ނެޓްބޯޅަ: ބާކީ ދެމެޗު އޮއްވައި ކުއީންސް އާއި ކުލަބު ހުޅުން ސެމީފައިނަލް ޔަގީންކޮށްފި

މިހާރު ކުރިއަށްދާ މައިލޯ ރަމަޟާން ހާފްކޯޓް ނެޓްބޯޅަ ޗެލެންޖް 2026 ގެ އޯޕަން ކެޓަގެރީގައި މިރޭ ކުޅުނު މެޗުތަކުން މޮޅުވެ ކުއީންސް އާއި ކުލަބު ހުޅުން ސެމީފައިނަލް ޔަގީންކުރިއިރު، ޔުނިކޯންސް އާއި ފޯ ދަ ވައިބްސް އިން ސެމީފައިނަލްގެ ފުރުސަތު ބޮޑުކޮށްފިއެވެ.

މުބާރާތުގެ އޯޕަން ކެޓަގެރީގައި މިރޭ ކުޅުނު ފުރަތަމަ މެޗުގައި ކުއީންސް އާއި އެފްއެސްސީ ފަޔާރ ވާދަކުރިއިރު، މެޗުގެ ފުރަތަމަ ހާފުގެ ކުޅުން ނިމިގެންދިޔައީ ތިން ޕޮއިންޓްގެ ލީޑަކާއެކު 3-6 ގެ ނަތީޖާއަކުން ކުއީންސް ކުރީގައި އޮވެެގެންނެވެ. އަދި ދެވަނަ ހާފުގައި ކުއީންސް އިން އިތުރު ހަ ޕޮއިންޓް ހޯދިއިރު މިހާފުގައި ފަޔަރަށް ހޯދިފައިވަނީ އިތުރު ފަސް ޕޮއިންޓެވެ. މިއާއެކު 8-12 ނަތީޖާއަކުން ކުއީންސް މެޗު ކާމިޔާބުކުރިއިރު މިމެޗުގެ މޮޅު ކުޅުންތެރިއަކަށް ހޮވުނީ އެޓީމުގެ ޝާހިޔާ އާދަމް އެވެ.

އޯޕަން ކެޓަގެރީގައި މިރޭ ކުޅުނު ދެވަނަ މެޗުގައި އެފްއެސްސީ ޔުނިކޯންސް އާއި ހައި ފައިވްސް ވާދަކުރުއިރު، މެޗުގެ ފުރަތަމަ ހާފުގެ ކުޅުން ނިމިގެންދިޔައީ ހަތަރު ޕޮއިންޓްގެ ލީޑަކާއެކު 6-3 ގެ ނަތީޖާއަކުން ޔުނިކޯންސް ކުރީގައި އޮވެގެންނެވެ. އަދި ދެވަނަ ހާފުގައި ޔުނިކޯންސް އިން އިތުރު ހަ ޕޮއިންޓް ކާމިޔާބުކުރިއިރު، މިހާފުގައި ހައި ފައިވްސްއަށް ހޯދިފައިވަނީ އިތުރު އެއް ޕޮއިންޓެވެ. މިއާއެކު 12-4 ގެ ތަފާތުބޮޑު ނަތީޖާއަކުން ޔުނިކޯންސް މޮޅުވިއިރު، މެޗުގެ މޮޅު ކުޅުންތެރިއަކަށް ހޮވުނީ އެޓީމުގެ އަމްސާ އަބްދުﷲ ހަނީފް އެވެ.

އޯޕަން ކެޓަގެރީގައި މިރޭ ކުޅުނު ތިންވަނަ މެޗުގައި އެފްއެސްސީ ޑައިމަންޑްސް އާއި ކުލަބު ހުޅު ވާދަކުރުއިރު، މެޗުގެ ފުރަތަމަ ހާފުގެ ކުޅުން ނިމިގެންދިޔައީ 4-4 ގެ ނަތީޖާއަކުން ދެޓީމު އެއްވަރުވެފައި އޮވެގެންނެވެ. އަދި ދެވަނަ ހާފުގައި ކުލަބު ހުޅުން އިތުރު ހަ ޕޮއިންޓް ކާމިޔާބުކުރިއިރު، މިހާފުގައި ޑައިމަންޑަށް ހޯދިފައިވަނީ އިތުރު ތިން ޕޮއިންޓެވެ. މިއާއެކު 7-8 ގެ ނަތީޖާއަކުން ކުލަބު ހުޅު މެޗު ކާމިޔާބުކުރިއިރު، މި މެޗުގެ މޮޅު ކުޅުންތެރިއަކަށް ހޮވުނީ އެޓީމުގެ ފާތިމަތު އަރުޝާ އެވެ.

މީގެ އިތުރުން މިރޭގެ ހަތަރުވަނަ މެޗުގައި ފޯ ދަ ވައިބްސް އާއި އެފްއެސްސީ އެލީޓް ސްޕާކްސް ވާދަކުރިއިރު، މެޗުގެ ފުރަތަމަ ހާފު ނިމިގެންދިޔައީ ދެ ޕޮއިންޓްގެ ލީޑަކާއެކު 3-5 ގެ ނަތީޖާއަކުން ފޯ ދަ ވައިބްސް ކުރީގައި އޮވެގެންނެވެ. އަދި ދެވަނަ ހާފުގައި ދެޓީމުންކުރެ ކޮންމެ ޓީމަކުން ވެސް ވަނީ އިތުރު ތިން ޕޮއިންޓް ހޯދާފައެވެ. މިއާއެކު 6-8 ގެ ނަތީޖާއަކުން ފޯ ދަ ވައިބްސް މެޗު ކާމިޔާބުކުރިއިރު، މިމެޗުގެ މޮޅު ކުޅުންތެރިއަކަށް ހޮވުނީ އެޓީމުގެ އަލްމްރާ އަހުމަދު އަތީކް އެވެ.

23 ފެބުރުއަރީ 2025 އިން 05 މާރިޗު 2026 ނިޔަލަށް ކުރިއަށްދާ މި މުބާރާތުގެ ސީނިއާ ކެޓަގެރީގައި މިއަހަރު ޖުމްލަ އަށް ޓީމަކުން ބައިވެރިވެފައިވާއިރު، މިޑިވިޝަންގެ މެޗުތައް ކުރިއަށް ގެންދިއުމަށް ހަމަޖެހިފައިވަނީ ލީގު އުސޫލުން ކޮންމެ ޓީމެއް ކޮންމެ ޓީމަކާއި އެއްމެޗު ކުޅެ އެންމެ ރަނގަޅު ނަތީޖާއެއް ހޯދާ ހަތަރު ޓީމު ސެމީފައިނަލަށް ހޮވޭގޮތަށެވެ.

އެގޮތުން ސެމީފައިނަލްގެ ފުރަތަމަ މެޗުގައި ލީގު ބުރުގެ އެއްވަނަ ޓީމާއި ހަތަރުވަނަ ޓީމު ވާދަކުރާއިރު، ސެމީފައިނަލުގެ ދެވަނަ މެޗުގައި ލީގުބުރުގެ ދެވަނަ ޓީމު ވާދަކުރަންޖެހޭނީ ލީގުބުރުގެ ތިންވަނަ ޓީމައި ދެކޮޅަށެވެ.