ނެޓްބޯޅަ: ފްލަޔާސް އެއްވަނަ ޔަގީންކުރިއިރު، ޝޫޓާރސް، ނިންޖާސް އަދި ފައިޓާރސް އިން ސެމީފައިނަލް ޔަގީންކޮށްފި

މިހާރު ކުރިއަށްދާ މައިލޯ ރަމަޟާން ހާފްކޯޓް ނެޓްބޯޅަ ޗެލެންޖް 2026 ގެ ސީނިއާ ކެޓަގެރީގައި މިރޭ ކުޅުނު މެޗުތަކުން ހައި ފްލަޔާސް، އިން ލީގުބުރުގެ އެއްވަނަ ޔަގީންކުރިއިރު، ޝޫޓާރސް، ފައިޓާރސް އަދި ނިންޖާސް އިން ސެމީފައިނަލް ޔަގީންކޮށްފިއެވެ.

މުބާރާތުގެ ސީނިއާ ޑިވިޝަންގައި މިރޭ ކުޅުނު ފުރަތަމަ މެޗުގައި ހައި ފްލަޔާސް އާއި ފައިޓާސް ވާދަކުރިއިރު، މެޗުގެ ފުރަތަމަ ހާފުގެ ކުޅުން ނިމިގެންދިޔައީ 2-3 ގެ ނަތީޖާއަކުން ފްލަޔާސް ކުރީގައި އޮވެގެންނެވެ. އަދި ދެވަނަ ހާފުގައި ދެޓީމުންކުރެ ކޮންމެ ޓީމަކުން ވެސް އިތުރު ދެ ޕޮއިންޓް ހޯދާފައެވެ. މިއާއެކު 6-5 ގެނަތީޖާއަކުން ފްލަޔާސް މެޗު ކާމިޔާބުކުރިއިރު، މިމެޗުގެ މޮޅު ކުޅުންތެރިއަކަށް ހޮވުނީ އެޓީމުގެ އަލީޝާ އަނަމް ކިނާން އެވެ

މިރޭގެ ދެވަނަ މެޗުގައި ޝޫޓާސް އާއި އެޓޭކާސް ވާދަކުރިއިރު، ފުރަތަމަ ހާފުގެ ކުޅުން ނިމިގެންދިޔައީ 1-3 ގެ ނަތީޖާއަކުން އެޓޭކާސް ކުރީގައި އޮވެެގެންނެވެ. އަދި ދެވަނަ ހާފުގައި އެޓޭކާސް އިން އިތުރު ހަތަރު ޕޮއިންޓް ހޯދިއިރު މިހާފުގައި ޝޫޓާރސްއަށް ހޯދިފައިވަނީ އެންމެ ޕޮއިންޓެކެވެ. މިއާއެކު 2-7 ގެ ނަތީޖާއަކުން އެޓޭކާރސް މެޗު ކާމިޔާބުކުރިއިރު، މިމެޗުގެ މޮޅު ކުޅުންތެރިއަކަށް ހޮވުނީ އެޓީމުގެ ލިބާ ވާސިފް ވަހީދު އެވެ.

މިރޭގެ ތިންވަނަ މެޗުގައި ނިންޖާސް އާއި ވޯރިއާސް ވާދަކުރިއިރު، މެޗުގެ ފުރަތަމަ ހާފު ނިމިގެންދިޔައީ ހަތަރު ޕޮއިންޓްގެ ލީޑަކާއެކު 1-5 ގެ ނަތީޖާއަކުން ނިންޖާސް ކުރީގައި އޮވެގެންނެވެ. އަދި ދެވަނަ ހާފުގައި ނިންޖާސް އިން އިތުރު ފަސް ޕޮއިންޓް ހޯދިއިރު، މިހާފުގައި ވޯރިއާސް އިން ވެސް ވަނީ އިތުރު ތިން ޕޮއިންޓް ހޯދާފައެވެ. މިއާއެކު 4-10 ގެ ނަތީޖާއަކުން ނިންޖާސް މެޗު ކާމިޔާބުކުރިއިރު، މި މެޗުގެ މޮޅު ކުޅުންތެރިއަކަށް ހޮވުނީ ނިންޖާސްގެ ފާތުމަތު ޝާލިނީ އަހުމަދު އެވެ.

މީގެ އިތުރުން މިރޭގެ ހަތަރުވަނަ މެޗުގައި ފަލްކަންސް އާއި ދަ ބޯލްޓްސް ވާދަކުރިއިރު. މެޗުގެ ފުރަތަމަ ހާފުގެ ކުޅުން ނިމިގެންދިޔައި 3-2 ގެ ނަތީޖާއަކުން ބޯލްޓްސް ކުރީގައި އޮވެގެންނެވެ. އަދި ދެވަނަ ހާފުގައި ފަލްކަންސް އިން އިތުރު ދެ ޕޮއިންޓް ހޯދިއިރު މިހާފުގައި ބޯލްޓްސްއަށް ހޯދިފައިވަނީ އެންމެ ޕޮއިންޓެކެވެ. މިއާއެކު މެޗުގެ ކުޅުން ނިމިގެންދިޔައީ 4-4 ގެ ނަތީޖާއަކުން ދެޓީމު އެއްވަރުވެފައި އޮވެގެންނެވެ. އަދި މެޗުގެ މޮޅު ކުޅުންތެރިއަކަށް ހޮވުނީ ފަލްކަންސްގެ އެލީޒާ ހުސެއިން ސިނާން އެވެ.

23 ފެބުރުއަރީ 2025 އިން 05 މާރިޗު 2026 ނިޔަލަށް ކުރިއަށްދާ މި މުބާރާތުގެ ސީނިއާ ކެޓަގެރީގައި މިއަހަރު ޖުމްލަ އަށް ޓީމަކުން ބައިވެރިވެފައިވާއިރު، މިޑިވިޝަންގެ މެޗުތައް ކުރިއަށް ގެންދިއުމަށް ހަމަޖެހިފައިވަނީ ލީގު އުސޫލުން ކޮންމެ ޓީމެއް ކޮންމެ ޓީމަކާއި އެއްމެޗު ކުޅެ އެންމެ ރަނގަޅު ނަތީޖާއެއް ހޯދާ ހަތަރު ޓީމު ސެމީފައިނަލަށް ހޮވޭގޮތަށެވެ.

އެގޮތުން ސެމީފައިނަލްގެ ފުރަތަމަ މެޗުގައި ލީގު ބުރުގެ އެއްވަނަ ޓީމާއި ހަތަރުވަނަ ޓީމު ވާދަކުރާއިރު، ސެމީފައިނަލުގެ ދެވަނަ މެޗުގައި ލީގުބުރުގެ ދެވަނަ ޓީމު ވާދަކުރަންޖެހޭނީ ލީގުބުރުގެ ތިންވަނަ ޓީމައި ދެކޮޅަށެވެ.