ރާއްޖޭގައި ބާއްވާ އެންމެ އަގުބޮޑު ފުޓްސަލް މުބާރާތުގައި ބައިވެރިވުމުގެ މުއްދަތު އިތުރުކޮށްފި

ރާއްޖޭގައި މިހާތަނަށް ބާއްވާ އެންމެ އަގުބޮޑު ފުޓްސަލް މުބާރާތް " ގައްދޫ ކައުންސިލް ފުޓްސަލް ޗެލެންޖް 2024" ގައި ބައިވެރިވުމުގެ ފުރުސަތު އޮގަސްޓް މަހުގެ ފަސްވަނަ ދުވަހުގެ ނިޔަލަށް އިތުރުކޮށްފިއެވެ.

ގައްދޫ ކައުންސިލުން މިއަދު ގެޒެޓްކުރި އިއުލާނެއްގައިވާ ގޮތުން "ގައްދޫ ފުޓްސަލް ޗެލެންޖް 2024" ގައި ބައިވެރިވުމުގެ މުއްދަތު ހަމަވިފަހުން މުބާރާތުގައި ބައިވެރިވުމަށް އެދި ގިނަ ފަރާތްތަކަކުން އެދެމެންދިއުމާއި ގުޅިގެން، "ގައްދޫ ފުޓްސަލް ޗެލެންޖް 2024" ގެ 3 ޑިވިޝަންގައިވެސް ބައިވެރިވުމުގެ މުއްދަތު 05 އޮގަސްޓް 2024 ވާ ހޯމަ ދުވަހުގެ 14:00 އާއި ހަމައަށް ވަނީ އިތުރުކޮށްފައެވެ. ގައްދޫ ކައުންސިލް ފުޓްސަލް ޗެލެންޖް 2023 ގެ މެޗެއްގެ ތެރެއިން... ފޮޓޯ: ގާފު ސްޕޯޓްސް

މިބަދަލާއި ގުޅިގެން މުބާރާތުގެ ޤަވާއިދުގެ 4 ވަނަ މާއްދާގެ (ހ) އާއި 5 ވަނަ މާއްދާގެ (ށ) އަދި (ރ) ވަނީ އިސްލާހުކުރެވިފައެވެ. ވުމާއެކު މުބާރާތުގައި ބައިވެރިވުމަށް އެދޭ ޓީމްތަކުން 2024 އޮގަސްޓް 05 ވަނަ ދުވަހުގެ 14:00 ގެ ކުރިން މި އިޢުލާނާއިއެކު އާއްމުކޮށްފައިވާ މުބާރާތުގައި ބައިވެރިވުމަށް އެދޭ ފޯމް ފުރިހަމަ ކުރުމަށްފަހު މިއިދާރާއަށް ހުށަހެޅުއްވުން އެދެމެވެ. މުބާރާތުގައި ބައިވެރިވުމަށް އެދޭ ފޯމާއި ޓީމް ލިސްޓް ހުށަހަޅާ ފޯމް މިއިދާރާގެ އީމެއިލް އެޑްރެސް [email protected] އަށް ފޮނުވިދާނެ ކަމުގައި ވަނީ ބުނެފައެވެ. އަދި މީގެ އިތުރުން މިމުބާރާތް އަދި މުބާރާތުގެ ޤަވާއިދާއި ގުޅިގެން އިތުރު މަޢުލޫމާތު ސާފުކުރުމަށް 7779084/9111005 އަށް ގުޅުއްވުމަށްވެސް އެއިދާރާއިން ވަނީ އެދިފައެވެ.

މިމުބާރާތަކީ 2022 ވަނަ އަހަރުން ފެށިގެން ގައްދޫގެ ޒުވާނުންގެ މެދުގައި އެކުވެރިކަމާއި އެއްބައިވަންތަކަން އާލާކޮށް ކުޅިވަރުގެ ތެރެއިން ދުޅަހެޔޮ މުޖުތަމައެއް ބިނާކުރުމުގެ މަގުސަދުގައި، ގައްދޫ ކައުންސިލްގެ ފަރާތުން އިންތިޒާމުކޮށް ގައްދޫ އަންހެނުންގެ ތަރައްގީއަށް މަސައްކަތްކުރާ ކޮމެޓީއާއި ގުޅިގެން ކޮންމެ އަހަރަކު ބާއްވަމުން އަންނަ މުބާރާތެކެވެ. އަދި މިއަހަރުގެ މުބާރާތް ވެސް ކުރިއަށް ގެންދިއުމަށް ހަމަޖެހިފައި ވަނީ ތިން ޑިވިޝަނަކަށް ބަހާލައިގެންނެވެ.

އެގޮތުން މިމުބާރާތުގައި އަންހެން އަދި ފިރިހެން ޑިވިޝަނުގެ އިތުރުން ޖޫނިއާ ފިރިހެން ޑިވިޝަނުގެ އިނާމު ފައިސާގެ ގޮތުގައި ޖުމްލަ 4،35،500 ރުފިޔާގެ ފައިސާގެ އިނާމު ހުށަހަޅާފައިވާއިރު، މިއީ ތަފާތު ހިސާބުތަކުން ދައްކާގޮތުގައި ރާއްޖޭގައި މިހާތަނަށް ބާއްވާ އެންމެ އަގުބޮޑު ފުޓްސަލް މުބާރާތެވެ.

މުބާރާތުގެ ޑިވިޝަންތަކަށް ފައިސާގެ އިނާމު ހުށަހަޅާފައިވާ ގޮތުގެ ތަފްސީލް

ފިރިހެން ޑިވިޝަން:

1. އެއްވަނަ ޓީމް: 155,000.00 ރުފިޔާ
2. ދެވަނަ ޓީމް:80,000.00 ރުފިޔާ
3. ތިންވަނަ ޓީމް:40,000.00 ރުފިޔާ
4. ފުޓްސަލް ކިންގް:10,000.00 ރުފިޔާ

އަންހެން ޑިވިޝަން:

1. އެއްވަނަ ޓީމް:50,000.00 ރުފިޔާ
2. ދެވަނަ ޓީމް:25,000.00 ރުފިޔާ
3. ތިންވަނަ ޓީމް:15,000.00 ރުފިޔާ
4. ފުޓްސަލް ކުއީން:8,000.00 ރުފިޔާ

ޖޫނިއަރ ޑިވިޝަން:

1. އެއްވަނަ ޓީމް:25,000.00 ރުފިޔާ
2. ދެވަނަ ޓީމް:15,000.00 ރުފިޔާ
3. ތިންވަނަ ޓީމް:7,500.00 ރުފިޔާ
4. ފުޓްސަލް ޕްރިންސް:5,000.00 ރުފިޔާ