ނެޓްބޯޅަ: ކުލަބު ހުޅު ބަލިކޮށް ފޯ ދަ ވައިބްސް އިން ސެމީފައިނަލް ކަަށަވަރުކޮށްފި

މިހާރު ކުރިއަށްދާ މައިލޯ ރަމަޟާން ހާފްކޯޓް ނެޓްބޯޅަ ޗެލެންޖް 2026 ގެ އޯޕަން ކެޓަގެރީގައި މިރޭ ކުޅުނު މެޗުތަކަށްފަހު ކުއީންސް އާއި ފޯ ދަ ވައިބްސްގެ އިތުރުން އެފްއެސްސީ ޑައިމަންޑްސް އިން މުބާރާތުގެ ސެމީފައިނަލްގެ ޖާގައެއް ކަށަވަރުކޮށްފިއެވެ.

މުބާރާތުގެ އޯޕަން ކެޓަގެރީގައި މިރޭ ކުޅުނު ފުރަތަމަ މެޗުގައި އެފްއެސްސީ ފަޔާރސް އާއި ހައި ފައިވްސް ވާދަކުރިއިރު، މެޗުގެ ފުރަތަމަ ހާފުގެ ކުޅުން ނިމިގެންދިޔައީ ފަސް ޕޮއިންޓްގެ ލީޑަކާއެކު 2-7 ގެ ނަތީޖާއަކުން ފަޔާރސް ކުރީގައި އޮވެެގެންނެވެ. އަދި ދެވަނަ ހާފުގައި ފަޔާރސް އިން އިތުރު ތިން ޕޮއިންޓް ހޯދިއިރު މިހާފުގައި ހައި ފައިވްސް އިން ވެސް ވަނީ އިތުރު ދެ ޕޮއިންޓް ހޯދާފައެވެ. މިއާއެކު 4-10 ނަތީޖާއަކުން ފަޔާރސް މެޗު ކާމިޔާބުކުރިއިރު މިމެޗުގެ މޮޅު ކުޅުންތެރިއަކަށް ހޮވުނީ އެޓީމުގެ ލިބާ ވާސިފް އެވެ.

އޯޕަން ކެޓަގެރީގައި މިރޭ ކުޅުނު ދެވަނަ މެޗުގައި އެފްއެސްސީ ޔުނިކޯންސް އާއި ކްއީންސް ވާދަކުރުއިރު، މެޗުގެ ފުރަތަމަ ހާފުގެ ކުޅުން ނިމިގެންދިޔައީ ދެ ޕޮއިންޓްގެ ލީޑަކާއެކު 5-3 ގެ ނަތީޖާއަކުން ޔުނިކޯންސް ކުރީގައި އޮވެގެންނެވެ. އަދި ދެވަނަ ހާފުގައި ޔުނިކޯންސް އިން އިތުރު ފަސް ޕޮއިންޓް ކާމިޔާބުކުރިއިރު، މިހާފުގައި ކްއީންސް އިން ވެސް ވަނީ އިތުރު ހަތް ޕޮއިންޓް ހޯދާފައެވެ. މިއާއެކު 10-10 ގެ ނަތީޖާއަކުން ދެޓީމު އެއްވަރުވެފައި އޮވެގެން މެޗު ނިމުނުއިރު، މިމެޗުގެ މޮޅު ކުޅުންތެރިއަކަށް ހޮވުނީ އެޓީމުގެ އަމްސާ ޝާހިޔާ އާދަމް އެވެ.

އޯޕަން ކެޓަގެރީގައި މިރޭ ކުޅުނު ތިންވަނަ މެޗުގައި އެފްއެސްސީ ޑައިމަންޑްސް އާއި އެފްއެސްސީ އެލީޓް ސްޕާކްސް ވާދަކުރުއިރު، މެޗުގެ ފުރަތަމަ ހާފުގެ ކުޅުން ނިމިގެންދިޔައީ ފަސް ޕޮއިންޓްގެ ލީޑަކާއެކު 2-7 ގެ ނަތީޖާއަކުން ޑައިމަންޑްސް ކުރީގައި އޮވެގެންނެވެ. އަދި ދެވަނަ ހާފުގައި ޑައިމަންޑްސް އިން އިތުރު ހަތް ޕޮއިންޓް ކާމިޔާބުކުރިއިރު، މިހާފުގައި އެލީޓް ސްޕާކްސްއަށް ހޯދިފައިވަނީ އިތުރު ތިން ޕޮއިންޓެވެ. މިއާއެކު 5-14 ގެ ތަފާތުބޮޑު ނަތީޖާއަކުން ކުލަބު ޑައިމަންޑްސް އިން މެޗު ކާމިޔާބުކުރިއިރު، މި މެޗުގެ މޮޅު ކުޅުންތެރިއަކަށް ހޮވުނީ އެޓީމުގެ އިންޝާ ބިންތް ޝިހާބު އެވެ.

