފުގައި ކުއީންސްއަށް ކާމިޔާބުކުރެވުނީ އެންމެ ދެ ޕޮއިންޓެވެ. މިއާއެކު 9-4 ގެ ނަތީޖާއަކުން ފޯ ދަ ވައިބްސް މެޗު ކާމިޔާބުކުރިއިރު މިމެޗުގެ މޮޅު ކުޅުންތެރިއަކަށް ހޮވުނީ އެޓީމުގެ އަލްމްރާ އަހުމަދު އަތީކް އެވެ.

މިނަތީޖާތަކާއެކު ލީގުބުރުގައި ކުޅުނު ހަތް މެޗުން ހޯދި 16 ޕޮއިންޓާއެކު ފޯ ދަ ވައިބްސް ތާވަލުގެ އެއްވަނަ ޔަގީންކުރިއިރު، ދެވަނައިގައި އޮތް އެފްއެސްސީ ޑައިމަންޑްސްއަށް ހަތް މެޗުން ވަނީ 15 ޕޮއިިންޓް ލިބިފައެވެ. އަދި 14 ޕޮއިންޓާއެކު ތާވަލުގެ ތިންވަނައިގައި އެފްއެސްސީ ޔުނިކޯންސް އޮތްއިރު، ހަތަރުވަނައިގައި އޮތް ކުއީންސްއަށް ހަތް މެޗުން ލިބިފައިވަނީ 13 ޕޮއިިންޓެވެ.

23 ފެބުރުއަރީ 2025 އިން 05 މާރިޗު 2026 ނިޔަލަށް ކުރިއަށްދާ މި މުބާރާތުގެ ސީނިއާ ކެޓަގެރީގައި މިއަހަރު ޖުމްލަ އަށް ޓީމަކުން ބައިވެރިވެފައިވާއިރު، މިޑިވިޝަންގެ މެޗުތައް ކުރިއަށް ގެންދިއުމަށް ހަމަޖެހިފައިވަނީ ލީގު އުސޫލުން ކޮންމެ ޓީމެއް ކޮންމެ ޓީމަކާއި އެއްމެޗު ކުޅެ އެންމެ ރަނގަޅު ނަތީޖާއެއް ހޯދާ ހަތަރު ޓީމު ސެމީފައިނަލަށް ހޮވޭގޮތަށެވެ.

އެގޮތުން ސެމީފައިނަލްގެ ފުރަތަމަ މެޗުގައި ލީގު ބުރުގެ އެއްވަނަ ޓީމާއި ހަތަރުވަނަ ޓީމު ވާދަކުރާއިރު، ސެމީފައިނަލުގެ ދެވަނަ މެޗުގައި ލީގުބުރުގެ ދެވަނަ ޓީމު ވާދަކުރަންޖެހޭނީ ލީގުބުރުގެ ތިންވަނަ ޓީމައި ދެކޮޅަށެވެ.