ނެޓްބޯޅަ: ފަހަތުން އަރައި ސްޓާރސް އިން ޕަވާ ޕަފް ބަލިކޮށްފި

މިހާރު ކުރިއަށްދާ މައިލޯ ރަމަޟާން ހާފްކޯޓް ނެޓްބޯޅަ ޗެލެންޖް 2026 ގެ ޖޫނިއާރ ކެޓަގެރީގައި މިރޭ ކުޅުނު މެޗުގައި ޕަވާ ޕަފް ބަލިކޮށް ސްޓާރސް އިން ތާވަލުގެ ދެވަނައަށް ކުރިއަށް ޖެހިލައިފިއެވެ.

މުބާރާތުގައި ޕަވާ ޕަފް އެންމެ ފަހުން ކުޅުނު މެޗުގައި 4-0 ގެ ނަތީޖާއަކުން ނެޓް ނިންޖާސަ އަތުން ބަލިވެފައިވާއިރު، ސްޓާރސް އެންމެ ފަހުން ކުޅުނު މެޗުގައި އެޓީމުން ވަަނީ 1-0 ގެ ނަތީޖާއަކުން ނެޓް އެޓޭކާސް ބަލިކޮށްފައެވެ. އަދި މިދެޓީމު ލީގު ބުރުގައި ކުޅުނު ފުރަތަމަ މެޗު 3-2 ގެ ނަތީޖާއަކުން ކާމިޔާބުކުރީ ޕަވާ ޕަފް އިންނެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގެ ފުރަތަމަ ހާފުގެ ކުޅުން ނިމިގެންދިޔައީ އެއްޕޮއިންޓްގެ ލީޑަކާއެކު ޕަވާ ޕަފް ކުރީގައި އޮވެގެންނެވެ. އަދި ދެވަނަ ހާފުގައި ސްޓާރސް އިން ވަނީ އެޓީމުގެ ކުޅުން ރަނގަޅުކޮށް އެޓޭކުތައް އިތުރަށް ވަރުގަދަކޮށްފައެވެ. ނަތީޖާއެއްގެ ގޮތުން މިހާފުގައި އެޓީމުން ތިން ޕޮއިންޓް ހޯދިއިރު، މިހާފުގައި ޕަވާ ޕަފްއަށް ހޯދިފައިވަނީ އެންމެ ޕޮއިންޓެކެވެ. މިއާއެކު 3-2 ގެ ނަތީޖާއަކުން ސްޓާރސް މެޗު ކާމިޔާބުކުރިއިރު، މެޗުގެ މޮޅު ކުޅުންތެރިއަކަށް ހޮވިފައިވަނީ އެލީނާ ހުސެއިން ސިނާން އެވެ.

މި ނަތީޖާއެކު ލީގުބުރުގައި ކުޅުނު ހަ މެޗުން މިދެޓީމަށް ވެސް 12 ޕޮއިންޓްގެ ލިބިފައިވާއިރު، ޕޮއިންޓްގެ ތަފާތުން ތާވަލުގެ އެއްވަނައިގައި މިވަގުތު އޮތީ ޕަވާ ޕަފް އެވެ. އަދި ދެވަނައިގައި ސްޓާރސް އޮތްއިރު، ތިންވަަނައިގައި ނެޓް ނިންޖާސް އޮތީ ފަސް މެޗުން ހޯދި ނުވަ ޕޮއިންޓާއެކުގައެވެ. އަދި ކުޅުނު ފަސް މެޗުން ވެސް ނެޓް އެޓޭކާސް ބަލިވެފައިވާއިރު ޕޮއިންޓެއް ނުލިބި އެޓީމު މިވަގުތު އޮތީ ތާވަލުގެ ފުލުގައެވެ.

23 ފެބުރުއަރީ 2025 އިން 05 މާރިޗު 2026 ނިޔަލަށް ކުރިއަށްދާ މިމުބާރާތުގެ ޖޫނިއަރ ކެޓަގެރީގައި މިއަހަރު ޖުމްލަ ހަތަރު ޓީމަކުން ބައިވެރިވެފައިވާއިރު، މިޑިވިޝަންގެ މެޗުތައް ކުރިއަށް ގެންދިއުމަށް ހަމަޖެހިފައިވަނީ ލީގު އުސޫލުން ކޮންމެ ޓީމެއް ކޮންމެ ޓީމަކާއި ދެމެޗު ކުޅުމަށްފަހު ބައިވެރި ހަތަރު ޓީމުގެ މެދުގައި ސެމީފައިނަލް ދެމެޗު ކުޅޭގޮތަށެވެ.

އެގޮތުން ސެމީފައިނަލްގެ ފުރަތަމަ މެޗުގައި ލީގު ބުރުގެ އެއްވަނަ ޓީމާއި ހަތަރުވަނަ ޓީމު ވާދަކުރާއިރު، ސެމީފައިނަލުގެ ދެވަނަ މެޗުގައި ލީގުބުރުގެ ދެވަނަ ޓީމު ވާދަކުރަންޖެހޭނީ ލީގުބުރުގެ ތިންވަނަ ޓީމައި ދެކޮޅަށެވެ.