ނެޓްބޯޅަ: އެޓޭކާސް ބަލިކޮށް ހައި ފްލަޔާސް އިން އެއްވަނާގައި ފަސް ޕޮއިންޓްގެ ލީޑެއް ނަގައިފި

މިހާރު ކުރިއަށްދާ މައިލޯ ރަމަޟާން ހާފްކޯޓް ނެޓްބޯޅަ ޗެލެންޖް 2026 ގެ ސީނިއާ ކެޓަގެރީގައި މިރޭ ކުޅުނު މެޗުތަކުން ހައި ފްލަޔާސް، ނިންޖާސް އަދި ފަލްކަންސް މޮޅުވިއިރު، ޝޫޓާސް އާއި ފައިޓާސް ވާދަކުރި މެޗު އެއްވަރުވެއްޖެ އެވެ.

މުބާރާތުގެ ސީނިއާ ޑިވިޝަންގައި މިރޭ ކުޅުނު ފުރަތަމަ މެޗުގައި ހައި ފްލަޔާސް އާއި އެޓޭކާސް ވާދަކުރިއިރު، މެޗުގެ ފުރަތަމަ ހާފުގެ ކުޅުން ނިމިގެންދިޔައީ ހަތަރު ޕޮއިންޓްގެ ލީޑަކާއެކު 5-1 ގެ ނަތީޖާއަކުން ފްލަޔާސް ކުރީގައި އޮވެގެންނެވެ. އަދި ދެވަނަ ހާފުގައި ދެޓީމުންކުރެ ކޮންމެ ޓީމަކުން ވެސް އިތުރު ދެ ޕޮއިންޓް ހޯދާފައެވެ. މިއާއެކު 7-3 ގެނަތީޖާއަކުން ފްލަޔާސް މެޗު ކާމިޔާބުކުރިއިރު، މިމެޗުގެ މޮޅު ކުޅުންތެރިއަކަށް ހޮވުނީ އެޓީމުގެ ކައިލީން ހުސެއިން ޒުހައިރު އެވެ

މިރޭގެ ދެވަނަ މެޗުގައި ޝޫޓާސް އާއި ފައިޓާސް ވާދަކުރިއިރު، ފުރަތަމަ ހާފުގެ ކުޅުން ނިމިގެންދިޔައީ 2-2 ގެ ނަތީޖާއަކުން ދެޓީމު އެއްވަރުވެފައި އޮވެެގެންނެވެ. އަދި ދެވަނަ ހާފުގައި ދެޓީމުންކުރެ ކޮންމެ ޓީމަކުން ވަނީ އިތުރު ހަތަރު ލަނޑު ކާމިޔާބުކޮށްފައެވެ. މިއާއެކު މެޗުގެ ކުޅުން ނިމިގެންދިޔައީ 6-6 ގެ ނަތީޖާއަކުން ދެޓީމު އެއްވަރުވެފައި އޮވެގެންނެވެ. އަދި މިމެޗުގެ މޮޅު ކުޅުންތެރިއަކަށް ހޮވުނީ ޝޫޓާސް ކަޔާނީ ބިންތް ޝަފްފާޒް އެވެ.

މިރޭގެ ތިންވަނަ މެޗުގައި ނިންޖާސް އާއި ދަ ބޯލްޓްސް ވާދަކުރިއިރު، މެޗުގެ ފުރަތަމަ ހާފު ނިމިގެންދިޔައީ ތިން ޕޮއިންޓްގެ ލީޑަކާއެކު 1-4 ގެ ނަތީޖާއަކުން ނިންޖާސް ކުރީގައި އޮވެގެންނެވެ. އަދި ދެވަނަ ހާފުގައި ނިންޖާސް އިން އިތުރު ދެ ޕޮއިންޓް ހޯދިއިރު، މިހާފުގައި ފަލްކަންސް އިން ވަނީ އިތުރު ތިން ޕޮއިންޓް ހޯދާފައެވެ. މިއާއެކު 4-6 ގެ ނަތީޖާއަކުން ނިންޖާސް މެޗު ކާމިޔާބުކުރިއިރު، މި މެޗުގެ މޮޅު ކުޅުންތެރިއަކަށް ހޮވުނީ އެ ނިންޖާސްގެ ފާތުމަތު ޝާލިނީ އަހުމަދު އެވެ.

މީގެ އިތުރުން މިރޭގެ ހަތަރުވަނަ މެޗުގައި ފަލްކަންސް އާއި ވޯރިއާސް ވާދަކުރިއިރު. ފުރަތަމަ ހާފުގެ ކުޅުން ނިމިގެންދިޔައި 3-2 ގެ ނަތީޖާއަކުން ފަލްކަންސް ކުރީގައި އޮވެގެންނެވެ. އަދި ދެވަނަ ހާފުގައި ފަލްކަންސް އިން އިތުރު ތިން ޕޮއިންޓް ހޯދިއިރު މިހާފުގައި ވޯރިއާސްއަށް ހޯދިފައިވަނީ އެންމެ ޕޮއިންޓެކެވެ. މިއާއެކު 6-3 ގެ ނަތީޖާއަކުން ފަލްކަންސް އިން މެޗު ކާމިޔާބުކުރިއިރު މެޗުގެ މޮޅު ކުޅުންތެރިއަކަށް ހޮވުނީ ފަލްކަންސްގެ މަރިޔަމް އާޔާ ބިންތް ޝުޖާއު އަހުމަދު އެވެ

23 ފެބުރުއަރީ 2025 އިން 05 މާރިޗު 2026 ނިޔަލަށް ކުރިއަށްދާ މި މުބާރާތުގެ ސީނިއާ ކެޓަގެރީގައި މިއަހަރު ޖުމްލަ އަށް ޓީމަކުން ބައިވެރިވެފައިވާއިރު، މިޑިވިޝަންގެ މެޗުތައް ކުރިއަށް ގެންދިއުމަށް ހަމަޖެހިފައިވަނީ ލީގު އުސޫލުން ކޮންމެ ޓީމެއް ކޮންމެ ޓީމަކާއި އެއްމެޗު ކުޅެ އެންމެ ރަނގަޅު ނަތީޖާއެއް ހޯދާ ހަތަރު ޓީމު ސެމީފައިނަލަށް ހޮވޭގޮތަށެވެ.

އެގޮތުން ސެމީފައިނަލްގެ ފުރަތަމަ މެޗުގައި ލީގު ބުރުގެ އެއްވަނަ ޓީމާއި ހަތަރުވަނަ ޓީމު ވާދަކުރާއިރު، ސެމީފައިނަލުގެ ދެވަނަ މެޗުގައި ލީގުބުރުގެ ދެވަނަ ޓީމު ވާދަކުރަންޖެހޭނީ ލީގުބުރުގެ ތިންވަނަ ޓީމައި ދެކޮޅަށެވެ.