މީގެ އިތުރުން މިރޭގެ ހަތަރުވަނަ މެޗުގައި ފޯ ދަ ވައިބްސް އާއި ކުލަބު ހުޅު ވާދަކުރިއިރު، މެޗުގެ ފުރަތަމަ ހާފު ނިމިގެންދިޔައީ 3-0 ގެ ނަތީޖާއަކުން ފޯ ދަ ވައިބްސް ކުރީގައި އޮވެގެންނެވެ. އަދި ދެވަނަ ހާފުގައި ފޯ ދަ ވައިބްސް އިން އިތުރު ހަތަރު ޕޮއިންޓް ކާމިޔާބުކުރިއިރު، އެޓީމުން މެޗު ކާމިޔާބުކުރީ ފަސޭހަކަމާއެކު 7-0 ގެ ތަފާތުބޮޑު ނަތީޖާއަކުންނެވެ. އަދި މިމެޗުގެ މޮޅު ކުޅުންތެރިއަކަށް ހޮވުނީ އެޓީމުގެ އަލްމްރާ އަހުމަދު އަތީކް އެވެ.

މިނަތީޖާތަކާއެކު ލީގުބުރުގައި ކުޅުނު ހަ މެޗުން ހޯދި 13 ޕޮއިންޓާއެކު ފޯ ދަ ވައިބްސް އޮތްއިރު، ދެވަނައިގައި އޮތް ކްއީންސްއަށް ވެސް ހަ މެޗުން ވަނީ 13 ޕޮއިިންޓް ލިބިފައެވެ. އަދި ތާވަލުގެ ތިންވަނައިގައި އޮތް ޑައިމަންޑްސްގެ އިތުރުން ހަތަރުވަނައިގައި އޮތް ކުލަބު ހުޅަށް ވެސް 12 ޕޮއިިންޓް ލިބިފައިވާއިރު، ފަސްވަނައިގައި އެފްއެސްސީ ޔުނިކޯންސް އޮތީ ހަ މެޗުން ހޯދި 11 ޕޮއިންޓާއެކުގައެވެ.

23 ފެބުރުއަރީ 2025 އިން 05 މާރިޗު 2026 ނިޔަލަށް ކުރިއަށްދާ މި މުބާރާތުގެ ސީނިއާ ކެޓަގެރީގައި މިއަހަރު ޖުމްލަ އަށް ޓީމަކުން ބައިވެރިވެފައިވާއިރު، މިޑިވިޝަންގެ މެޗުތައް ކުރިއަށް ގެންދިއުމަށް ހަމަޖެހިފައިވަނީ ލީގު އުސޫލުން ކޮންމެ ޓީމެއް ކޮންމެ ޓީމަކާއި އެއްމެޗު ކުޅެ އެންމެ ރަނގަޅު ނަތީޖާއެއް ހޯދާ ހަތަރު ޓީމު ސެމީފައިނަލަށް ހޮވޭގޮތަށެވެ.

އެގޮތުން ސެމީފައިނަލްގެ ފުރަތަމަ މެޗުގައި ލީގު ބުރުގެ އެއްވަނަ ޓީމާއި ހަތަރުވަނަ ޓީމު ވާދަކުރާއިރު، ސެމީފައިނަލުގެ ދެވަނަ މެޗުގައި ލީގުބުރުގެ ދެވަނަ ޓީމު ވާދަކުރަންޖެހޭނީ ލީގުބުރުގެ ތިންވަނަ ޓީމައި ދެކޮޅަށެވެ.