ނެޓްބޯޅަ: ތަފާތުބޮޑު ނަތީޖާއަކުން ނެޓް އެޓޭކާސް ބަލިކޮށް ލީގުބުރުގެ އެއްވަނަ ނެޓް ނިންޖާސް އިން ކަށަވަރުކޮށްފި

މިހާރު ކުރިއަށްދާ މައިލޯ ރަމަޟާން ހާފްކޯޓް ނެޓްބޯޅަ ޗެލެންޖް 2026 ގެ ޖޫނިއާރ ކެޓަގެރީގައި މިރޭ ކުޅުނު މެޗުގައި ފަސޭހަކަމާއެކު ނެޓް ނިންޖާސް ބަލިކޮށް ނެޓް ނިންޖާސް އިން ލީގު ބުރުގެ އެއްވަނަ ކަށަވަރުކޮށްފިއެވެ.

މުބާރާތުގައި ނެޓް ނިންޖާސް އެންމެ ފަހުން ކުޅުނު މެޗުގައި 4-3 ގެ ނަތީޖާއަކުން ސްޓާރސް އަތުން ބަލިވެފައިވާއިރު، ނެޓް އެޓޭކާސް އެންމެ ފަހުން ކުޅުނު މެޗުގައި ޕަވާ ޕަފް އަތުން އެޓީމު ބަލިވީ 1-5 ގެ ނަތީޖާއަކުންނެވެ. އަދި މިދެޓީމު ލީގު ބުރުގައި ކުޅުނު ފުރަތަމަ މެޗު 4-0 ގެ ނަތީޖާއަކުން ކާމިޔާބުކުރީ ނެޓް ނިންޖާސް އިންނެވެ.

މުޅި މެޗުގައި ވެސް މޮޅަށް ކުޅެ ނެޓް ނިންޖާސް އިން މެޗު ޑޮމިނޭޓްކުރިއިރު، ފުރަތަމަ ހާފުގެ ކުޅުނުން ނިމިގެންދިޔައީ 2-0 ގެ ނަތީޖާއަކުން ނެޓް ނިންޖާސް ކުރީގައި އޮވެގެންނެވެ. އަދި ދެވަަނަ ހާފުގައި ނެޓް ނިންޖާސް އިން އެޓީމުގެ އެޓޭކުތައް އިތުރަށް ވަރުގަދަކުރިއިރު، މިހާފުގައި އެޓީމުން ވަނީ އިތުރު ހަތަރު ޕޮއިންޓް ހޯދާފައެވެ. އާއެކު 6-0 ގެ ނަތީޖާއަކުން ނެޓް ނިންޖާސް މެޗު ކާމިޔާބުކުރިއިރު، މިމެޗުގެ މޮޅު ކުޅުންތެރިއަކަށް ހޮވިފައިވަނީ އެޓީމުގެ ސާރާ އަފްޒަލް އެވެ.

މި ނަތީޖާއެކު ލީގުބުރުގައި ކުޅުނު ހަތް މެޗުން ނެޓް ނިންޖާސްއަށް 12 ޕޮއިންޓް ލިބިފައިވާއިރު، އެޓީމުން ލީގުބުރު ނިންމާލީ ޕޮއިންޓްގެ ތަފާތުން ތާވަލުގެ އެއްވަނައިގައެވެ. އަދި ދެވަނައިގައި އޮތް ޕަވާ ޕަފްގެ އިތުރުން ތިންވަނައިގައި އޮތް ސްޓާރސް އިން ވެސް ހަތް މެޗުން 12 ޕޮއިންޓް ހޯދާފައިވާއިރު، މިމެޗުން ބަލިވި ނެޓް އެޓޭކާސް އިން ލީގުބުރު ނިންމާލީ ކުޅުނު ހަތް މެޗުން ވެސް ބަލިވެ ޕޮއިންޓެއް ނުލިބި ތާވަލުގެ ފުލުގައި އޮވެއެވެ.

23 ފެބުރުއަރީ 2025 އިން 05 މާރިޗު 2026 ނިޔަލަށް ކުރިއަށްދާ މިމުބާރާތުގެ ޖޫނިއަރ ކެޓަގެރީގައި މިއަހަރު ޖުމްލަ ހަތަރު ޓީމަކުން ބައިވެރިވެފައިވާއިރު، މިޑިވިޝަންގެ މެޗުތައް ކުރިއަށް ގެންދިއުމަށް ހަމަޖެހިފައިވަނީ ލީގު އުސޫލުން ކޮންމެ ޓީމެއް ކޮންމެ ޓީމަކާއި ދެމެޗު ކުޅުމަށްފަހު ބައިވެރި ހަތަރު ޓީމުގެ މެދުގައި ސެމީފައިނަލް ދެމެޗު ކުޅޭގޮތަށެވެ.

އެގޮތުން ސެމީފައިނަލްގެ ފުރަތަމަ މެޗުގައި ލީގު ބުރުގެ އެއްވަނަ ޓީމާއި ހަތަރުވަނަ ޓީމު ވާދަކުރާއިރު، ސެމީފައިނަލުގެ ދެވަނަ މެޗުގައި ލީގުބުރުގެ ދެވަނަ ޓީމު ވާދަކުރަންޖެހޭނީ ލީގުބުރުގެ ތިންވަނަ ޓީމައި ދެކޮޅަށެވެ.